1 Nao Profet Sekaraea i talem se, "Nao mi mi luk wan vison* bakegen, mo long vison ya mi luk enjel ya bakegen we i bin toktok wetem mi. Hem i kam holem mi, i seksekem mi, olsem we i wantem wekemap mi. 2 Nao hem i askem long mi se, ‘?Wanem samting ya we yu yu luk?’

"Mo mi talem long hem se, ‘Mi mi luk wan ples blong putum laet ya. Oli wokem long gol, mo antap long hem i gat wan ples blong putum oel, mo i gat seven laet. Olgeta wanwan i gat seven ples blong putum wik. 3 ✝Mo i gat tu olif,* wan i stanap long raetsaed blong ples ya blong putum laet, mo narawan long lefsaed.’ 4 Nao mi askem long enjel ya se, ‘Masta,* ol samting ya oli saen blong wanem ya?’

5 "Nao hem i talem long mi se, ‘?Olsem wanem? ?Yu yu no save?’

"Mo mi talem long hem se, ‘No, masta, mi no save ya.’*

10 ✝ ✝"Nao enjel ya i talem long mi se, ‘Seven ples ya blong putum laet, i olsem seven ae blong Hae God, we i save lukluk olgeta ples long wol ya wantaem.’

11 ✝"Nao mi askem long hem se, ‘?Be wanem mining blong tufala olif ya we tufala i stap stanap long tufala saed blong hem. 12 Mo i gat tu paep we oli wokem tufala long gol we olifoel* i stap ron i kamaot long tufala. ?Wanem mining blong tufala han blong olif ya we i stap long saed blong tufala paep ya?’

13 "Nao hem i talem long mi se, ‘?Olsem wanem? ?Yu yu no save?’

"Mo mi talem long hem se, ‘Masta, mi no save.’

14 "Nao hem i talem se, ‘God i Masta blong olgeta ples long wol ya, mo tufala samting ya, hemia tufala man we hem i jusumaot tufala, i kafsaedem oel i go long hed blong tufala, blong tufala i stap mekem wok blong hem.’ "

6 Mo Profet Sekaraea i talem se, "Nao enjel ya i talem long mi blong mi go luk Serubabel, mi talemaot we Hae God i talem long hem se, ‘Serubabel. Mi mi Hae God, mi gat olgeta paoa, mo mi talem long yu, se bambae yu yu win, be i no long paoa blong ol soldia blong yu, mo i no long paoa blong yu. Bambae yu win long paoa blong Spirit blong mi nomo.* nomo. 7 I nating we tumas samting i stap blokem yu olsem bigfala hil, be samting ya bambae i lus nomo long fes blong yu. Yu bambae yu wokem haos* blong mi bakegen, mo taem yu putum las ston blong hem, olgeta man bambae oli save singaot bigwan wantaem se, "!I gud tumas! !I gud tumas!" ’

8 "Nao Hae God i talem wan tok blong hem bakegen long mi se, 9 ‘Serubabel i statem fandesen blong haos ya, mo hem nao bambae i wok long hem gogo i finisim. Taem hem i mekem olsem, ol man blong mi bambae oli save se mi nomo mi sanem yu yu go talemaot ol tok ya long olgeta. 10 Naoia tingting blong olgeta i foldaon from we wok ya i gohed sloslo nomo. Be bambae oli luk we Serubabel nao bambae i putum las ston blong finisimgud haos ya, mo taem oli luk olsem, bambae oli glad tumas from.’ "