1 मेनखान आनानिया़स ञुतुमान मित्‌टेन होड़ दो आच् ओड़ाक् होड़ सा़फिरा लागायते दोखोलाक् जुमिये आ़खरिञकेदा, 2 आर दाम रेयाक्‌ आदोम दोए ओको दोहोकेदा ओड़ाक् होड़तेत् होंए बाडाय तुलुच्‌गे, आर तिन उडिच् चोङ आ़गुकाते आपोसतोलकोवाक् जाङगा ठेने दोहोकेदा। 3 मेनखान पातरासे मेनकेदा, "हेंदा आनानिया़स चेत् इया़ते सायतान दो आमाक् मोनेरेये राजेना, सोनोत जिवेम एड़ेकेदेया ओना जायगा रेयाक्‌ दाम खोन आदोमेम ओको दोहोजोङ ला़गित्‌ दो? 4 ताहेंकानरे बाङ दो आमाक्‌गे बाङ ताहेंकान आर आ़खरिञरे हों बाङ दो आमाक् एकतिया़रिरे बाङ ताहेंकान? चेकाते नोनकानाक् दोम मोनेयाना? मानवा दो बाम एड़ेआकात्‌कोवा, बिचकोम इसोरगे।"

5 आर आनानिया़स दो ओनाको काथा आँजोमकातेये भिनदा़ड़ेना आर जिवि ओडोकएनताया; आर जोतो आँजोमकेत्‌को दो माराङ बोतोर चाड़हावात्‌कोवा। 6 आर जुवा़नको दो बेरेत् एनते उनिको ओयो पोटोमकेदेया आर ओडोक इदिकेदेतेको तोपाकादेया।

7 आर पे घोन्‌टा गान तायोम उनिरेन ओड़ाक् होड़ दो, होय आकानाक् बेगोर बाडायतेये हेच् बोलोयेना।

8 आदो पातरास उनिये कुलि केदेया, "ला़इया़ञमे ओना ओत दो इना़क्‌तेगेबेन आ़खरिञकेदा?" उनिये मेनकेदा, "हें इना़क्‌तेगे,"

9 खान पातरास दो उनिये मेतादेया, "चेकाते आबेन दोबेन मित् मोन आकाना, प्रोभुरेन जिउ बिडा़वे ला़गित्‌? ञेलमे हेरेलमेको तोपाकेदेको रेयाक्‌ जाङगा दो दुवा़र ठेन मेनाक्‌कोवा, आर आम होंको ओडोक इदिमेया," 10 खानगे उनि दो उन जोखेच्‌गे उनियाक् जाङगा ठेने भिनदा़ड़ेना आर जिवि ओडोकएनताया; आर कोड़ाको हेच् बोलोयेन खान गोच्आकानको ञाम केदेया, आर ओडोक इदिकाते हेरेलतेत् पानतेरेको तोपाकादेया, 11 आर गोटा का़लिसिया़रेनको आर ओनाको आँजोमकेत् खान सानामको माराङ बोतोर चाड़हा़वात्‌कोवा।

12 आर आपोसतोलको होतेते आयमा चिनहा़को आर हाहाड़ावाक्‌को दिसा़म होड़को तालारे होयेना, आर ओनको सानामकोगे मित् मोनते सुलेमानाक् पिंडा़रेको ताहेंकाना। 13 आर एटाक्‌को दो ओकोय हों ओनको तुलुच्‌ सेलेदोक् बाको दिललेदा मेनखान दिसा़म होड़ दो ओनकोको मानोतेत्‌को कान ताहेंकाना। 14 आर पा़तिया़उक्‌को दो आरतेत् बा़ड़ति प्रोभुरेको जुटुच्‌ इदियेना, गादगाद हेरेल हों आर मायजिउ हों। 15 नुना़क् हा़बिच् जे ओनको दो कुलहिकोरे रुवा़क् हासोक्‌को ओडोक इदिकाते पारकोमको आर आटेत्‌कोरेको दोहोकेत्‌कोवा, जेमोन पातरासे पारोम चालाक्‌रे उनियाक्‌ उमुल हों उमुलतेत् जाहाँयटाक् पाड़ावाको। 16 आर जेरुसालेम बेड़हायतेयाक् नागराहाकोरेन गादेल होड़ होंको हेच् जारवायेना, रुवा़क् हासोक्‌को बेसाफा जिउ होतेते जालाक्‌कानको आ़गुदारावानते आर ओनको दो जोतोगेको बोगे ओचोयेना।

