Deuteronomio 33

Binasbasan ni Moises ang mga Lahi ng Israel

1 Ito ang basbas na sinabi ni Moises na lingkod ng Diyos sa mga Israelita bago siya namatay. 2 Sinabi niya,

"Dumating ang Panginoon

galing sa Sinai;

nagpakita siya galing

sa Bundok ng Seir

katulad ng pagsikat ng araw.

Sumikat siya sa mga tao galing

sa Bundok ng Paran.

Dumating siyang kasama

ang libo-libong mga anghel,

at ang kanyang kanang kamay

ay may dala-dalang

naglalagablab na apoy.*33:2 Dumating … apoy: O Dumating siya galing sa Meriba sa Kades, mula sa timog, sa mga libis.

3 Tunay na minamahal ng Panginoon

ang kanyang mamamayan.

Pinoprotektahan niya

ang mga taong kanyang pinili.

Kaya siyaʼy sinusunod nila

at tinutupad ang kanyang utos.

4 Ibinigay ni Moises

sa ating mga lahi ni Jacob

ang kautusan bilang mana.

5 Naging hari ang Panginoon

ng Israel

nang magtipon ang kanilang mga pinuno

at ang kanilang mga angkan."

6 Sinabi ni Moises tungkol sa lahi ni Ruben,

"Sanaʼy hindi mawala

ang mga lahi ni Ruben

kahit kakaunti lang sila."

7 Sinabi ni Moises tungkol sa lahi ni Juda,

"O Panginoon, pakinggan po ninyo

ang paghingi ng tulong ng lahi ni Juda.

Muli po ninyo silang isama

sa ibang mga lahi ng Israel.

Ipagtanggol at tulungan ninyo sila

laban sa kanilang mga kaaway."

8 Sinabi ni Moises tungkol sa lahi ni Levi,

"O Panginoon,

ibinigay po ninyo ang Tumim at Urim*33:8 Tumim at Urim: Dalawang bagay na ginagamit sa pag-alam ng kalooban ng Diyos.

sa mga tapat ninyong lingkod

na lahi ni Levi.

Sinubukan ninyo sila sa Masa

at sinaway sa tabi ng tubig ng Meriba.

9 Nagpakita sila ng malaking katapatan

sa inyo

kaysa sa kanilang mga magulang,

mga kapatid at mga anak.

Sinunod po nila ang inyong mga utos,

at iningatan ang inyong kasunduan.

10 Tuturuan nila ang mga Israelita

ng inyong mga utos

at tuntunin kay Jacob,

at maghahandog sila ng insenso

at mga handog na sinusunog

sa inyong altar.

11 O Panginoon,

pagpalain nʼyo po sila,

at nawaʼy masiyahan kayo

sa lahat ng kanilang ginagawa.

Ibagsak po ninyo ang kanilang mga kaaway

para hindi na sila makabangon pa."

12 Sinabi ni Moises

tungkol sa lahi ni Benjamin,

"Ang minamahal ng Panginoon

ay naninirahan ng ligtas

sa piling niya.

Inilalayo niya sila sa kapahamakan

at nananahan sa kanilang kalagitnaan*33:12 kalagitnaan: O at kinakarga sa kanyang balikat.."

13 Sinabi ni Moises tungkol sa lahi ni Jose,

"Sanaʼy pagpalain ng Panginoon

ang kanilang lupain

at padalhan sila palagi ng ulan

at ng tubig mula sa ilalim ng lupa.

14 Sa tulong ng araw,

mamunga sana nang maayos

ang kanilang mga pananim

at mamunga sa tamang panahon nito.

15 Sana ang kanilang

sinaunang kabundukan

at kaburulan ay magkaroon ng mabuti

at masaganang mga bunga.

16 Umani sana nang sagana

ang kanilang lupa

dahil sa kabutihan ng Diyos

na nagpahayag sa kanila

sa naglalagablab

na mababang punongkahoy.

Manatili sana ang mga pagpapalang ito

sa lahi ni Jose

dahil nakakahigit siya

sa kanyang mga kapatid.

