1 ✝Ol tok blong buk ya, Hae God i stap givim long Profet Hosea we papa blong hem Beheri, long taem blong King Usia, mo long taem blong King Jotam, mo long taem blong King Ahas, mo long taem blong King Hesekia, we olgeta i king long Juda,* mo long taem ya we King Jeroboam we papa blong hem King Jehoas, hem i king long Isrel.*

2 Long taem ya we Hae God i stat blong talem ol tok blong hem long Profet Hosea blong i go talemaot long ol man ples blong hem, fas tok we hem i talem long hem, i olsem. Hem i talem se, "Hosea. Yu go, yu mared. Be taem yutufala i mared finis, bambae woman ya blong yu i girap, i go stap mekem i krangke wetem ol narafala man.* Mo ol pikinini blong yutufala, fasin blong olgeta bambae i sem mak nomo olsem fasin blong mama blong olgeta. Yu mas tekem wan woman olsem, from we ol man ples blong yu oli lego mi, oli biaen long ol narafala god."

3 Nao profet i go tekem wan woman, nem blong hem Goma, we papa blong hem Diblaem, nao i mared long hem. Tufala i stap gogo, nao hem i bonem fasbon pikinini blong tufala we i boe. 4,5 ✝Nao Hae God i talem long profet se, "Yu putum nem blong pikinini ya, se Jisrehel, from we i no longtaem, mi bambae mi givim panis long King Jeroboam ya we i king blong yufala. Bambae mi mi mekem olsem, from we bubu blong hem King Jehu we i king blong Isrel* bifo, hem i kilim* tumas man oli ded long bigfala levelples ya Jisrehel long medel blong ol hil. Olgeta we oli laen blong King Jehu ya, mi bambae mi kilim olgeta evriwan oli ded, nao kantri ya Isrel bambae i no moa gat king long hem. Mo long ples ya Jisrehel, bambae mi spolem ol soldia blong yufala tu."

6 Nao biaen, Goma i bonem wan gel. Nao Hae God i talem long profet se, "Yu putum nem blong gel ya, se "No Lavem", from we i no longtaem bambae mi soemaot long ol man ples blong yu we mi no moa lavem olgeta, mo mi mi no save fogivim olgeta from ol sin blong olgeta. 7 Be ol man Juda* ya, bambae mi soemaot long olgeta we mi mi lavem olgeta tumas. Mi Hae God, mi God blong olgeta, mo mi bambae mi sevem olgeta, mi lukaot gud long olgeta. Be bambae mi no save yusum man blong faet, no wan samting blong faet olsem naef, no bonara, no hos mo man blong faet we i ron long hos, blong sevem olgeta. Mi nomo bambae mi sevem olgeta."

8 Taem dota ya blong tufala i livim titi finis, mama blong hem i gat bel bakegen, nao i bonem wan boe bakegen. 9 Nao Hae God i talem long profet se, "Bambae yu putum nem blong boe ya, se "I no Man blong Mi", from we ol man ples ya blong yu oli no moa man blong mi, mo mi mi no moa God blong olgeta."

10 ✝Nao Profet Hosea i talem long ol man Isrel* se, "Olgeta. Bambae yumi kam plante we plante, olsem sanbij long solwota, we man i no save kaontem. Naoia Hae God i stap talem se, ‘Yufala i no moa man blong mi,’ be i gat dei i stap kam we bambae hem i talem long yumi se, ‘Mi mi God we mi laef, mi stap we mi stap, mo yufala i pikinini blong mi.’ 11 Long taem ya, ol man Juda* wetem yumi ol man Isrel bambae yumi evriwan i joen wanples bakegen, nao yumi save jusumaot wan lida nomo blong yumi. Mo ples blong yumi bambae i kam gud bakegen. Dei ya blong Jisrehel hem i wan dei we God bambae i mekem i gud tumas long plante man blong hem.