1 Mplɛ cɛr kǝŋe ire bǝn Yahuza, igen ayɔu Yesɔ Kristi, ben izumen ane Yakubu.

Igar bǝn abaŋ ndi Arik ne zhɔ ba, abaŋ ndi ayime ne tanyɛme iye Arik Itetɛ bǝn ku ne angus akɛ Yesɔ Kristi:

2 Mben te ilɔ susun, isik susun bǝn tanyɛme bɛ yi imin te shaga.

3 Izhineba akpa amuŋ, Mne men wɔb te mbǝ ncɛr zhin ne atu ayi ta zhɔk mɔr bɔbɔk, Mne yik ne rɛ tem ncɛr te nek izhin lɛ te izhin bǝ tsi kli ne tanyɛme iyiŋ ndi Arik ne nek aneshir amaa mkpaŋ zhin. 4 Tǝ aner anuŋ abaŋ ndi ba ne zhi Arik ba ne mǝne tun ba ne min mɔr, aner ndi ne kyak lɛ kɛ ki didik ye Arik te abɛ akam agli ne nkuŋkɔŋ iyi na ki kiki mimin men, ndi ne kyak Yesɔ Kristi, Ŋgɔŋ amɔr zhin ndi wa ayi Ŋgɔŋ. Rɛ ikukub ilɛ kɛ Arik ne bla iyah iyiŋ ndi ne tei.

5 Mǝ wɔb te izhin bena shuzhi ne ir keŋ ndi Arik waŋ ndi ne ta aneshir ashur te gli ba arumɔ ne Masar, te ŋlɔk abaŋ ndi ne kyak tanyɛme bǝn abɔu. 6 Izhin bǝ zhi te abɛ shar ayɔu Arik abaŋ ndi ba ne gli ngɔŋ kɛ mgbyamgbyaŋ men ba te kyak sɔŋ ne amkpa amen: ne kpa ba ne atsǝtsaŋ te shur ba ne amkpa ne te ibu ngɔŋ yaŋ klɛtu, ne amkpa awaŋ ndi Arik aŋyak ba ŋub bɛr ngoŋ ndi atei te ba ŋas. 7 Shuzhi ntun yi Sodɔm bǝn yi Gomɔra, bǝn ntuntun yi nyaŋǝ, aneshire ne na ndi abɛ shar Arik ne na te nek atu amen ne iki yi abubu bǝn zǝ amba bǝn alulum, Arik ne gɔŋ ba ne lu kɛ yaŋ klɛtu.

8 Ne ankɔŋ azhiin awaŋa, aneshir abaŋa ne duŋ rimla men ne duŋ ba acɔk akpa amen ala, te kyak zǝ ilɛ kɛ Arik te yen Ŋgɔŋ ne shu. 9 Iwa ŋgɔŋ ne miŋ kɛ abɛ shar ayou Arik ine zhɔ te Makiel ne na amɛ, ne te antam maa bǝn shetan, ndi ne te atam te ai ŋɔwa atei baŋ kpa kɛ Musa, Makiel bane kyak ilɛ kɛ shetan ne taŋu tuk ba, ama adi, <<Arik abɛ tsaŋu!>> 10 Ama aner abaŋa ne lɛ lǝlɛ mimin ne atu iki yiŋ ndi ba ne zhii ba; ben iki yiŋ ndi ne zhii ne alambur tu amen ayi ndi inarum gɔŋgɔŋ, aba ne gbur ilu aku atu amen. 11 Iya iyi men! ne zǝ nkɔŋ kɛ Keinu. Ne atu aye azɔb ne zǝr ahrie ne tsin cɔk ir keŋ ndi Balaam ne nama. Ne kyak wɔ lɛ ir keŋ ndi kɔra ne na, ndi wa ne zir ba. 12 Ne yaŋ shisha men aner abaŋa ayi aner amimin ne biŋ atu ayi nyɛr men ali kili bǝn abɛ zhin. Anaga kyu akpa men ankyak. Ayi ndi akpa ayi sha ndi nguŋgu yi yaŋ ku alu. Ayi ndi kuŋkun yi yaŋ dɔ ne kus, iyiŋ ndi ne kpɔbǝ ne ririn ma atyak ahrie te ku. 13 Ayi ndi ankun nǝk ndi ashak te ŋurɔka ne shisha men ndi ngluk. Ayi ndi icinces, yi klu gɔŋri iyiŋ ndi ne nai ne atu ayi ibu iyi yaŋ klɛ tu. 14 Ayi Anuhu wa, ayi ne taŋgba ibaŋ rɛ nŋli kɛ Ademu, ire kukub ne bla ilɛ ne atu amen: <<Arik atei nyɛ bǝn abɛ bla ishar tsetser amaa tetɛk 15 te abɛ te aneshir bɔbɔk ŋas, tena nek abɛ yaŋ zǝ Arik ilalɛ men ne ankɔŋ ane yaŋ zǝ lɛ kɛ Arik, bǝn ililɛ mimin yiŋ ndi ne lɛ ne atu amaa!>>

16 Aner abaŋa anaga lɛ mumur; tena nek akpa men ilalɛ; Atsǝn ne ankɔŋ yi na kiki yi nyɛr ne asusun amen te lɛ janjak ne kpa te bɛ yik iki iyi wɔb men.

17 Ama shuzhi, akpa amuŋ, iki yiŋ ndi ane bla izhin kukub ne anu abɛ du lɛ kɛ Ŋgɔŋ Yesɔ Kristi amɔr. 18 Ne bla zhin te di, <<Ndi mkpaŋ kɛ klɛ tu te nyɛ, aneshir atei munɔru te mlak zhin, aner abaŋ ndi akyak zǝ lɛ kɛ Arik te zǝ ankɔŋ ane ikiki yi tik ayi men.>> 19 Waŋa ai aneshir abaŋ ndi aŋar aneshir, abaŋ ndi ikiki yi gɔŋmimi ibaŋ asusun amene, abɛ yaŋ Izhu Arik tsetser. 20 Ama izhineba, akpa amuŋ, izhin bǝ flu ne tanyɛme iyi asusun amin tsetser, te ben zhin Arik ne mgbyamgbyaŋ kɛ Izhu tsetser, 21 izhin bǝ tsi kli ne nyɛr yi Arik, te ŋub nyɛ Ŋgɔŋ amɔr Yesɔ Kristi ne lɔ susun maa atei nek zhin vli kɛ yaŋ klɛtu. 22 Izhin bɛ lɔ susun ne atu abɛ yaŋ tanyɛme; 23 Izhin bǝ yi abǝ gbur anuŋ gli rumɔ ne lu; bǝn anuŋ izhin bɛ lɔ susun mǝne ibiŋ ne sisik, ama izhin bǝ te shaan ne nkluŋklu men, ndi lalɛ bubu men ne cɔgǝ la.

24 Iwaŋ ndi ayi ne mgbyamgbyaŋ kɛ gli zhin te kǝr izhin bǝ zhaku ba tena nab zhin anǝk ne yaŋ lalɛ tena nyɛr ne ti kɛ ngɔŋ maa, 25 bǝn Arik ne ta ta shur ankyak, ne ŋɔk kɛ Ŋgɔŋ amɔr Yesɔ Kristi, inǝk ŋgon, ilik gli ne shu, mgbyamgbyaŋ bǝn ngɔŋ, ire kuti te gar klɛtu! Ibǝ yi amɛ.