17 आर माराङ नायके दोए तेङगोयेना आर उनि साँवरेन सानामकोगे (ओने सा़दुकि दोलरेनको ताहेंकान) हिसका़तेको पेरेच्‌एना। 18 आर आपोसतोलको साप्‌केत्‌कोवा आर सारकारि हाजोतरेको भोरावकेत्‌कोवा, 19 मेनखान प्रोभुरेन मित्‌टेन दुत दो ञिंदा़ हाजोत ओड़ाक् रेयाक्‌ सिलपिञकोय झिच्‌केदा आर ओनको ओडोक आ़गुकातेये मेतात्‌कोवा 20 "दु चालाक्‌पे आर कोयजोङ ओड़ाक्‌रे दिसा़म होड़को नोवा जियोन रेयाक्‌ सानाम काथा ला़इयाकोपे।"

21 आदो ओनाको आँजोमकेत् खान सेतागोक्‌ देलादिलि कोयजोङ ओड़ाक्‌तेको बोलोयेना आर होड़कोको ला़इ चेत्आत्‌कोवा। खान माराङ नायके आर उनि साँवतेनको हेच्‌एनते माराङ बा़इसिरेनको आर इसराएल होपोनकोरेन मुरुबि साभारेन जोतोकोको होहो जारवाकेत्‌कोवा, आर ओनको होहो आ़गु ओचोको ला़गित्‌ हाजोत ओड़ाक्‌ते होड़को कोलकेत्‌कोवा। 22 मेनखान सिपा़हि दो ओंडे सेनकाते हाजोत ओड़ाक्‌रे ओनको बाको ञामलेत्‌कोवा, आदो रुवा़ड़काते नोनकाको ला़इयात्‌कोवा। 23 आले दो हाजोत ओड़ाक् जोतो लेकाते काजाक सिञ आकात्‌ले ञामकेदा आर होरहोको हों दुवा़र ठेन तेङगोवाकान, मेनखानले झिच्‌केत् खान भितरिरे दो चेले हों बाले ञामलेत्‌कोवा। 24 आर कोयजोङ ओड़ाक्‌ पाहराकोरेन सुबेदार आर माराङ नायकेको ओनाको काथाको आँजोमकेत् खान ओनको रेयाङको आँदेसालेयेना, नोवा दो चेत् चोङ होयोक् नाहाँक्‌, 25 खानगे मित् होड़ हेच्‌कातेये ला़इयात्‌कोवा, "ञेलपे ओनको होड़ हाजोतरेपे दोहोलेत्‌को ओनकोमा कोयजोङ ओड़ाक्‌रेको तेङगोवाकान आर दिसा़म होड़को ला़इचेत्आको काना।" 26 खानगे कोयजोङ ओड़ाक्‌ पाहराकोरेन सुबेदार दो सिपा़हि सालाक् सेनकाते ओनकोय आ़गुकेत्‌कोवा। मेनखान जोरमोटते दो बाङ, एनते दिसा़म होड़को बोतोरात्‌कोवा, ओनको ठेनको तिञगोच् ओचोक्आ मेनते।

27 आदोको आ़गुकेत्‌को खान माराङ बा़इसि सामाङरेको तेङगोकेत्‌कोवा। खानगे माराङ नायकेये कुलिकेत्‌कोवा। 28 आले दो काजाकतेले हुकुमात्‌पेया, नोवा ञुतुमते आलो चेत्‌आको ला़गित्‌ आर ञेलपे, जेरुसालेमपे पेरेच्‌आकादा आपेयाक् सिकना़तते आर नुय होड़ाक् माँयाँम आलेरे पाड़ाव ओचोयपे मोनेयाकादा।✝5:28 माथ २७:२५

