1 Nao Profet Maeka i talem se, "!Sore tumas long yufala ya we yufala i no save slip long naet, yufala i stap tingbaot ol rabis plan blong yufala gogo kasem delaet! Long moning, taem yufala i gat janis, be oltaem yufala i stap gohed blong wokem ol plan ya blong yufala. 2 Taem yufala i wantem graon blong narafala man, yufala i girap, yufala i go tekem isi nomo, mo taem yufala i wantem haos blong narafala man, yufala i girap, yufala i go tekemaot. I no gat man we i naf blong blokem yufala, blong holemtaet graon blong hem, mo haos blong hem, mo ol samting we bambae ol pikinini blong hem oli holem biaen long hem.

3 "Nao from samting ya, Hae God i talem se, ‘Mi mi stap mekem plan blong tekem bigfala trabol i kam kasem yufala, mo bambae yufala i no gat rod blong ronwe. Bambae yufala i luk we oltaem nomo, yufala i stap long trabol, nao bambae yufala i no moa save flas, olsem we yufala i stap mekem naoia. 4 Biaen long taem ya, ol man bambae oli stap jikim yufala from bigfala trabol ya we bambae i kam kasem yufala. Mo bambae oli wokem wan singsing blong talemaot trabol ya we yufala i foldaon long hem. Bambae oli save singsing se,

"!Naoia yumi kam nogud olgeta!

Olgeta graon blong yumi,

Hae God i tekemaot finis

i gowe long yumi.

Hem i givim long olgeta ya

we oli holem yumi

blong yumi go wok slef* blong olgeta."

5 " ‘Nao from samting ya, long taem ya we bambae mi givimbak ol graon ya, mo ol man blong mi oli stap seraot graon ya bakegen, bambae i no gat man i save stanap long nem blong yufala, blong karem graon blong yufala.’ "

6 Nao profet i talem se, "Yufala i stap tok strong long mi, yufala i talem se, ‘!Ei! !Yu no stap prij agens long mifala olsem! I nogud yu stap tokbaot ol samting ya oltaem. God i no save mekem mifala i sem. 7 !Yumi ol laen* blong Isrel* ya! ?Yu ting se God i save singaot* trabol i kam long yumi? ?Yu ting se tingting blong hem i save finis long yumi? !Fasin blong hem i no olsem! Oltaem hem i stap tok gud long ol man we oli stap folem stret fasin.’ "

8 Be profet i talemaot we Hae God i tok agens long olgeta, i talem se, "!Olgeta! Oltaem yufala i girap, yufala i stap faet agens long ol man blong mi, olsem we oli enemi blong yufala. Taem olgeta oli kambak long faet, we oli ting se bambae i no moa gat wan samting i save spolem olgeta, be yufala i girap, yufala i go tekemaot ol klos ya we oli stap werem, yufala i karem i blong yufala. 9 Ol woman blong ol man blong mi oli laekem ol haos blong olgeta tumas, be yufala i girap, yufala i go ronemaot olgeta i gowe. Mo i gat promes blong mi i stap long ol pikinini blong olgeta, se bambae mi blesem olgeta, be oltaem, yufala i stap blokem olgeta, blong oli no save kasem. 10 Naoia i no moa gat ples blong haed blong yufala long ples ya. !Yufala i girap! !Yufala i gowe! Ol enemi blong yufala bambae oli kam spolemgud olgeta ples ya, from ol sin ya blong yufala.

11 "Yufala i wantem tumas blong lesin long man we tok blong hem i blong giaman nomo, i blong trikim man. Man we i stap talem se, ‘Tru mi talem long yufala, bambae i no longtaem, ples blong yumi i fulap gud long waen, mo ol narafala dring olsem,’ hemia nao prija we yufala i glad long hem."

12 Nao profet i talemaot we Hae God i talem se, "Ol laen* blong Isrel.* I gat taem i stap kam, we mi bambae mi kam lukaot olgeta ya we oli kamaot biaen long yufala we i no ded long ol trabol ya. Nao bambae mi tekem olgeta evriwan oli kam wanples bakegen. Bambae mi mekem olsem man blong lukaot long sipsip, we i tekem ol sipsip blong hem oli kambak long fenis blong olgeta. Bambae ples blong yufala i stap fulap bakegen long man, olsem ples blong gudfala gras, we oltaem i gat fulap sipsip i stap long hem."

13 Nao profet i talem se, "Long taem ya, God bambae i openem rod blong ol man blong hem, we bambae i tekemaot olgeta long kantri ya longwe we bambae oli stap wok slef* long hem, i lidim olgeta i kam. Bambae oli kamaot long ol taon ya longwe, nao bambae oli fri. Hae God nomo bambae i king blong olgeta, mo hem bambae i stap lidim olgeta oli aot long ples ya, oli kam."