1 Ire bǝn Bulus, iwaŋ ndi nǝ tanyɛmɛ iye Arik ayi nǝ du lɛ kɛ Kristi Yesɔ,

Igar bǝn abǝ zǝ Arik nǝ Afisa, abaŋ ndi atanyɛmɛ nɛ susun amen nǝ nkɔŋ kǝ Kristi Yesɔ:

2 Arik Tetɛɛ amɔr bǝn Ŋgɔŋ Yesɔ Kristi be nǝk zhin itazhɔk bǝn isɔŋ kǝ sǝk.

3 Igbar asak nǝ tǝ nɛ atu ayi Arik bǝn Tetɛɛ ayou Ŋgɔŋ amɔr Yesɔ Kristi, waŋ ndi ne nǝk ta anu adidik ne kiki iyi gbarshu bǝn tsetser anu adidik akɛ Kristi. 4 Tǝ be she na gɔŋmimi, Arik aneka kuti ahria ta bǝ yi amaa nɛ nyaŋ ta bǝn Kristi, tǝ ta bǝ yi tsetser tǝna yaŋ naki mimin ne ti maa. 5 neme Arik nɛ kam ta anyak te tabǝ yi amunɔ maa nǝ ŋɔk kɛ Yesɔ Kristi, ndi nɛ nai anyak nǝ nyɛr maa bǝn iyik maa. 6 Duŋ ta bǝ gbar Arik nǝ ŋgɔŋ kǝ ta zhɔk maa, nɛ atu yi nǝk ta inǝk sha nɛ tu yi Izu maa! 7 Nǝ min maa tanǝ lu yik ita zhɔk nǝ shur azhizhi amaa, izuk shur nǝ lalɛ mɔr, ne ankɔŋ ane klik ayou Arik nǝ ta zhɔk maa 8 ndi Yesɔ ne nǝk ta kɔte nii ne mgbemgbeb bǝn izhi lɛ maa. 9 Arik nɛ na tsar ta kiki iyi yaŋ zhi mɔr ndi nɛ nai anyak, te duŋe shaga ne atu yi Kristi, 10 te abɛ nai ndi mkpaŋa te shaga ne blama, te bɛ gli kiki bɔbɔk yi gbarshu bǝn yi gɔŋmimi te tsǝge biŋ amkpa zhin ne mgbyamgbyaŋ kɛ ner zhin, ayi Kristi.

11 Nǝ miŋ kɛ Almasihu nena hria ta, ndi nɛ mene zhi tɛ nai anyak nǝ na maa. 12 Duŋ taba, fe, ndi ta ye abǝ kuti shur asusun bǝn Kristi, gbar ŋgɔŋ kɛ Arik! 13 Bǝn izhineba minyi nǝ yi aner abe Arik ndi izhin nǝ wɔ nkan lɛ yi zub, ilɛ didik kǝ men kǝŋ ndi igli itazhɔk. Izhin nǝ tanyɛmɛ bǝn Kristi, fe Arik nɛ sak zhiŋ ngir ikǝ yi akiki nɛ atu amin ndi nɛ nǝk zhin Izhu Tsetser nǝ kpa nyak maa. 14 waŋ ndi ne ta nyɛ tama te Arik atei nǝk ta igadu mɔr keŋ ndi nɛ kpa kɛ anyak sɛ nǝ mkpaŋ keŋ ndi Arik atei ta abɛ hria amaa ashur nǝ gbar asak ayi ŋgɔŋ maa.

15 Ndi kime yeme, mnǝ mbaŋ mkpaŋ ndi mnǝ wɔ kli mgbamgbaŋ min nǝ tanyɛmɛ nǝ min kɛ Ŋgɔŋ Yesɔ bǝn inyɛr min bɔbɔk bǝn abɛ zǝ Arik, 16 Nga bam ne nduŋ nyɛr Arik ne atu min ba, m shur zhin ne ben Arik muŋ 17 bǝn iben Arik ayou Ŋgɔŋ Yesɔ Kristi, Itetɛɛ ŋgɔŋ, abɛ nǝk zhin Izhu tsetser, iwaŋ ndi atei duŋ zhin bǝ yi mgbemgbeb bǝn duŋ zhin izhi Arik, tǝ zhin bǝ zhiu. 18 Nga mrib tǝ asusun amin abɛ bu tɛ yik ilaŋ maa, tǝ izhin bǝ zhi ka aye nii izhɔk asusun yiŋ ndi nɛ zhɔzhin, adudun ki amaa ayi vuŋ anu adidik ndi nɛ kpai anyak aneshir amaa, 19 ben na ta kiki ngɔngɔŋ iyi na Arik iduŋ ta vuŋ anu te tabǝ tanyɛmɛ. Mgbyamgbyaŋ yuŋɔ iyi ndi ne kam kɛ lɛ ne ndum maa kɛ klik, 20 iyiŋɛ amɛ ne na ki ne atu ayi Kristi ndi ne lɛgu ne ku te duŋu sɔŋ ne ŋɔk li maa ne gbarshu, 21 gbagbaŋ amɔ Kristi agli nǝ gbarshu bɔbɔk abǝ mgbyamgbyaŋ, iklik, bǝn aŋgɔŋgɔŋ; te naŋ kɔte sak ta kǝ ndi atei su kɛ, bane kab kǝŋe ankyak ba, bǝn kab kǝ nyɛ. 22 Fena Arik ne sagu kiki bɔbɔk ne angus akǝ Kristi tɛ na nǝgu abǝ zǝ Arik abɛ yi Ŋgɔŋ nǝ kɔte nii nɛtu kiki bɔbɔ. 23 Akabaŋkɔŋ ai kpa maa, ne shaga maa waŋ ndi awɔ kɔte nii bɔbɔk kɔte me.