1 Nao ol lida oli mekem hom blong olgeta long Jerusalem*, taon ya we i tabu, i ples blong mekem wosip long God, mo ol narafala man oli yusum ol spesel ston* blong faenemaot long God, se wanem famle we bambae oli stap long taon ya. Long evri ten famle, oli jusumaot wan famle se oli mas stap long taon ya, mo naen famle oli save stap nomo long ol ples blong olgeta. 2 Be i gat sam famle we ol man oli no jusumaot olgeta, oli glad nomo blong stap long taon ya, mo ol man oli glad tumas long olgeta, oli stap leftemap nem blong olgeta from. 3 ✝Mo ol narafala man, we sam oli laen* blong Juda*, mo sam oli laen blong Benjamin*, mo sam oli pris*, mo sam oli Livaet*, mo sam oli man blong wok long haos* blong God, mo sam oli laen blong ol man blong wok blong King Solomon bifo, olgeta ya evriwan oli stap long graon blong olgeta nomo long ol ples blong olgeta olbaot long distrik ya Juda.

Ol lida blong distrik ya Juda*, we oli kam stap long Jerusalem, nem blong olgeta i olsem.

4-6 Olgeta we oli laen blong Juda, i gat ol laen blong Ataea, we papa blong hem Usia mo bubu blong hem Sekaraea, mo i gat ol laen blong Mahasea, we papa blong hem Baruk mo bubu blong hem Kolose.

Ataea ya, ol olfala bubu blong hem bifo, i gat Amaria, mo Sefatia, mo Mahalalel, mo olgeta ya evriwan oli kamaot biaen long Peres, we papa blong hem Juda. Olgeta laen blong Peres we oli stap long taon ya, namba blong olgeta i kasem fo handred sikisti eit man evriwan, mo olgeta oli nambawan man blong faet.

Mo Mahasea, ol olfala bubu blong hem bifo, i gat Hasaea, mo Adaea, mo Joearib, mo Sekaraea, mo olgeta ya evriwan oli kamaot biaen long Sela, we papa blong hem Juda.

7-9 Mo ol laen blong Benjamin we oli stap long Jerusalem, i gat ol laen blong Salu, we papa blong hem Mesulam mo bubu blong hem Joed, mo ol laen blong Gabae, mo ol laen blong Salae, we tufala i famle wetem Salu.

Man ya Joel we papa blong hem Sikri, hem i lida blong olgeta ya, mo Juda we papa blong hem Hasenua, hem i nambatu haeman long taon ya.

Salu ya, ol olfala bubu blong hem bifo, i gat Pedaea, mo Kolaea, mo Mahasea, mo Itiel, mo Jesaea.

Olgeta laen ya blong Benjamin we oli stap long taon ya, namba blong olgeta i kasem naen handred twanti eit man evriwan.

10 Ol pris we oli stap long Jerusalem, i gat ol laen blong Jakin, mo ol laen blong Jedaea we papa blong hem Joearib, 11-13 mo ol laen blong Seraea, we papa blong hem Hilkia, mo bubu blong hem Mesulam, mo ol laen blong Adaea, we papa blong hem Jeroham, mo bubu blong hem Pelalia, mo ol laen blong Amasae, we papa blong hem Asarel, mo bubu blong hem Ahasae.

Olgeta long trifala laen blong trifala pris ya Jakin mo Jedaea mo Seraea oli stap wok long haos blong God, mo olgeta evriwan i kasem eit handred twanti tu man.

Pris ya Seraea, ol olfala bubu blong hem bifo, i gat Jadok, mo Meraeot, mo Ahitub, we hem i wan hae pris* bifo.

Mo pris ya Adaea, ol olfala bubu blong hem bifo, i gat Amji, mo Sekaraea, mo Pasuru, mo Malkia, mo long ol laen blong hem, i gat tu handred foti tu man we oli hed blong ol famle blong olgeta.

Mo pris ya Amasae, ol olfala bubu blong hem bifo, i gat Mesilemot, mo Hime, 14 mo long ol laen blong hem, i gat wan handred twanti eit man we oli nambawan soldia, we lida blong olgeta hem i wan haeman.

