Hezekiel 29

Nyagblɔɖi ɖe Egipte ŋu

1 Le ƒe ewolia ƒe ɣleti ewolia me, le ŋkeke wuievelia gbe la, Yehowa ƒe nya va nam be, 2 "Ame vi, trɔ mo ɖe Farao, Egipte fia ŋu, eye nàgblɔ nya ɖi ɖe eya kple Egipte katã ŋu. 3 Gblɔ nɛ be, ‘Alea Aƒetɔ Yehowa gblɔe nye esi:

" ‘Metso ɖe ŋuwò, Farao, Egipte fia,

wò lã gã wɔadã le wò tɔsisiwo me.

Egblɔna be, "Nil tɔsisi la nye tɔnye.

Nyee wɔe na ɖokuinye."

4 Matsɔ ƒu aƒo ɖe wò glã me,

eye mana wò tɔwo me lãwo nalé ɖe wò tsro ŋu,

mahe wò ado goe le wò tɔsisiwo me

kple tɔmelã siwo katã lé ɖe wò tsrokpa ŋuti.

5 Magblẽ wò ɖe gbegbe,

wò kple wò tɔwo me lãwo katã;

àdze gbadzaƒe dzi,

womafɔ wò alo atsɔ wò o.

Mawɔ wò nàzu nuɖuɖu na gbemelãwo kple dziƒoxeviwo.

6 Ekema ame siwo katã le Egipte la anya be, nyee nye Yehowa.

" ‘Ènye aƒlati na Israel ƒe aƒe la. 7 Esi wolé wò kple asi la, èŋe woƒe abɔta, eye esi woziɔ ɖe ŋuwò la, èŋee heƒo ɖe woƒe dzime.

8 " ‘Eya ta ale Aƒetɔ Yehowa gblɔe nye esi: "Mahe yi aɖe ɖe ŋuwò, wòawu wò amewo kple woƒe lãwo. 9 Egipte azu aƒedo kple gbegbe. Ekema woanya be nyee nye Yehowa."

" ‘Esi nègblɔ be, "Nil tɔsisi la nye tɔnye, nyee wɔe" ta la, 10 metso ɖe wò kple wò tɔsisiwo ŋu, eye mana Egiptenyigba nazu aƒedo kple gbegbe tso Migdol va se ɖe Aswan, va do ɖe keke Kus ƒe liƒowo dzi. 11 Amegbetɔ alo lã aɖeke ƒe afɔ magato edzi o. Ame aɖeke maganɔ afi ma o ƒe blaene sɔŋ. 12 Mana Egiptenyigba nazu aƒedo le anyigba siwo wògblẽ la dome, eye eƒe duwo azu aƒedo ƒe blaene le du siwo wogbã la dome. Makaka Egiptetɔwo ɖe dukɔwo dome, akaka wo, ahlẽ ɖe anyigbawo dzi.

13 " ‘Ke ale Aƒetɔ Yehowa gblɔe nye si. "Le ƒe blaene ƒe nuwuwu la, maƒo ƒu Egiptetɔwo tso dukɔ siwo me wokaka wo ɖo la me. 14 Magbugbɔ wo tso aboyome ava Egipte ƒe Dzigbeme, wo tɔgbuiwo ƒe anyigba dzi, eye woanye fiaɖuƒe sue aɖe le afi ma. 15 Anye fiaɖuƒe gblɔetɔ le fiaɖuƒewo dome, eye magado eɖokui ɖe dzi wu fiaɖuƒe bubuawo o. Mana wòagbɔdzɔ ale gbegbe be, magaɖu dukɔ bubuwo dzi azɔ o. 16 Egipte maganye dukɔ si ŋu Israelviwo naɖo dzi ɖo o, ke boŋ ana woaɖo ŋku woƒe nu vɔ̃ si na wotrɔ ɖe eŋu hebia kpekpeɖeŋu la dzi. Ekema woanya be nyee nye Aƒetɔ Yehowa." ’ "

17 Le ƒe blaeve-vɔ-adrelia ƒe ɣleti gbãtɔ ƒe ŋkeke gbãtɔ gbe la, Yehowa ƒe nya va nam be, 18 "Ame vi, Nebukadnezar, Babilonia fia, ho aʋa kple eƒe dukɔ ɖe Tiro ŋu; tawo katã bebe, eye abɔtawo katã ɖe bo. Ke eya kple eƒe aʋakɔ mekpɔ fetu aɖeke tso aʋahoho ɖe Tiro ŋu me o. 19 Eya ta ale Aƒetɔ Yehowa gblɔ, ‘Matsɔ Egipte ana Nebukadnezar, Babilonia fia, eye wòalɔ eƒe kesinɔnuwo adzoe. Aha nuwo le anyigba la dzi atsɔ axe fee na eƒe aʋawɔlawo. 20 Metsɔ Egipte nɛ abe fetu ene le eƒe agbagbadzedze ta, elabena nyee eya kple eƒe aʋakɔ wɔ dɔ la na.’ Aƒetɔ Yehowae gblɔe.

21 "Le ŋkeke ma dzi la, ŋusẽ aɖo Israel ƒe aƒe ŋu, eye maʋu wò nu na wò le wo dome. Ekema woanya be nyee nye Yehowa."