1 आदो इटा़लिया़ते जाहाजतेले चालाक्‌गे गोटायेन खान पावल आर आदोम एटाक् का़इदिको हों आ़गुसतुस पालटोन खातारेन जुलिया़स ञुतुमान सुबेदार ठेनको जिमा़कात्‌कोवा 2 आर आ़सिया़ ढिप ढिपतेयाक् जायगाकोते चालाक् ला़गिदोक्‌कान ताहेंकान आदरामुतियुम रेयाक्‌ मित्‌टेच् जाहाजरे देच्एनते जाहाजले लाड़ावकेदा, आर आ़रिसतारखुस ञुतुमानाक् थेस्‌सालोनिकिरेन मित्‌टेन मा़किदुनिया़रेन होड़ हों आले साँवतेये ताहेंकाना। 3 आर दोसार हिलोक् दो सिदोनरेले तेङगोञोक्‌केदा, आर जुलिया़स दो पावल तुलुच् दाया सालाक्ए बेवहारकेत्‌ते गातेको ठेन चालाक्‌आ मेनतेये सेन ओचोवादेया जेमोन उनियाक् जा़रुड़ोक्‌आक्‌को गोड़ोंवाय। 4 आदो ओंडे खोन जाहाज लाड़ावकाते कुपरोस आड़े आड़ेतेले चालाव इदियेना, सानाम सेच् खोने होयेत् ताहेंकान इया़ते 5 आर किलिकिया़ आर पामफिलिया़ आड़े आड़ेतेयाक् जालापुरि पारोमकाते लुकिया़ आर मुरा़तेले सेटेरेना। 6 आर सुबेदार दो इटा़लिया़ते चालाक्‌कान आलेकसान्‌डेरिया़ रेयाक्‌ मित्‌टेच् जाहाज ओंडेये ञामकेत्‌ते ओनारेये देच्‌केत्‌लेया।

7 आर ढेर दिन बा़इ बा़इतेले चालाव इदियेनते बेरिया़रे कनिदुस मुहा़ँमुहिंले सेटेरेन खान होय बाय सेन लाहा ओचोवात्‌लेते क्रेते आड़े आड़ेतेले चालाव इदियेना, सालमोने मुहा़ँमुहिंते। 8 आर बेरिया़रे ओना आड़े आड़ेते सेन इदियेनते भागे बोंदोरको मेताक् मित्‌टेच जायगातेले सेटेरेना, ओने ओना सोररे लासाया नागराहा ताहेंकाना।

9 आदो ढेर दिन खेमावेन, आर ओना जोखेच् जाहाजते दाड़ान दो मुहिन रेयाक्‌ ओकते ताहेंकानते उपा़स दिनको दो पारोम आकान ताहेंकाना, पावल दोए चेहावकेत्‌कोवा, 10 मेतात्‌कोवाय, ए हो इञिञ ञेलेदा, जाहाजते सेन इदि दो भाराभाट आर ढेर लोकसान रेयाक्‌गे होयोक्आ एकेन माल सामानको आर जाहाज रेयाक्‌ दो बाङ, मेनखान आबोवाक् जिवि ला़गित्‌ हों। 11 मेनखान सुबेदार दो पावले रोड़केत्आक्‌को खोन दो बिचकोम जाहाज चाक्‌लाविच् आर जाहाजरेन मा़लिक रेयाक्‌गे बा़ड़तिये पा़तिया़वात्‌ताकिना। 12 आर ओना बोंदोर दो राबाङ दिन टालाव ला़गित्‌ सुबिता बाङ ताहेंकानते, ढेर होड़ ओंडे खोन जाहाज चालाव मेनतेको साझाकेदा, जेमोन जाहाँलेकाकाते फोयनिकेते सेटेरकाते ओंडे राबाङ दिनको खेमाव। ओना दो क्रेते रेयाक्‌ बोंदोर काना आर दा़खिन पा़छिम आर उता़र पा़छिम सेच् सामाङाकाना।