15 Mo olgeta Livaet we oli stap long Jerusalem, i gat ol laen blong Semaea, we papa blong hem Hasub, mo bubu blong hem Asrikam, mo ol laen blong Sabetae, mo ol laen blong Josabad, mo ol laen blong Matania, we papa blong hem Mikaha mo bubu blong hem Sabdi, mo ol laen blong Bakbukia, mo ol laen blong Abda, we papa blong hem Samua, mo bubu blong hem Galal.

Semaea ya, ol olfala bubu blong hem bifo, i gat Hasabia, mo Buni.

16 Mo Sabetae mo Josabad, tufala i lida blong ol Livaet we oli lukaot long ol wok afsaed long haos blong God.

17 Mo Matania ya, hem i laen blong Asaf, mo hem i stap lidim kwaea long haos* blong God, blong singim prea blong talem tangkiu long hem. Mo Bakbukia, hem i nambatu blong hem.

Mo Abda ya, hem i laen blong Jedutun.

18 Olgeta Livaet ya we oli stap long taon ya, olgeta evriwan i kasem tu handred eiti fo man.

19 Ol gad blong haos blong God tu oli Livaet, mo long olgeta ya, i gat ol laen blong Akub, mo ol laen blong Talmon, we olgeta evriwan i kasem wan handred seventi tu man.

20 Be ol narafala man, we sam oli laen blong Juda, mo sam oli laen blong Benjamin, mo sam oli pris, mo sam oli Livaet, olgeta ya evriwan oli stap long graon blong olgeta nomo long ol ples blong olgeta olbaot long distrik ya Juda.

21 Mo ol man blong wok long haos blong God oli stap long haf blong Jerusalem we nem blong hem Ofel, mo tufala man ya Jiha mo Gispa, tufala i bos blong olgeta.

22 Mo lida blong ol Livaet we oli stap long taon ya, nem blong hem Usi, we papa blong hem Bani mo bubu blong hem Hasabia. Usi ya, ol olfala bubu blong hem bifo i gat Matania, mo Mikaha, mo Asaf ya bifo. Mo olgeta ya we oli kamaot biaen long Asaf oli man blong lukaot long singsing long taem blong wosip long haos blong God. 23 Mo i gat ol rul we King Deved i putum bifo, we i makem fasin we ol laen blong Asaf ya oli mas lidim singsing long haos blong God, we wan laen i wok wan dei, wan laen i wok wan dei.

24 Mo Petahia we papa blong hem Mesesabel, hem i laen blong Sera we papa blong hem Juda, mo oltaem, hem i stap go stanap long fes blong king blong Pesia long nem blong ol laen blong Isrel*, blong toktok long saed blong olgeta.

25 Nao long taem ya, plante man oli stap long taon blong olgeta no long vilej blong olgeta, we i klosap long graon blong olgeta. Ol laen* blong Juda* oli stap long ol taon olsem. I gat Kiriataba, mo Dibon, mo Jekabjehel mo ol vilej klosap long trifala, 26 mo Jesua, mo Molada, mo Betpelet, 27 mo Hajasual, mo Bereseba, mo ol vilej klosap long hem, 28 mo Jiklag, mo Mekona, mo ol vilej klosap long hem, 29 mo Enrimon, mo Jora, mo Jamut, 30 mo Sanoa, mo Adulam, mo ol vilej klosap long olgeta, mo Lakis, wetem ol graon klosap long hem, mo Aseka, mo ol vilej klosap long hem. Hemia i min se ples we ol laen blong Juda oli stap long hem, hem i stat long taon ya Bereseba* long saot, i go kasem Krik ya Hinom long not.

31 Mo ol laen blong Benjamin* oli stap long ol taon olsem. I gat Geba, mo Mikmas, mo Eae, mo Betel, mo ol vilej klosap long hem, 32 mo Anatot, mo Nob, mo Anania, 33 mo Haso, mo Rama, mo Gitaem, 34 mo Hadid, mo Jeboeim, mo Nebalat, 35 mo Lod, mo Ono. Mo sam long olgeta oli stap long krik ya long medel blong ol hil, we i ples blong ol man we oli waes blong wok long han blong olgeta. 36 Mo sam long ol Livaet* we ol bubu blong olgeta bifo oli bin stap long distrik ya Juda long taem ya we oli no go wok slef* long Babilonia yet, ol lida blong olgeta oli putum olgeta oli go stap wetem ol laen ya blong Benjamin.