1 Nao long sem naet ya, king i no save slip, nao i talem long ol man blong hem blong oli go tekem buk* ya we oli stap raetemdaon ol ripot blong kingdom blong hem i go long hem, oli kam ridim long hem blong hem i harem. 2 Nao oli stap ridim gogo i brok delaet, mo oli kasem wan ples we i gat ripot we i tokbaot Modekae we i faenemaot we Bigtana wetem Teres, tufala i mekem plan blong kilim king. Tufala ya, tufala i man blong wok blong king, we long taem ya, tufala i stap gad long rum blong hem. 3 Nao king i askem se, "?Ei, be mi mi mekem wanem samting long Modekae blong ona long hem from samting ya?"

Nao ol man blong wok blong hem oli talem se, "I no gat. Yu no mekem wan samting long hem yet."

4 Nao king i talem se, "Sipos i gat wan minista blong mi i stap long ples ya, bambae mitufala i save lukluk long bisnes ya."

Long taem ya, ol man blong Haman oli wokem finis ples ya blong hangem man, mo hem i jes kam insaed long yad blong haos blong king blong askem long hem blong i letem hem i hangem Modekae i ded. 5 Nao ol man blong wok blong king oli talem long hem se, "King. Praeminista ya i stap. Hem i stap wet blong luk yu."

Nao king i talem se, "Ale, yufala i go tekem hem i kam."

6 Nao Haman i kam insaed, mo king i talem long hem se, "Praeminista, i gat wan man we mi mi wantem tumas blong ona long hem. ?Yu ting se bambae mi save mekem wanem samting long hem blong leftemap nem blong hem?"

Nao Haman i stap tingting hem wan se, "?Hu man ya we king i wantem tumas blong ona long hem? !Hemia i no narafala man ya, mi nomo ya!"

7 Nao hem i talem long king se, "King. Sipos yu wantem ona long wan man olsem, 8 i gud yu talem long ol man blong wok blong yu blong oli go tekem wan longfala kot blong yu we yu stap putum oltaem, oli karem i kam, mo oli go flasem hos ya blong yu olsem we oli stap flasem oltaem, taem yu wantem wokbaot long hem. 9 Nao yu talem long wan minista blong yu we i hae moa long ol narawan, blong i putum longfala kot ya long man ya, mo i givhan long hem blong i sidaon long hos ya, nao bambae i holem rop blong hos ya, i lidim i go olbaot long bigfala ples ya blong mekem miting, long medel blong taon. Mo taem tufala i stap go, minista ya bambae i mas singaot blong talemaot se, ‘Sipos king i wantem ona long wan man, fasin we hem i stap mekem i gud we i gud. !Yufala i kam luk! !Hemia nao fasin blong hem!’ "

10 Nao king i talem long Haman se, "Ale, yu hareap, yu go tekem longfala kot ya blong mi i kam, mo yu go tekem hos blong mi i kam, nao yu go mekem ol samting ya long Modekae, laen* ya blong Isrel,* blong ona long hem. Hem i stap sidaon long ofis blong hem, long doa* blong bigfala stonwol blong yad ya. Bambae yu mekem evri samting ya long hem stret olsem we yu yu talem."

11 Nao Haman i go tekem longfala kot ya wetem hos ya i kam, nao i putum kot ya long Modekae, mo i givhan long hem blong i sidaon long hos ya. Mo hem i holem rop blong hos ya, i lidim hem i go olbaot long bigfala ples ya blong mekem miting long medel blong taon. Mo taem tufala i stap go, hem i stap singaot i stap talem se, "Sipos king i wantem ona long wan man, fasin we hem i stap mekem i gud we i gud. !Yufala i kam luk! !Hemia nao fasin blong hem!"

12 Nao biaen, Modekae i gobak long ofis blong hem, be Haman i kavremap fes blong hem from we i sem tumas, i ronwe i go long haos blong hem. 13 Hem i go stori long woman blong hem wetem olgeta fren blong hem, i talemaot evri samting ya long olgeta, we i hapen long hem. Nao woman blong hem wetem ol fren ya blong hem oli talem long hem se, "Naoia nem blong yu i stap godaon, be nem blong Modekae i stap kam antap. Man ya i wan laen blong Isrel ya. Bambae yu no save winim hem. Hem bambae i mas winim yu ya."

14 Nao taem olgeta oli stap tokbaot samting ya yet, ol man blong wok blong king oli kam, oli hareap long Haman blong tekem hem i go long kakae ya we kwin i wokem.