1 Nao ol laen* blong Isrel* oli kam stap gud long ol ples blong olgeta, mo long namba seven manis* blong yia ya, olgeta evriwan oli kam wanples long Jerusalem.* 2 ✝Nao ya Josua we papa blong hem Jehosadak, wetem ol narafala pris, mo Serubabel we papa blong hem Sealtiel, wetem ol narafala famle blong hem, olgeta oli wokem Olta ya blong God blong yumi i gud bakegen. Oli wokem Olta ya blong oli save bonem ol sakrefaes long hem, stret olsem we oli raetem i stap long buk blong Loa* blong Moses, man ya blong God. Hae Pris* 3 ✝Nating we olgeta oli fraet long ol man we oli stap long ples ya, be oli girap, oli wokem Olta ya stret long ples we olfala Olta i bin stap long hem bifo.* olgeta oli fraet long ol man we oli stap long ples ya, oli girap, oli wokem Olta ya stret long ples we olfala Olta i bin stap long hem bifo. Mo evri dei, long moning mo long sapa, oli gohed, oli stap bonem ol sakrefaes long hem, olsem we Loa ya i talem.

4 ✝Nao olgeta oli mekem Lafet* blong Wokem ol Wansaed* Haos, mo evri dei, oli stap mekem ol sakrefaes stret olsem we Loa ya i talem. 5 ✝Mo biaen, evri dei, oli stap mekem ol sakrefaes long moning mo long sapa blong mekem wosip long Hae God. Mo oli stap mekem sakrefaes long ol Lafet blong Niumun,* mo long ol narafala dei we oli stap kam wanples blong mekem wosip long Hae God. Mo bakegen, olgeta oli stap givim ol presen i go long Hae God long gladhat blong olgeta.

6 Nating we olgeta oli no stat yet blong wokem haos* ya blong Hae God, be long namba seven manis ya, long fas dei blong hem, olgeta oli stat blong bonem ol sakrefaes ya i go long Hae God, blong mekem wosip long hem.

7 Nao long nekis yia, ol man oli givim mane blong pem ol kapenta wetem ol man blong katem ston, blong oli wokem haos* blong Hae God bakegen. Mo oli tekem ol kakae, mo ol samting blong dring, mo ol olifoel,* oli sanem i go long tufala taon ya, Taea mo Saedon, blong pem ol sida* long Lebanon blong wokem haos ya long hem, olsem we King Sirus blong Pesia i talem. Olgeta oli askem long ol man blong tufala taon ya blong oli katem ol sida ya, oli putum long solwota, oli karem i kamdaon long bigfala pasis ya long Jopa. 8 Nao long namba tu manis* blong yia ya, olgeta oli stat blong wokem haos ya blong Hae God bakegen long ples ya we olfala haos i stap long hem bifo. Olgeta we oli joen wanples blong mekem wok ya, i gat Serubabel, mo Hae Pris* ya Josua, wetem ol narafala pris, mo ol Livaet* mo ol narafala man, gogo i finisim olgeta evriwan we oli aot long Babilonia oli kambak long Jerusalem.* Ol Livaet we yia blong olgeta i kasem twanti i go antap, ol lida oli putumap olgeta blong oli bos long wok ya. 9 Long olgeta ya, Jesua wetem ol pikinini blong hem mo ol brata blong hem, mo Kadmiel wetem ol pikinini blong hem oli joen wanples blong lukaot long ol wok ya, mo ol laen blong Henadad tu oli stap givhan long olgeta. Kadmiel olgeta oli laen blong Hodavia, mo olgeta ya evriwan oli laen* blong Livae.*

10 ✝Nao taem ol man ya oli stat blong putum fandesen blong haos ya, ol pris oli putum ol spesel klos blong olgeta, nao oli holem ol trampet, oli go stanap long ples blong olgeta. Mo ol Livaet we oli laen blong Asaf oli holem ol simbol,* oli go stanap long ples blong olgeta. Nao olgeta oli stap presem Hae God, folem fasin we King Deved i bin talem long ol man long taem blong hem. 11 ✝Olgeta ya oli stap singsing, oli stap presem Hae God, mo ol narafala man oli stap joen blong talem se,

"Hae God i God blong yumi,

mo hem i gud tumas.

Oltaem bambae hem i lavem yumi

gogo i no save finis."

Olgeta evriwan oli stap singsingaot bigwan, oli stap presem Hae God, from we oli statem wok ya blong putum fandesen blong haos ya. 12 Nao long taem ya, i gat ol olfala oli stap yet we oli bin luk haos blong Hae God we i stap long ples ya bifo. Sam long olgeta oli pris, mo sam oli Livaet, mo sam oli hed blong ol famle blong olgeta. Mo taem oli luk we ol man oli stap putum fandesen blong haos ya bakegen, oli stap krae we oli krae bigwan from olfala haos ya bifo we ol enemi oli bin spolem. Be plante man oli stap singsingaot bigwan from we oli glad tumas. 13 Nao man i no save haremsave se oli stap krae from we oli harem nogud, no oli stap singsingaot from we oli glad, from we olgeta oli stap mekem bigfala noes, we man we i stap longwe i save harem.