1 Long taem ya, bambae yumi putum nem blong ol brata blong yumi, se ‘Man blong God’, mo nem blong ol sista blong yumi, se ‘Masta* blong yumi i gat sore’."

2 Nao profet i talemaot we Hae God i talem se, "Ol pikinini blong mi. Yufala i mas krae strong long mama blong yufala blong i jenisim fasin blong hem. Nating we hem i no moa woman blong mi, mo mi tu mi no moa man blong hem, be yufala i mas krae strong long hem blong i lego ol rabis fasin ya blong hem, we i stap slip wetem ol narafala man, mo i stap salem hem olbaot. 3 Sipos hem i no lego fasin ya blong hem, bambae mi mi terem olgeta klos blong hem, nao bambae hem i stap neked nomo olsem bifo, taem we hem i jes bon. Mo bambae mi letem hem i kam olsem wan draeples we i no gat wan samting nating long hem, mo bambae i stap tosta gogo i ded from. 4,5 Bambae mi mi no gat sore long ol narafala pikinini ya we hem i stap bonem, from we mama blong olgeta i woman blong rod, we i no gat sem nating. Hem i stap talem se, ‘Bambae mi mi go luk olgeta ya we oli laekem mi. Olgeta ya oli stap givim kakae mo wota long mi, mo oli stap givim wul mo kaliko, mo olifoel,* mo waen tu long mi.’

6 "Bambae mi tekem ol ropnil, mi wokem wan fenis i goraon long woman ya, mo bambae mi wokem wan bigfala stonwol i goraon long hem blong blokem hem, blong i no ronwe. 7 Sipos hem i wantem ronwe i go long ol man we hem i stap go wetem olgeta, be bambae hem i no save faenem olgeta. Bambae hem i go long evri ples blong traem lukaot olgeta, be neva bambae i save faenem olgeta. Nao biaen, bambae hem i talem se, ‘Naoia bambae mi gobak long stret man blong mi. Laef ya bifo we mi stap wetem hem, i moa gud i winim laef ya we mi stap long hem naoia.’

8 "Hem i tok olsem, be neva hem i luksave se ol kakae, mo waen, mo olifoel blong hem, mi nomo mi stap givim olgeta long hem. Mo ol silva, mo gol ya we hem i stap yusum blong mekem wosip long god ya Bal,* be neva hem i save talemaot we mi nomo mi stap givim olgeta long hem. 9 Be long taem blong tekemaot kakae long garen, mi bambae mi tekembak ol kakae blong garen blong hem, wetem ol frut blong plantesen blong grep* blong hem we mi stap givim long hem. Mo ol wul mo linen* ya we hem i stap yusum blong kavremap hem long hem, bambae mi mi tekemaot olgeta evriwan i gowe long hem. 10 Bambae mi mi tekemaot olgeta klos blong hem long fes blong ol man ya we hem i stap go wetem olgeta, mo bambae i no gat man i save tekemaot hem bakegen long paoa blong mi. 11 Oltaem hem i stap mekem ol lafet* we i blong mekem evri yia, mo i stap mekem ol Lafet blong Niumun, mo blong Sabat* dei, mo ol narafala lafet olsem blong mekem wosip, be olgeta lafet ya, mi bambae mi blokem evriwan. 12 Ol figtri* blong hem, mo ol plantesen blong grep blong hem, we hem i stap talem se ol man ya oli givim long hem from we hem i stap givhan long olgeta, mi bambae mi spolem olgeta evriwan. Olgeta plantesen ya blong hem, bambae mi mekem i kam olsem draeples, mo ol wael anamol bambae oli spolem olgeta. 13 Bambae mi givim panis long hem from we bifo hem i fogetem mi, nao i stap go bonem insens* long god ya Bal blong mekem sakrefaes long hem. Mo oltaem hem i stap putum ol gudgudfala samting blong flasem hem, nao i stap go biaen long ol man blong hem. Mi mi Hae God, mo hemia tok blong mi."

14 Nao Profet Hosea i talemaot we Hae God i talem se, "Naoia bambae mi tekem woman ya blong mi i gobak long draeples bakegen. Long ples ya, bambae mi save toktok gud long hem, blong pulum tingting blong hem i kambak long mi bakegen. 15 ✝Ol plantesen blong grep* ya blong hem, we mi tekemaot long hem bifo, bambae mi givim i gobak long hem bakegen. Mo ol rabis fasin ya blong hem we i olsem rod we i pastru long medel blong ol hil, we i ples blong kasem trabol, bambae mi mekem i kam olsem get blong gudfala rod, we i ples blong mekem tingting i strong blong kasem ol gudgudfala samting bakegen. Nao sipos mi talem sam samting long hem, hem bambae i save lesin gud long mi olsem we hem i stap lesin long mi bifo, long taem ya we hem i yangfala yet, mo hem i aot long Ijip i kam. 16 Nao bambae hem i save singaot mi, se ‘Yu yu man blong mi’. Bambae hem i no moa save singaot mi long nem blong god ya Bal,* se ‘Yu yu Bal* blong mi’, olsem we i stap mekem fastaem. 17 Bambae mi blokem hem blong hem i no moa save talem nem blong god ya Bal bakegen samtaem.

18 "Ol man blong mi. Long taem ya, mi bambae mi mekem promes wetem ol wael anamol, mo ol pijin, blong oli no moa kam spolem yufala. Mo olgeta samting blong faet, we ol man i stap yusum long ples ya, mi bambae mi spolem evriwan. Bambae mi mekem yufala i stap gud, mo yufala i gat pis long ples blong yufala.

19 "Ol man Isrel.*

Mi bambae mi save singaot yufala,

se ‘Yufala i woman blong mi’.

Oltaem tingting blong mi

bambae i stap strong long yufala,

bambae mi no save lego yufala

samtaem.

Mi bambae mi soemaot long yufala

we oltaem mi mi lavem yufala tumas,

mo mi gat sore long yufala.

Bambae yufala i woman blong mi olwe,

gogo i no save finis.

20 Promes* ya we mi mekem wetem yufala,

bambae mi holemstrong,

mi no save brekem.

Mo bambae yufala i savegud mi,

yufala i save talemaot

we mi mi Hae God blong yufala.

21,22 Long taem ya,

taem yufala i prea long mi,

mi bambae mi save harem yufala.

Nao mi bambae mi sanem ren i kam,

mo ol garen blong yufala

bambae i karem plante kakae,

mo bambae yufala i kasem plante waen mo oel

long ol plantesen blong yufala.

23 ✝Bambae mi mekem

yufala i stap gud long ples ya,

we yufala i gat plante samting.

Bifo, mi mi stap singaot yufala,

se ‘No Lavem’,

be bambae mi soemaot long yufala

we mi lavem yufala tumas.

Fastaem yufala i gat nem ya,

se ‘I No Man Blong Mi’,

be bambae mi mi talem long yufala se,

‘Yufala i man blong mi.’

Mo bambae yufala i save talem long mi se,

‘Yu yu God blong mifala.’ "