1 Sịbidịd anekke atañ abo ke utịd ayio amaadisịm, mme awo eyaewuọñọ ekpọñ mbuọdidem ekeene mme nsu-nsu sịbidịd ye ukpeebñkpọ mme dimọn. 2 Mme utọ ukpeeb ami eto mbubịk mbon e-ebenne nsu ekpeep nte akpanikọ, e-esịd ammọ anyʌññọ adoro ufiọọn nte ñkpọ e-edatta ikañ adomutịm efọp. 3 Ammọ ekpan mme awo adidọ ndọ enyʌñ ewuuk ammọ adidia usʌk ndidia, A-Abasi akebotto anọ mbon e-enịmme ke akpanikọ, e-enyʌññọ ediọọñọ akpanikọ, abo edia ye esịd ekọọm. 4 Afịd se Abasi akebot afọn, ibaaha se awo akpesịn adieke ebọọhọ edia ye ekọọm, 5 sia ikọ Abasi ye akam enam ammọ esana.

6 Adieke afo akpeebe mme nditọeka* ke Krais mme ñkpọ ami, afo ayaado eti asañautom Krais Yisọs, e-emaekebọọk ke akpanikọ a-abaaha ke mbuọdidem ye nti ukpeebñkpọ a-afo akeeneke. 7 Kuukpañ utọñ unọọ mbʌk A-Abasi miisịneke ke esịd ye mme mbʌk a-ñkaan ibaan ebʌkkọ, ado kpeep adidu uwem ke uteeñe Abasi. 8 Awo adisiiñe ikpọkidem aba ufọn, ado uteñe Abasi afọn akan afịd ñkpọ, sia asaña ye enwọñọ a-abañake uwem ami ye uwem a-adiidi. 9 Ikọ ami ado akpanikọ, anyʌñ adot se awo anyịmme ayọhọ-ayọhọ. 10 Ke ntak ami ke ñnyịn ikpa utom, inyʌñ inwana ke adikọọñ idodanyen ñnyịn ke ndu-ndu Abasi, a-adooho Andinyaaña anọ afịd awo, akpan-akpan mme andinịm ke akpanikọ.

11 Wuuk ewʌhọ nyʌñ kpeep mme ñkpọ ami. 12 Kuuyak awo use fiin ke mbio me adudat fiin nte etəkayịn, ado do uwọdñkpọ nọ mme andinịm ke akpanikọ ke ikọ inua mfo, ke edu uwem, ke ima, ke mbuọdidem ye ke adidu adisana uwem. 13 Tutu ami ndi, sọọñọ koot ikọ Abasi anwa-anwa, kwọrọ ikọ nyʌñ nọ ukpeebñkpọ. 14 Kuusọọn enọ mfo e-ekunọọhọ fiin eto prọfesi idaha mme ñkpisọñ ekudotto fiin ubọk.

15 Nekke sịn idem nam mme ñkpọ ami. Sịn idem ayọhọ-ayọhọ, nọ afịd awo ekịt ñkọd mfo. 16 Nekke kpeme uwem mfo ye ukpeebñkpọ mfo. Sọọñọ yịre ke adinam utom ami nọ ato do afo anyaaña idem mfo, ye mbon e-ekoppo ikọ mfo.