1 Nao Nehemaea i talem se, "Biaen long taem ya, i gat plante man mo woman oli stap tok agens long ol man ples blong olgeta we oli laen blong olgeta nomo. 2 Sam long olgeta oli kam talem long mi se, ‘Nehemaea. Mifala i trabol. Mifala i gat plante pikinini, be sipos mifala i no tekem kakae samples, bambae mifala i ded ya.’

3 "Mo sam long olgeta oli talem se, ‘Mifala tu i trabol. Ol graon blong mifala wetem ol plantesen blong grep* blong mifala, mo ol haos blong mifala, mifala i putum olgeta evriwan long han blong ol man ples blong yumi, blong mifala i save kaon long olgeta blong pem kakae blong mifala, blong mifala i no ded long hanggri.’

4 "Mo sam oli talem se, ‘Mifala tu i kaon long ol man ples blong yumi, blong mifala i save pem takis ya we king blong Pesia i putum long ol graon mo ol plantesen blong grep blong mifala.* 5 Be yumi evriwan ya i laen* blong Isrel.* Mo long fes blong mifala, ol pikinini blong mifala oli sem mak nomo long ol pikinini blong olgeta. Be from we mifala i sot long kakae, mifala i mas salem ol pikinini ya blong mifala oli kam slef.* Sam long ol dota blong mifala, mifala i salem olgeta finis oli kam slef. Mo naoia, mifala i no moa gat paoa blong mekem wan samting, from we ol graon blong mifala wetem ol plantesen blong grep blong mifala, ol man ples ya blong yumi oli tekemaot long mifala finis.’

6 "Nao taem mi harem ol tok ya blong olgeta, mi kros we mi kros from fasin nogud ya, 7 ✝nao mi harem se mi mas stretem trabol ya. Ale, mi girap, mi tok long ol lida blong mifala wetem ol haeman blong mifala, mi talem se, ‘Yufala i stap spolemgud ol brata blong yumi ya long fasin ya we yufala i stap mekem olgeta oli pem bigfala intres long yufala.’

"Nao mi singaot ol man, blong oli kam long wan bigfala miting blong stretem trabol ya. 8 Nao mi talem se, ‘!Olgeta! Bifo, ol laen blong yumi oli kasem hadtaem we i strong tumas, nao oli salem olgeta i kam slef blong ol man afsaed, mo yumi ya, yumi stap traehad yet blong pemaot sam long olgeta oli fri, blong oli kambak. Be naoia, yufala i girap, yufala i stap mekem ol brata blong yumi oli stap salem olgeta i kam slef blong yufala we laen blong yumi evriwan i kamaot long wan man nomo.’ Nao ol lida ya oli stap kwaet, oli no save tok.

9 "Nao mi talem se, ‘!Fasin ya we yufala i stap mekem i no stret nating! I stret blong yufala i tinghevi long God, yufala i obei long hem mo yufala i mekem ol gudfala fasin, be yufala i no mekem. Sipos yufala i bin mekem olsem, ol hiten man ya we oli enemi blong yumi bambae oli no moa save jikim yumi. 10 Mi wetem ol brata blong mi, mo ol man blong wok blong mi, mifala tu i stap givim mane mo kakae i go long ol man ples blong yumi blong oli yusum fastaem, biaen oli save pembak. Be i nogud yumi mekem olgeta oli pembak ol samting ya long yumi, i moa gud yumi fogetem. 11 Olgeta kaon ya blong olgeta we oli mekem long yumi, long mane, mo long kakae, mo long waen, mo long olifoel*, yumi mas ravemaot olgeta. Mo ol garen, mo ol plantesen blong grep, mo ol plantesen blong olif, mo ol haos we yufala i tekemaot long olgeta, tede nomo yufala i mas givimbak long olgeta.’

12 "Nao ol lida ya oli talem se, ‘Bambae mifala i mekem olsem we yu yu talem. Bambae mifala i givim olting ya i gobak long olgeta, mo bambae mifala i no mekem olgeta oli pem ol kaon ya.’

"Nao mi singaot ol pris* oli kam insaed, mo long fes blong olgeta, mi mekem we ol lida ya oli mekem strong tok, se bambae oli holem promes ya we oli jes mekem. 13 Nao mi tekemaot kaliko* we mi stap fasem klos blong mi long hem olsem strap, mi seksekem i go long olgeta, mo mi talem se, ‘Sipos yufala i no holem promes ya we yufala i jes mekem naoia, God bambae i seksekem yufala olsem. Hem bambae i tekemaot ol haos blong yufala, wetem ol narafala samting we yufala i gat, we bambae i no livim wan samting nating i stap.’

"Nao olgeta evriwan we oli stap oli talem se, ‘!Amen!’ mo oli presem God. Mo ol lida ya oli holem promes ya blong olgeta."

14 Nao Nehemaea i talem se, "Mo long taem ya we King Ataksekses i stap rul, i stat long namba twanti yia blong hem, go kasem namba toti tu yia blong hem, mi mi distrikejen* blong Juda.* Mo long ol twelef yia ya, ol samting ya we mi mi gat raet blong kasem from we mi distrikejen, be mi mi no tekemaot long ol man, se mi wetem ol brata blong mi, mifala i yusum. 15 Ol distrikejen we oli wok fastaem long mi oli stap mekem i strong tumas long ol man ples blong yumi. Evri dei, oli stap tekem ol kakae mo waen long ol man, mo samwe long twanti taosen vatu* antap long hem. Mo ol man blong wok blong olgeta tu oli stap spolem ol man ples blong yumi. Be mi mi mekem i narafala, from we mi stap tinghevi long God, mo mi stap obei long hem. 16 Oltaem mi stap hadwok tumas long wan samting nomo, se stonwol ya i mas gud bakegen, mo mi no tingbaot nating se bambae mi pem wan pis graon blong mi. Mo olgeta man blong wok blong mi oli stap joen wetem mi blong wokem stonwol ya bakegen.

17 "I gat wan handred fifti man Juda we sam oli haeman we oltaem oli stap kakae wetem mi. Mo oltaem, taem ol man blong ol narafala kantri klosap long Juda oli kam blong luk mi, olgeta tu oli stap kakae wetem mi. 18 Evri dei, mi stap kilim wan buluk, mo sikis sipsip we i beswan, mo plante faol, blong mifala i kakae. Mo oltaem, long evri ten dei, mi stap givim plante waen long ol man ya blong oli no sot. Mi mi gat raet blong kasem mane long ol man ples blong yumi blong pem ol kakae ya, be mi no wantem askem mane long olgeta, from we mi save se i strong tumas long olgeta blong oli faenem.

19 "Mo prea blong mi we God blong mi bambae i tingbaot mi, i mekem i gud long mi from ol samting ya we mi mi mekem long ol man ya."