SEKARAEA 5

Namba sikis vison Profet Sekaraea i luk wan buk we i flae i kam long hem

1 Mo Profet Sekaraea i talem se, "Nao mi mi luk wan vison* bakegen, mo long vison ya mi luk wan buk* i stap flae i kam. 2 Nao enjel ya we i bin toktok wetem mi, i askem long mi se, ‘?Yu stap lukluk wanem ya?’

"Mo mi talem long hem se, ‘Mi mi luk wan buk ya, i stap flae i kam. Longfala blong hem i kasem naen meta, mo bigfala blong hem i kasem fo meta.’

3 "Nao hem i talem long mi se, ‘Buk ya i gat ol toktok i stap long hem, we i blong singaot* trabol i kam long olgeta ples long kantri ya. Long wan saed blong hem, i gat ol tok we i talem se God bambae i ronemaot ol man blong stil oli gowe long ples ya. Mo long narasaed i gat ol tok we i talemaot se hem i agensem olgeta man we oli mekem strong promes blong talem trutok, be oli giaman nomo, nao from samting ya, hem bambae i ronemaot olgeta ya tu oli gowe long ples ya. 4 Hae God i gat olgeta paoa, mo hem i talem se hem bambae i letem trabol i kam kasem olgeta man ya blong stil, mo i kasem olgeta we oli stap talem strong promes long nem blong hem, be oli stap giaman nomo. Trabol ya bambae i spolem olgeta haos blong olgeta, gogo ol haos ya oli kam nogud olgeta.’ "

Namba seven vison Profet Sekaraea i luk wan woman we i stap sidaon insaed long wan basket

5 Nao Profet Sekaraea i talem se, "Mi mi luk wan vison* bakegen, mo long vison ya mi luk we enjel ya i kamtru long mi bakegen, i talem long mi se, ‘!Ei! !Yu luk! I gat wan samting bakegen ya i stap kam!’

6 "Mo mi askem long hem se, ‘?Wanem samting ya?’

"Hem i talem long mi se, ‘Wan bigfala basket ya i stap kam. Hemia i saen blong ol sin blong olgeta ples long kantri ya.’ "

7 "Nao mi luk we basket ya i gat lid blong hem we oli wokem long led. Mo taem mi stap lukluk yet, mi luk we lid blong hem i open. Nao mi luk we i gat wan woman i stap sidaon insaed. 8 Mo enjel ya i talem se, ‘Woman ya i saen blong olgeta rabis fasin.’ Nao hem i pusumdaon woman ya i go insaed long basket ya, nao i satem bakegen. 9 Taem mi stap lukluk i go antap, mi luk tu narafala woman we tufala i gat wing blong tufala. Wing blong tufala i strong we i strong, olsem wing blong pijin ya stok.* Tufala i flae i kam, nao tufala i karem basket ya, tufala i flae i go wetem.

10 "Nao mi askem long enjel ya se, ‘?Tufala i karem basket ya i go wea ya?’

11 "Mo hem i talem se, ‘Tufala i karem i go long Babilonia*5.11: Long Oltesteman long lanwis ya Hibru, long ples ya oli yusum olfala nem blong Babilonia se Sina, we ol man ya bifo oli yusum blong soemaot we ol man long ples ya oli stap agens long God. Yu luk Jenesis 10.10; 11.1-9. Long ples ya bambae oli wokem wan haos blong hem, mo taem haos ya i finis, bambae oli putum basket ya insaed, blong ol man ples ya oli kam bodaon long hem, blong mekem wosip long hem.’ "