29 आदो पातरास आर आपोसतोलकोको रोड़ रुवा़ड़केदा, मानवाकोवाक् खोन बिचकोम इसोराक्‌गे बातावताय जा़रुड़ा। 30 आबोरेन हापड़ामकोरेन इसोर दो जिसुइ जिवेत् बेरेत्‌ केदेया, ओने उनि आपे कुरुसरे आकाकातेपे गोच्‌लेदे। 31 उनिगे इसोर दो माथा आर बाबाञचाविच्‌ मेनकाते आयाक्‌ जोजोम ति नाखारेये उसुल ओचोकेदेया, इसराएलको मोन आ़चुर आर का़इ इका़ एमाको ला़गित्‌ 32 आर आले दो नोवाको काथारेन गोहाको कानाले, आर सोनोत जिउ हों ओने ओकोय इसोर दो आयाक्‌ बातावेत्‌तायकोय एमआकावात्‌को।

33 मेनखान ओनकोको आँजोमकेत् खान मोनरेको सोबोक् ताप्एना आरको सालहावाना ओनको गोच्‌को ला़गित्‌। 34 मेनखान गामालिएल ञुतुमान मित्‌टेन फा़रिसि होड़ सानाम दिसा़म होड़को ठेन मानोतानिच्, मित्‌टेन आ़न गुरु दो माराङ बा़इसिरे तेङगोयेनतेये हुकुमकेदा, जेमोन ओनको होड़ थोड़ा घा़ड़िच्‌ ला़गित्‌को ओडोकोक्‌। 35 आदोए मेतात्‌कोवा, ए इसराएल होड़को मेन सोनतोर जोङपे, नोको होड़ चेत् पे चेकावाको ला़गिदोक्‌काना। 36 एनते निया़को दिन पा़हिलरे थेयुदासे तेङगोलेना, आच् दो जाहाँय कानाय मेनकाते, ओने उनि तुलुच्‌ लेखारे पोन साय गान होड़को सेलेत् एन खान, उनि दोए गोच् ओचोयेना आर तिनाक्‌को बातावेत्‌ताय ताहेंकान जोतोको छिञछा़तुरेना आरको आ़उड़ियाक् एना। 37 इना़ तायोम गा़लिलरेन जिहुदा़इ तेङगोलेना, होड़ लेखाको जोखेच् आर होड़को आच् सेच्ए झाकरावकेत्‌कोवा, उनि दो आच् होंए मारावेना आर तिना़क्‌को बातावलेत्‌ताए जोतोको दोको छिञछा़तुर एना। 38 आर नितोक् दोञ मेतापेकाना, नोको होड़को खोन साहाड़ाकान ताहेनपे, आर इका़काको पे एनते नोवा सोलहा से नोवा का़मि दो मानवाको सेच् खोनाक् कान खान आच्‌तेगे नासाव मारावक्‌आ।

39 मेनखान इसोर सेच् खोनाक् कान खान एनडेखान ओहोपे माराव दाड़ेलेकोवा, आर बाङखान इसोर बिरुदरे ला़ड़हा़इको पे होयोक्आ। 40 आर आपोसतोलकोको होहो आदेर ओचोकेत्‌कोवा आर दाल उर ओचोकेत्‌कोतेको हुकुमात्‌कोवा, जिसु ञुतुमते आलोको रोड़ बाड़ाया मेनते आदोको आड़ाक्‌कात्‌कोवा। 41 आर ओनको माराङ बा़इसि सामाङ खोनको चालावेना रा़सका़वाते, ञुतुमतेत् खा़तिरते बेमानोत ओचोक् लेकको बुजहा़वेन इया़ते। 42 आर दिना़मगे कोयजोङ ओड़ाक्‌रे आर ओड़ाक् ओड़ाक्‌कोरे चेत्आको आर मा़सि जिसु रेयाङ भागे सोमबात पोपोरचार दो बाङको थिरलेना।