1 Nao Profet Maeka i talem se, "Olgeta. Yufala i lesin gud long ol tok we Hae God bambae i talem agens long yufala.

"Hae God. Plis yu kam, yu talemaot ol poen blong yu long fes blong ol bigbigfala hil ya, blong oli save harem. Yu tok strong, blong oli save kasem tok blong yu.

2 "Ol bigbigfala hil. !Yufala i stamba blong wol ya! !Yufala i stap bifo olgeta! Yufala i lesin gud long ol poen ya we Hae God bambae i talemaot. Mifala ya we i laen* blong Isrel,* mifala i man blong hem, be hem i gat poen agens long mifala, we hem i wantem talemaot."

3 Nao profet i talemaot we Hae God i talem se, "Ol man blong mi. ?Tingting blong yufala i nogud from wanem? ?Mi mi putum wanem long yufala we i hevi tumas, we yufala i harem se yufala i no save karem? !I gud yufala i traem talem long mi! 4 ✝Taem ol olfala bubu blong yufala oli stap long Ijip bifo, mi nao mi tekemaot olgeta i kam long ples ya. Olgeta oli stap wok slef* long kantri ya, be mi tekemaot olgeta, mi mekem olgeta oli fri. Moses mo Eron mo Meriam, mi nao mi sanem trifala, blong trifala i lidim olgeta i kam. 5 ✝Ol man blong mi. Yufala i mas tingbaot ol samting ya we King Balak, king blong ol man Moab bifo i wantem mekem agens long olgeta ya, mo ansa we Balam, we papa blong hem Beo i givim long hem. Mo yufala i mas tingbaot ol samting ya we i hapen long rod, long taem ya we olgeta oli aot long ples ya Sitim we oli stap long hem, oli kam stap long ples ya Gilgal. I gud yufala i tingting gud long ol samting ya bakegen, nao bambae yufala i save ol samting ya we mi mekem long taem ya blong sevem olgeta."

6 Nao Profet Maeka i talem se, "?Hae God i God blong heven, mo sipos mi mi go blong mekem wosip long hem, bambae mi karem wanem samting blong mekem sakrefaes long hem? ?Bambae mi tekem ol yang buluk we i nambawan, blong bonem blong givim long hem? 7 ?No sipos mi givim plante taosen sipsip long hem, bambae hem i save glad? ?No sipos mi stap karem fulap olifoel* i kam long hem, bambae hem i save harem gud? ?No sipos mi kilim fasbon pikinini boe blong mi, mi givim long hem, sakrefaes ya i save pemaot sin blong mi? !Nogat! 8 Ol samting we i gud blong mekem, Hae God i talemaot finis long yumi. Hem i God blong yumi, mo hem i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon."

9 Mo Profet Maeka i gohed i talem se, "Man we i waes i mas fraet long Hae God, i mas ona gud long hem. Naoia, hem i stap singaot long yumi long taon ya se, ‘Yufala evriwan we i stap hivap long taon ya, yufala i lesin gud. 10 Long ol haos blong ol man nogud, i gat ol gudgudfala samting we oli stap winim long ol fasin we i no stret. Long ol stoa blong olgeta, ol skel mo ol kap blong makem ol samting, oli blong giaman nomo. Fasin ya i nogud we i nogud, mi mi no laekem nating, mi agens long hem. 11 Mi mi no save fogivim man we i stap yusum skel we i blong giaman nomo. 12 Oltaem long ples ya, ol rijman oli stap ravem ol puaman, mo yufala evriwan i man blong giaman. !I no gat man i save trastem yufala! 13 Mo from we yufala i stap mekem sin olsem, naoia mi mi stat finis blong daonem yufala, blong mekem yufala i kam nogud. 14 Oltaem bambae yufala i kakae, be neva bambae yufala i save harem gud. !Bambae yufala i stap hanggri olwe nomo! Bambae yufala i tekem plante samting long ol narafala man, be ol samting ya bambae oli no save stap longtaem long han blong yufala. Mo ol samting we yufala i ting se yufala i stap holem, bambae mi mi spolem evriwan long taem blong faet. 15 Long yia ya, bambae yufala i planem garen, be bambae yufala i no save karem kakae blong hem i kam. Mo bambae yufala i wokem plante olifoel,* be bambae yufala i no save yusum oel ya. Mo bambae yufala i wokem plante waen, be bambae yufala i no save dring waen ya. 16 ✝Samting ya bambae i kasem yufala olsem, from we yufala i stap folem ol rabis fasin blong tufala king ya bifo, King Omri mo pikinini blong hem King Ehab. Oltaem, yufala i wantem tumas blong folem ol tingting blong tufala ya, nao from samting ya, bambae mi mi spolem yufala, nao ol man blong olgeta ples long wol bambae oli stap lukluk nogud long yufala, oli stap ting rabis nomo long yufala.* ol man blong olgeta ples long wol bambae oli stap lukluk nogud long yufala, oli stap ting rabis nomo long yufala."