13 आर दा़खिन खोन हिसित् हिसित्ए होयकेत् खान आकोको आसआकान ताहेंकानाक्‌को ञामकेदा मेनते बुजहा़उकाते लोङगोर ओर राकाप्‌केत्‌ते क्रेते ढिप फेड फेडतेको चालाव इदिकेदा। 14 मेनखान थोड़ा तायोम खानगे एयोराकोलोनको मेताक् बिरबाँव ओत खोन राकाप् हेच्‌एना। 15 आर जाहाज दो आ़तकिर इदि ओचोयेन आर होय बाय सामबड़ाव दाड़ेयात् खानले आड़ाक्‌ गोत्‌कादा आरले डोयला़उ इदियेना। 16 आर का़उदा़को मेताक् मित्‌टेच हुडिञ टा़पु आड़ेरे सेनकाते आ़डि कोसटोते ला़उका़ले साप् टारहाव दाड़ेयादा। 17 आर ओनाको ओर राकाप्‌केत्‌ खान बाराहिकोको लागावकेत्‌ते लातार सेच् जाहाजको तोल आ़चुरकेदा, आर सुरतिस बा़लगादारे गा़डिया़उक् बोतोरते बादोमतेत् दोको राड़ा फेडकादा आर ओनकागेले डोयला़उ इदियेना। 18 आर बिरबाँवते आ़डि बा़ड़िच्‌ले हारोनोक्‌कान ताहेंकानते दोसार हिलोक् दो मालको ओडोक गिड़िकाक्‌को एहोप्‌केदा। 19 आर तेसार हिलोक् दो आको तिते जाहाज रेयाक्‌ साज सामान होंको चाडो गिडिकेदा। 20 आर ढेर दिन हा़बिच् सिञ चाँदो हों बाङ आर इपिलको हों बाङको ञेल ञामलेनते, आ़डि माराङ बिरबाँव लागावाकान ताहेंकानते सेसरे आले बाञचावक्‌ रेयाक्‌ जोतो आस दो छुटा़वेनतालेया।होय आ़ँधिते उनुमोक्‌ कान जाहाज

21 आर ढेर दिन हा़बिच्‌ बिन जोमगेको ताहेंयेन खान पावल दो ओनको तालारे तेङगोयेनतेये मेनकेदा, ए हो आपे दो इञाक् काथा आँजोम आर क्रेते खोन जाहाज आलो लाड़ावगे लेक ताहेंकानतापेया, आदो होनाङ नोवा भाराभाट आर लोकसान दो ओहो होयलेना। 22 आर नितोक्‌ दो खा़तिरोक्‌आ मेनतेञ सोलहावापेकाना, एनते आपेको मोदरे ओकोयाक् जिवि हों बाङ लोकसानोक्आ, जाहाज छाडाकाते दो। 23 एनते तेहेञ ञिंदा़गे उनि इसोर, ओने उनिरेन कानिञ ओने उनि सेवा होंञ सेवावायकान, उनिरेनगे मित्‌टेन दुत इञ ठेन तेङगोयेनतेये मेनकेदा, 24 आलोम बोतोरोक्आ, ए पावल का़इसा़र सामाङरे तेङगोन होयोक्‌गेतामा, आर ञेलमे इसोर दो आम साँवते जाहाजतेको चालाक्‌कान सानामकोय दान आकावात्‌मेया। 25 ओना इया़ते ए बाबाको खा़तिरोक्‌पे इसोर इञ पा़तिया़वाय काना, ओका लेकाय ला़इ आकावादिञ ओनकागे होयोक्आ मेनते। 26 मेनखान ओका टा़पुरे चोङ ढाङोक् होयोक्‌ ताबोना।

