1 ✝Mo Profet Sekaraea i talem se, "Nao mi luk wan vison* bakegen we Hae God i soemaot long mi. Long vison ya, mi luk Hae Pris* ya Josua i stap stanap long fes blong enjel blong Hae God. Mo Setan* tu i stap stanap long ples ya, long raet saed blong hae pris, i stap rere blong talemaot sam poen agens long hem. 2 ✝Nao enjel blong Hae God i talem long Setan* se, ‘Setan.* i talem long Setan se, ‘Setan.’ Hae God bambae i jajem yu se yu mas ded. Hem i laekem Jerusalem* ya tumas. Hem nao bambae i jajem yu se yu mas ded. Man ya hem i olsem wan stik we i stap insaed long faea, be wan man i tekemaot kwiktaem, nao i no bon.’

3 "Hae pris ya i stap stanap, mo klos blong hem i doti we i doti. 4 Nao enjel ya i talem long ol enjel we oli stap stanap long fes blong hem se, ‘Yufala i tekemaot rabis klos ya i gowe long hem.’ Nao hem i talem long hae pris se, ‘Mi mi tekemaot ol sin blong yu finis. Naoia bambae mi givim niufala klos long yu, blong yu yu werem.’

5 "Mo hem i talem se, ‘Yufala i tekem wan niufala kaliko, yufala i putum i goraon long hed blong hem.’* talem se, ‘Yufala i tekem wan niufala kaliko, yufala i putum i goraon long hed blong hem.’ Mo olgeta ya oli mekem olsem, mo oli tekem ol niufala klos oli putum long hae pris, mo enjel ya blong Hae God i stap stanap wetem olgeta.

6 "Nao enjel ya i talemaot long hae pris 7 we Hae God we i gat olgeta paoa i talem se, ‘Sipos yu obei long ol Loa* blong mi, mo yu mekem ol samting we mi mi bin givim long yu blong mekem, bambae mi save letem long yu blong yu lukaot long haos* blong mi, mo long olgeta yad blong hem. Mo yu bambae yu gat raet blong kam stanap long fes blong mi, nao bambae mi stap ansa long ol prea blong yu, olsem we mi stap harem ol prea blong ol enjel ya we oli stap oltaem long fes blong mi. 8 ✝Josua, yu yu hae pris, mo yu mas lesin gud long mi. Mo yufala ol pris we yufala i stap wok aninit long hem, yufala tu i mas lesin gud long mi. Yufala evriwan ya i olsem pija blong ol gudgudfala samting we bambae oli kamtru. Bambae mi mi soemaot man ya blong wok blong mi long yufala, we nem blong hem, "Han Blong Tri". 9 Mi mi putum wan ston finis i stap daon long fes blong hae pris. Ston ya i gat seven saed blong hem, mo bambae mi raetem wan tok long hem, nao long wan dei nomo, mi bambae mi tekemaot olgeta sin blong ol man blong kantri ya. 10 ✝Taem dei ya i kamtru, bambae yufala wanwan i save singaot ol fren blong yufala oli kam sidaon wetem yufala aninit long ol figtri* blong yufala, mo ol grep* blong yufala, we yufala evriwan i glad, yufala i stap gud, yufala i gat pis.’ "