Walang Makakatakas sa Parusa ng Diyos
1 Sinabi ni Amos: Nakita ko ang Panginoon na nakatayo malapit sa altar at sinabi niya,
"Hampasin mo ang itaas na bahagi
ng mga haligi ng templo
upang mawasak ang bubong9:1 mawasak ang bubong: O mayanig ang pundasyon.
at nang mabagsakan ang mga tao.
Ang matitirang buhay
ay mamamatay sa digmaan.
Wala ni isa mang makakatakas
o makakaligtas.
2 Kahit magtago pa sila sa ilalim ng lupa,
o sa lugar ng mga patay,
kukunin ko pa rin sila.
Kahit na umakyat pa sila sa langit,
hihilahin ko pa rin sila pababa.
3 Kahit na magtago pa sila
sa tuktok ng Bundok ng Carmel,
hahanapin ko sila roon
at huhulihin.
Magtago man sila
sa kailaliman ng dagat,
uutusan ko ang ahas
na tuklawin sila.
4 Kahit na bihagin sila
ng kanilang mga kaaway,
ipapapatay ko pa rin sila.
Dahil desidido na akong lipulin sila
at huwag nang tulungan."
5 Kapag hinipo ng Panginoon
ng mga Hukbo ang lupa,
mayayanig ito at mag-iiyakan
ang lahat ng naninirahan dito.
Ang pagyanig nito ay parang pagtaas
at pagbaba ng tubig
sa Ilog ng Nilo sa Ehipto.
6 Ang Diyos ang gumawa
ng kanyang sariling tirahan sa langit.
At siya ang gumawa ng kalawakan
sa itaas ng lupa.
Siya rin ang nag-iipon
ng tubig-dagat sa mga alapaap
at pinauulan ito sa lupa.
Ang pangalan niyaʼy Panginoon.
7 Sinabi ng Panginoon,
"Ang turing ko sa inyo
na mga taga-Israel
ay katulad lang sa mga taga-Etiopia.9:7 taga-Etiopia: Sa literal, taga-Cush.
Totoong inilabas ko kayo
sa Ehipto,
pero inilabas ko rin
ang mga Filisteo sa Caftor9:7 Caftor: O Crete.
at ang mga Arameo9:7 Arameo: O taga-Syria. sa Kir.
8 Ako, ang Makapangyarihang Panginoon
ay nagmamanman
sa inyong makasalanang kaharian.
At lilipulin ko kayo
hanggang sa mawala kayo
nang lubusan sa mundo.
Pero may ilang matitira sa inyo
na mga lahi ni Jacob,"
sabi ng Panginoon.
9 Tingnan ninyo! Mag-uutos na ako;
sasalain ko kayong
mga mamamayan ng Israel
kasama ng lahat ng bansa,
tulad ng pagsala sa mga butil.
At kung paanong hindi nakakalusot
ang maliliit na bato sa salaan,
10 hindi rin makakalusot sa akin
ang masasama sa inyo,
kundi mamamatay silang lahat sa digmaan,
silang mga nagsasabi
na wala raw masamang mangyayari sa kanila.
Muling Itatayo ang Israel
11 "Darating ang araw
na muli kong itatayo
ang kaharian ni David
na tulad sa kubong nawasak.
Aayusin ko ito sa kanyang pagkakagiba
at itatayong muli kagaya
noong una,
12 upang masakop ng mga Israelita
ang natitirang lupain ng Edom
at ang iba pang mga bansang
sinakop nila noon,
na itinuring kong akin."
Sinabi ito ng Panginoon
at gagawin niya ang mga bagay na ito.
13 "Darating ang araw," sabi ng Panginoon,
na magiging masagana
ang kanilang ani,
hindi pa nga nila natatapos
ang pag-aani,
sinisimulan na naman
ang pag-aararo.
At hindi pa natatapos
ang pagpisa ng ubas,
panahon na naman
ng pagtatanim nito.
Kung titingnan ang napakaraming ubas
na namumunga sa mga bundok at burol,
para bang dumadaloy
ang matamis na bagong katas nito.
14 Pababalikin ko ang mga mamamayan
kong Israelita
sa kanilang lupain mula
sa pagkakabihag.9:14 Pababalikin … pagkakabihag: O Ibabalik ko ang mabuting kalagayan ng mga mamamayan kong Israelita.
"Muli nilang itatayo ang kanilang
mga nasirang bayan
at doon na sila maninirahan.
Magtatanim sila ng ubas
at iinom ng katas nito.
Magtatanim sila sa kanilang mga halamanan,
at kakainin nila ang mga bunga nito.
15 Patitirahin ko silang muli
sa lupaing ibinigay ko sa kanila
at hindi na muling paaalisin."
Ito nga ang sinabi ng Panginoon na inyong Diyos.