1 Zwana umkhuleko wami, Oh Thixo;

ukukhala kwami ngicela uncedo kakufike kuwe.

2 Ungangifihleli ubuso bakho

nxa ngikhathazekile.

Ngipha indlebe yakho;

nxa ngibiza ngiphendula masinyane.

3 Ngoba insuku zami ziyanyamalala njengentuthu;

amathambo ami ayavutha njengamalahle abhebhayo.

4 Inhliziyo yami yonakele, ibunile njengotshani;

ngiyakhohlwa ukudla kwami.

5 Ngenxa yokububula kwami okukhulu sengiphelile,

isikhumba sesinamathela emathanjeni.

6 Sengifana lesikhova senkangala,

njengesikhova semanxiweni.

7 Ngilala ngikhangele;

senginjengenyoni ehlezi yodwa ephahleni.

8 Ilanga lonke izitha zami ziyangichukuluza;

labo abangichothozayo badlala ngebizo lami njengesethuko.

9 Ngoba ngidla umlotha njengokudla kwami,

ngixube okunathwayo kwami ngezinyembezi

10 ngenxa yokuthukuthela kwakho okukhulu,

ngoba ungiqukule wangilahlela eceleni.

11 Insuku zami zifana lesithunzi sakusihlwa;

ngiyabuna njengotshani.

12 Kodwa wena, Oh Thixo, uhlezi ebukhosini lanininini;

udumo lwakho lumi ezizukulwaneni zonke.

13 Uzaphakama uzwele iZiyoni isihawu,

ngoba sekuyisikhathi sokutshengisa umusa kuyo,

isikhathi esimisiweyo sesifikile.

14 Ngoba amatshe ayo aligugu ezincekwini zakho;

othuli lwayo nje lubalethela usizi.

15 Izizwe zizalesaba ibizo likaThixo,

wonke amakhosi omhlaba azahlonipha inkazimulo yakhe.

16 Ngoba uThixo uzayakha kutsha iZiyoni

avele enkazimulweni yakhe.

17 Uzaphendula imikhuleko yabahluphekayo;

kazukweyisa isicelo sabo.

18 Lokhu kakulotshwe phansi kube ngokwesizukulwane sakusasa,

ukuze abantu abangakadalwa bamdumise uThixo :

19 "UThixo wakhangela phansi ephezulu endlini yakhe engcwele,

esezulwini wawuhlola umhlaba,

20 ukuze ezwe ukububula kwezibotshwa

lokukhulula labo ababegwetshelwe ukufa."

21 Ngalokho-ke ibizo likaThixo lizamenyezelwa eZiyoni

lodumo lwakhe eJerusalema,

22 lapha izizwe lemibuso

sekuhlangana ndawonye ukukhonza uThixo.

23 Wawanciphisa amandla ami ngisaphila;

waziphungula insuku zami.

24 Yikho ngasengisithi,

"Ungangithathi, Oh Nkulunkulu wami,

ngilokhu ngisephakathi kwensuku zami;

iminyaka yakho ihlala ikhona ezizukulwaneni zonke.

25 Ekuqaleni wabeka izisekelo zomhlaba,

lamazulu angumsebenzi wezandla zakho.

26 Konke kuzabhubha, kodwa wena uzasala;

konke kuzaguga njengesigqoko.

Njengesivunulo uzakuguqula

kucine sekulahlwa.

27 Kodwa wena uhlala unjalo,

leminyaka yakho kayiyikuphela.

28 Abantwana bezinceku zakho bazahlala besemehlweni akho;

izizukulwane zazo zizaqiniswa phambi kwakho."