1 Nao profet i talem se, "!Ol man Jerusalem! !Yumi mas tekem ol soldia blong yumi i kam wanples! !Naoia ol enemi blong yumi oli raonem yumi finis! !Oli stap mekem i nogud long king blong yumi, blong mekem hem i sem!"

2 ✝Nao Profet Maeka i talemaot we Hae God i talem se, "Yufala long taon ya Betlehem, long distrik ya Efrata long Juda,* taon ya blong yufala i wan smol taon long ol narafala taon we oli stap raonabaot long yufala, be mi bambae mi mekem we wan pikinini* bambae i kamaot long yufala, we hem bambae i rul long ol laen* blong Isrel.* Man ya, stamba blong hem, wan olfala bubu blong yufala bifo."

3 Nao profet i talem se, "Be fastaem, Hae God bambae i letem yumi i go stap long han blong ol enemi blong yumi, gogo kasem taem we woman ya we bambae i bonem pikinini ya, hem i bonem pikinini ya blong hem. Taem pikinini ya i bon, olgeta man ples blong hem we oli go stap wok slef* long narafala kantri, bambae oli kam joen wanples bakegen long ol man ples blong olgeta. 4 Taem pikinini ya i kamtru, hem bambae i lukaot gud long ol man blong hem. Hem bambae i man blong Hae God, mo bambae hem i rul long olgeta long paoa ya we Hae God bambae i givim long hem, mo bambae hem i karem nem ya King, we i nem blong Hae God nomo. Nao long taem ya, ol man blong hem bambae oli stap gud, from we olgeta man olbaot long wol bambae oli luksave we hem i gat paoa.

5,6 ✝"Yufala i stap talem se, ‘Sipos ol man Asiria oli kam long ples blong yumi, mo oli stat kam insaed long ol haos blong yumi, bambae yumi save sanem ol nambawan lida blong yumi wetem ol soldia blong olgeta, blong go faet agens long olgeta. Nao ol strong soldia ya blong yumi bambae oli winim ol man Asiria ya, oli kilim olgeta i ded.’ Be sipos ol man Asiria oli kam long ples ya, mo oli stat kam insaed long graon blong yumi, man ya bambae i blokem olgeta, mo hem bambae i mekem we yumi gat pis.* 5 nao hem bambae i mekem ol man oli gat pis. Sipos ol man Asiria oli kam long ples blong yumi, mo oli stat kam insaed long ol haos blong yumi, bambae yumi save sanem ol nambawan lida blong yumi wetem ol soldia blong olgeta, blong go faet agens long olgeta. 6 Nao ol strong soldia ya blong yumi bambae oli winim ol man Asiria ya, oli blokem olgeta blong oli no kam purumbut long graon blong yumi, mo oli sevem yumi."

7 Nao Profet Maeka i gohed i talem se, "Bambae yumi ol laen* blong Isrel,* yumi go wok slef* long ol narafala kantri, be long taem ya ol laen ya blong yumi we bambae oli stap laef yet long ol kantri ya, bambae oli stap givhan gud long ol man raonabaot long olgeta. Bambae oli olsem wota blong naet, no smosmol ren, we Hae God i stap sanem i kam blong mekem kakae i gru gud. Mo ol man ya, oltaem nomo bambae oli stap luk long God blong i givhan long olgeta, oli no save luk long man. 8 Be bambae olgeta oli stap long medel blong ol man ya olsem laeon tu, we i stap lukaot anamol long bus no sipsip long open ples, blong i kakae. Taem laeon olsem i faenem sipsip, bambae i jam long hem wantaem, i terem long ol smosmol pis, mo i no gat man i save blokem. 9 Long fasin ya nao, bambae olgeta ya oli go mekem faet long ol enemi blong olgeta, we bambae oli winim olgeta, oli spolem olgeta evriwan."

10 Nao profet i talemaot we Hae God i talem se, "Long taem ya, bambae mi mi tekemaot ol hos blong yufala, mo bambae mi spolem ol kat blong faet blong yufala, blong tingting blong yufala i no moa stap long ol samting ya. 11 Bambae mi spolem ol bigbigfala taon long kantri blong yufala, mo bambae mi brekemdaon ol strong ples blong haed blong yufala. 12 Bambae mi tekemaot ol tabu ston blong yufala we yufala i stap trastem olgeta, mo bambae mi kilim ol kleva ya we oli stap talemaot ol samting we bambae i hapen long fiuja, gogo i no moa gat wan i stap. 13 Ol aedol blong yufala mo ol longlongfala ston ya we yufala i stanemap blong mekem wosip long olgeta, bambae mi spolem olgeta, blong yufala i no moa save mekem wosip long ol samting ya bakegen we yufala nomo i wokem. 14 Bambae mi brekemdaon ol pija blong woman god ya Asera* we oli stap olbaot long kantri blong yufala, mo bambae mi spolem ol taon blong yufala. 15 Mo bambae mi panisim ol man blong ol kantri raonabaot long yufala, we oli stap mekem mi mi kros tumas from we oli no save obei long mi."