1,2 ✝Bifo, i gat wan king* i stap long kantri ya Pesia, we nem blong hem, King Sekses. Hem i stap rul long plante kantri, i stat long kantri ya India long is, i go kasem kantri ya Itiopia long wes. Hedkwota blong hem i stap long taon ya Susa we i kaptel blong Pesia, mo i gat wan handred twanti seven provins blong hem we hem i stap rul long olgeta.

3 Nao long namba tri yia blong hem we i stap rul, hem i mekem wan bigfala lafet blong olgeta minista blong hem wetem ol narafala haeman blong hem. Nao ol distrikejen* blong hem wetem ol haeman blong ol provins blong hem, mo ol soldia blong tufala kantri ya Pesia mo Media, olgeta evriwan oli kam long lafet ya. 4 Nao lafet ya i stap gohed gogo kasem sikis manis, mo long taem ya hem i stap soemaot ol gudgudfala samting blong ol kantri ya we hem i stap rul long hem, mo ol flas samting long haos blong hem, blong ol man ya oli luk.

5 Nao long en blong sikis manis ya, hem i mekem wan narafala lafet bakegen we olgeta man we oli stap long taon ya Susa oli kam long hem, ol haeman wetem ol man olbaot, olgeta evriwan oli kam. Hem i mekem lafet ya long yad afsaed long haos blong hem, we bigfala stonwol i goraon long hem, mo lafet ya i stap gohed gogo kasem wan fulwik. 6 Yad ya, oli flasem long ol kaliko we i blu mo ol kaliko we i waet. Oli tekem ol ring we oli wokem long silva, oli somap long ol kaliko ya long gudfala tred we i pepol, nao oli hangem long ol rop we oli fasem long ol bigfala pos we oli wokem long flas ston ya mabol.* Mo ol longfala jea* ya we oli wokem long silva mo gol, we oli stap insaed long haos, oli tekem i kam, oli putum olgeta tu insaed long yad ya. Floa blong yad ya, oli wokem long ol flas ston, sam we i waet, mo sam we i red, mo sam we i blu, mo sam we i gat ol naranarafala kala mo oli saen gud. 7 Mo ol pankin we ol man oli yusum blong dring waen long hem, oli wokem long gol, mo olgeta evriwan oli naranarafala. Mo long taem ya, king i glad nomo blong givim plante waen long ol man we i no blong tingbaot. 8 Hem i talem long ol man blong wok blong hem, se i fri long olgeta man blong oli dring olsem we oli wantem.* olsem we oli wantem, mo sipos oli no wantem dring, be i oraet nomo.

9 Nao long taem ya, Kwin Vasti we i woman blong king ya, hem tu i stap mekem wan lafet blong ol woman, long haos blong king.

10 Nao long namba seven dei blong lafet ya blong king, king ya i dring we i stap glad tumas, nao i singaot seven man blong wok* long Diksonari. blong hem oli kam we oli stap wok insaed long haos blong kwin. Nem blong olgeta ya, Mehuman, mo Bistaha, mo Habona, mo Bigtaha, mo Abagtaha, mo Setara, mo Kakas. 11 Nao king i sanem olgeta blong oli go talem long woman ya blong hem blong i putum spesel hat blong hem, mo i kam stanap long saed blong hem, from we hem i wantem blong ol haeman blong hem wetem ol man ya we oli stap long lafet ya oli luk hem, from we hem i naes tumas. 12 Mo taem ol man ya oli go talem long hem, se king i wantem luk hem, be hem i no wantem kam. Nao samting ya i mekem king i kros we i kros tumas.

13,14 Nao fasin blong king ya, taem we hem i gat problem long saed blong loa, oltaem hem i stap singaot ol advaesa blong hem we oli savegud ol bisnes blong loa, blong oli kam givhan long hem. Nao long olgeta ya i gat seven advaesa blong hem we oli haeman blong Pesia mo Media we oli hae moa long ol narafala haeman long kingdom blong hem, mo oltaem nomo hem i stap lukluk long olgeta blong oli givhan long hem. Nem blong olgeta ya, Kasnaha, mo Setara, mo Admata, mo Tasis, mo Meres, mo Masenaha, mo Memukan. Nao hem i singaot olgeta ya oli kam luk hem. 15 Nao hem i talem long olgeta se, "Olgeta. !Mi mi king, be yufala i luk! !Woman blong mi i no obei long mi! Mi sanem ol man blong mi oli go blong tekem hem i kam luk mi, be hem i no wantem. ?Olsem wanem nao? ?Loa i talem olsem wanem? ?Bambae yumi mekem wanem long hem?"

16 Nao Memukan i girap, i talem long hem wetem ol narafala haeman blong hem se, "King. Woman ya blong yu i mekem bigfala sem long yu. Be i no long yu nomo, hem i spolem ol haeman blong yu tu, wetem olgeta man long ol kantri ya we yu yu stap rul long hem. 17 Sipos ol woman olbaot long ol ples ya oli harem nius blong samting ya we hem i mekem, bambae oli no moa save ona long ol man blong olgeta. Bambae oli stap talem se, ‘!Yu luk! !King Sekses i talem long Kwin Vasti blong hem i go luk hem, be hem i no wantem!’ 18 Sipos ol woman blong ol haeman blong yu long Pesia mo Media oli harem samting ya, bambae oli stap mekem sem samting long ol man blong olgeta, nao bambae oli gat big trabol. Bambae ol woman long evri ples oli no moa save ona long ol man blong olgeta, mo ol man blong olgeta bambae oli stap kros long olgeta oltaem. 19 King, long tingting blong mi, mi ting se i moa gud yu mekem wan niufala loa, yu talemaot we bambae yu no moa wantem luk fes blong woman ya bakegen samtaem. Mo i gud yu raetemdaon loa ya i stap wetem ol narafala loa blong Pesia mo Media, blong bambae ol man oli no save jenisim bakegen samtaem. Nao bambae yu putumap wan narafala woman we i moa gud long hem i tekem ples blong hem i kam kwin. 20 Ol kantri we yu yu stap rul long hem oli plante we plante, mo sipos ol woman blong olgeta oli harem niufala loa ya blong yu, bambae oli save tinghevi long ol man blong olgeta. Nating we oli haeman no oli man olbaot, be ol woman blong olgeta bambae oli save ona gud long olgeta."

21 Nao king wetem ol haeman blong hem oli glad tumas long tingting ya, mo king i mekem olsem we Memukan i talem. 22 Hem i singaot ol sekretari blong hem oli kam, nao i talemaot toktok blong hem long olgeta, se man i mas bos long haos blong hem, mo taem hem i tok long woman blong hem, woman blong hem i mas harem hem. Nao olgeta oli tanem tok ya i go long ol lanwis blong ol provins blong hem, mo oli raetem long ol fasin blong raet blong olgeta wanwan, mo oli sanem i go long ol provins ya.