1 Siletha ukubonga kuwe, Oh Nkulunkulu,

siletha ukubonga, ngoba iBizo lakho liseduze;

abantu bakhuluma ngemisebenzi Yakho emangalisayo.

2 Wena uthi, "Ngikhetha isikhathi esimisiweyo;

yimi engahlulela okuqondileyo.

3 Nxa umhlaba kanye labantu bawo kuzamazama,

yimi engizibamba ziqine izisekelo zawo.

4 Ngithi kwabayiziqholo, ‘Lingabe lisazincoma,’

ngithi kwababi, ‘Lingaziphakamisi impondo zenu.

5 Lingaphakamiseli uphondo lwenu phezulu ezulwini;

lingakhulumi liziqhenya.’ "

6 Kakho ovela empumalanga loba entshonalanga,

kumbe ovela enkangala ongaphakamisa umuntu.

7 Kodwa nguNkulunkulu owahlulelayo:

uyamehlisa omunye, amkhweze omunye.

8 Esandleni sikaThixo kukhona inkezo

egcwele iwayini eliphuphumayo elixutshwe ngeziyoliso;

uyalithulula, kuthi bonke ababi bomhlaba

balinathe kanye lenzece zalo.

9 Kodwa mina ngizamemezela lokhu lanini;

ngizahlabelela indumiso kuNkulunkulu kaJakhobe,

10 yena othi, "Ngizazithulisa zonke impondo zababi,

kodwa impondo zabalungileyo zizaphakanyiswa."