1 Ake ungihawukele, awu Nkulunkulu,

ngenxa yothando lwakho olungaphuthiyo;

ngenxa yesihawu sakho esikhulu

yesula iziphambeko zami.

2 Hlanza wonke amanyala ami

ungihlambulule esonweni sami.

3 Phela ngiyazazi iziphambeko zami,

isono sami sihlezi siphambi kwami.

4 Ngenzile isono kuwe, wena wedwa,

ngenza okubi phambi kwakho,

ukuze kukhanye ukuthi wena uqondile nxa ukhuluma

njalo kube kufanele nxa usahlulela.

5 Ngeqiniso ngavele ngazalwa ngilesono,

ngaba yisoni ngiqalisa esiswini sikamama.

6 Ngempela wena ufuna iqiniso elisuka emibilini;

uyangifundisa ukuhlakanipha ngaphakathi kwami.

7 Ngihlanza ngehisophi ngihlambuluke;

ngigezisa ngibemhlophe kuleliqhwa.

8 Mangizwe intokozo lokuthaba;

makuthi amathambo owacobozileyo ajabule.

9 Fihla ubuso bakho esonweni sami

ucitshe nya wonke amanyala ami.

10 Dala phakathi kwami inhliziyo ehlanzekileyo, Oh Nkulunkulu

uvuselele ngaphakathi kwami umoya othembekileyo.

11 Ungangilahli ebusweni bakho

kumbe ususe kimi uMoya oNgcwele.

12 Buyisela kimi intokozo yokusindisa kwakho

njalo ungiphe umoya ovumayo ukuthi ungisekele.

13 Lapho-ke ngizafundisa abonayo izindlela zakho,

lezoni zizabuyela kuwe.

14 Ngikhulula ecaleni lokuchitha igazi, Oh Nkulunkulu,

uNkulunkulu ongisindisayo,

njalo ulimi lwami luzahlabelela ukulunga kwakho.

15 Oh Thixo, vula izindebe zami,

umlomo wami uzamemezela indumiso yakho.

16 Kawuthokoziswa yimihlatshelo, ngoba bengizawuletha;

kawuthakazeleli iminikelo yokutshiswa.

17 Imihlatshelo kaNkulunkulu iyinhliziyo edabukileyo;

inhliziyo edabukileyo, ezisolayo,

awu Nkulunkulu, kawuyikuyilahla.

18 Nxa kuyintando yakho phumelelisa iZiyoni;

yakha imiduli yeJerusalema.

19 Lapho-ke kuzakuba lemihlatshelo elungileyo,

iminikelo yokutshiswa egcweleyo elungileyo,

lapho-ke inkunzi zizanikelwa e-alithareni lakho.