17 Ang kanyang lakas ay katulad ng lakas

ng batang bakang lalaki.

Ang kanyang kapangyarihan

ay katulad ng kapangyarihan

ng sungay ng mailap na baka.

Sa pamamagitan nito,

ibabagsak niya ang mga bansa

kahit na ang mga nasa malayo.

Ganito ang aking pagpapala

sa maraming mamamayan

ng Efraim at Manases."

18 Sinabi ni Moises tungkol sa lahi nila Zebulun at Isacar,

"Matutuwa ang lahi nina Zebulun at Isacar

dahil uunlad sila sa kanilang lugar.

19 Iimbitahan nila ang mga tao

na pumunta sa kanilang bundok

para maghandog

ng tamang handog sa Diyos.

Magdiriwang sila dahil sa maraming pagpapala

na nakuha nila sa dagat

at sa baybayin nito."

20 Sinabi ni Moises tungkol sa lahi ni Gad,

"Purihin ang Diyos na nagpapalawak

ng teritoryo ng lahi ni Gad!

Nabubuhay sila sa lupaing ito katulad ng leon

na handang sumunggab ng kamay

o ng ulo ng kanyang kaaway.

21 Pinili niya ang pinakamagandang lupain

na nababagay sa mga pinuno.

Kapag nagtitipon ang mga tagapamahala

ng mga mamamayan ng Israel,

sinusunod nila ang mga ipinatutupad

ng Panginoon

at ang kanyang mga tuntunin

para sa Israel."

22 Sinabi ni Moises tungkol sa lahi ni Dan,

"Ang lahi ni Dan ay katulad

ng mga batang leon na tumatalon-talon

mula sa Bashan."

23 Sinabi ni Moises tungkol sa lahi ni Neftali,

"Ang lahi ni Neftali ay sagana

sa pagpapala ng Panginoon.

Maangkin sana nila ang lupain

sa kanluran*33:23 kanluran: Ganito ang nakasulat sa tekstong Septuagint, Syriac, at Vulgate. Sa Hebreo, Jeshurun; ang ibig sabihin, matuwid. at sa timog."

24 Sinabi ni Moises tungkol sa lahi ni Asher,

"Pagpalain nawa ng Panginoon

ang lahi ni Asher

nang higit pa sa lahat ng lahi ng Israel.

Nawa ay maging masaya sa kanila

ang kapwa nila mga Israelita

at maging sagana ang kanilang langis.

25 At sanaʼy maprotektahan

ng mga tarangkahang

bakal at tanso

ang mga pintuan ng kanilang lungsod,

at sanaʼy manatili ang kanilang kadakilaan

habang silaʼy nabubuhay.

26 Walang katulad ang Diyos ng Israel.*33:26 Israel: Sa Hebreo, Jeshurun, ang ibig sabihin, matuwid.

Sa kanyang kadakilaan,

sumasakay siya sa ulap

para matulungan kayo.

Sa kanyang kadakilaan dumarating siya

mula sa langit.

27 Ang walang hanggang Diyos

ang inyong kanlungan;

palalakasin niya kayo

sa pamamagitan ng walang hanggan

niyang kapangyarihan.

Palalayasin niya

ang inyong mga kaaway

sa inyong harapan,

at iuutos niya sa inyo,

‘Lipulin ninyo sila.’

28 Kaya mamumuhay ang Israel

na malayo sa kapahamakan,

sapagkat payapa ang lahi ni Jacob

sa lupaing sagana sa trigo

at bagong alak,

at kung saan ang hamog na mula sa langit

ay nagbibigay ng tubig sa lupa.

29 Pinagpala kayo,

mga mamamayan ng Israel!

Wala kayong katulad,

isang bansang iniligtas ng Panginoon.

Ang Panginoon ang pananggalang

at tulong ninyo,

at siya ang makikipaglaban

para sa inyo.

Gagapang ang inyong mga kaaway

papunta sa inyo,

at tatapakan ninyo sila sa likod."*33:29 tatapakan ninyo sila sa likod: O tatapak-tapakan ninyo ang kanilang mga sambahan sa matataas na lugar.