27 मेनखान गेलपोनाक् ञिंदा़ होयेन खान, आदरिया़ जालापुरिरे ओनते नोतेले डेवलाव बाड़ाय कान ताहेंकानरे, ताला ञिंदा़ गान जाहाज चाक्‌लावकोको ओनमानकेदा, जे ओका दिसा़म ठेन चोङको सोरोक्‌कान। 28 आर दाक् जोक्‌खा सा़हुल चाडोकेत्‌ते मित्‌इसि पुरुसको ञामकेदा, आर थोड़ा तोफातरे आरहोंको जोखाकेत् खान गेलमोंड़ें पुरुसको ञामकेदा। 29 आदो चा़टा़इनिरे ढाङोक्‌को बोतोरेनते जाहाज तायोम सेच् पोनया लोङगोरको चाडोकेदा, आर सिञ मारसालोक्‌ ला़गित्‌को कोयकेदा। 30 आदो जाहाज चाक्‌लावको दो जाहाज खोन दा़ड़जोङको कुरुमुटुकेत्‌ते जाहाज सामाङसेच्‌ खोन लोङगोर चाडोया मेनते जाहाज रेयाक्‌ ला़उका़ दो जालापुरिरेको फेडकेदा, 31 खान पावल दो सुबेदार आर पालटोनकोय मेतात्‌कोवा, नोको होड़ जाहाजरे बाको ताहेंलेन खान आपे दो ओहोपे बाञचाव दाड़ेलेना 32 खानगे पालटोन दो ला़उका़ रेयाक्‌ बाराहि बाबेरको सामाक्‌ तोपाक्‌केत्‌ते ओना दोको आड़ाक् गोत्‌कादा।

33 आर आ़उरि मारसालोक्‌रेगे पावल दो सानामको जोम ञुजोङ ला़गित्‌ नेहोंरात्‌कोतेये मेतात्‌कोवा। तेहेञ दो गेलपोनाक् दिन काना, ओने ञेल होर ञेल होरते उपा़सतेगेपे ताहें आ़गुवाकान, चेत् हों बापे जोमआकात्‌ते। 34 ओना इया़तेञ सोलहावापे काना जोम ञु जोङपे, एनते ओना दो आपेयाक् रुखिया़क् ला़गित्‌गे, एनते आपे मोदरे ओकोयाक् बोहोक् रेयाक्‌ मिच्‌टेच उप्‌ हों बाङ ञुरहा़क्आ 35 आर ओनकाए मेनकेत् खान पिठा़इ हालाङकेदा, आर सानामको सामाङरे इसोरे गुनमानाव जोहारादेया, आर केचाक्‌काते जोजोमे एहोप् एना। 36 आदो सानामकोको खा़तिरेना आर आको होंको जोम ञुकेदा। 37 आर जाहाजरे दो जोतोते बार साय एयायगेल तुरुइ होड़ले ताहेंकाना।

38 आरको जोमबियेन खान जालापुरिरे गुहुमको गिडिकेत्‌ते जाहाजको रावालकेदा,

39 आदो सिञ मारसालेन खान ओना दिसा़म दो बाको ओरोमलाक्‌आ मेनखान मित्‌टेच्‌ दोरयाँव कुचला़को ञेल ञामकेदा आरको सोलहावाना, दाड़ेयाक्‌ खान जाहाज दो ओंडेगेबो इदि ढाङा 40 आदो बेड़हायते लोङगोरकोको ओचोक्‌ गिडिकेत्‌ते ओना दो जालापुरिरेको बा़गियादा आर उनरेगे पाटवार रेयाक्‌ तोनोल होंको राड़ाकेदा आर होय ञाम ला़गित्‌ लाहा बादोम राकाप्‌केत्‌ते ओना मित्‌ साँव घुटु सेच्‌को मोहंडायेना। 41 मेनखान बारया जालापुरि रेयाक्‌ दोमुहा़ँनि ठेनको पाड़ावेनते जाहाज दोको चालाव ढाङकेदा आर जाहाज सामाङसेच्‌ दो गा़डिया़उ उरिच्एना, मेनखान तायोम सेच्‌ दो ढेव रेयाक्‌ ता़पिसते रा़पुदोक् एहोप्‌एना। 42 आर पालटोनको दोको निटकेदा, जेमोन का़इदिकोको गोच्‌को, बाङखान पासेच्‌ जाहाँय पायरा ओडोककातेये दा़ड़ बोतेच्‌के। 43 मेनखान सुबेदार दो पावल बाञचावे ला़गित्‌ मोन ताहेंकानतायते ओनकोको मेनवानाक् खोने आकोटकेत्‌कोवा, आरे हुकुमकेदा, जेमोन पायरा दाड़ेयाक्‌को दो दोन चाडोक्‌ते लाहारे घुटुको तिया़ग। 44 आर सारेच्‌को आदोमको दो जाहाज रेयाक्‌ तोखताको से आर जाहानाक्‌को साप्‌काते सानामकोगे घुटुतेको बाञचाव राकाप्‌ एना।