1 Yak mme ifʌn enọ mme eteufọk ammọ ayọhọ ukpono mbaak awo adisappa anyịñ Abasi ye ukpeebñkpọ ñnyịn. 2 Inaaha mbon e-edʌññọ ye mme eteufọk e-enịmme Abasi ke akpanikọ emiom ammọ sia ammọ edoññoke mme andinịm ke akpanikọ ukem nte ñnyịn. Utu ke ado, yak ammọ enekke enam utom ammọ nọ afọfọn akan, sia ammọ e-ema mme eteufọk ammọ e-enyʌññọ edoñño mme andinịm ke akpanikọ enyʌñ ese ñkpọ ebaña mme ifʌn ammọ.

Ana afo akpeep anyʌñ afiik ada ke mme ñkpọ ami. 3 Adieke awo akpeebe ñkpọ mfen i-imiisañake ikikem ye item akpanikọ Abọọñ ñnyịn Yisọs Krais ye ukpeeb ñkpọ a-asañake mme uteñe Abasi, 4 ammọ edo mbon ñkokkoidem, inyʌññọ idiọọñọ ñkpọ ndomokeed. Esịd ammọ asịne ke eniin ye mme utọk-utọk ikọ e-edatta ufịb, nsueñ, ubiad anyịñ, ukere ndiọi akikere mbaña mbon mfen, 5 ye ananautịd ndutuai ke atu mbon ndiọi akikere, mbon i-imiinieghe akpanikọ aba, e-ekereke ke ikọ Abasi ado ñkpọ ukama ndia udod.

6 Ado, uteeñe Abasi ye uyʌkkọ ke se awo anie ado ataa ekamba udod. 7 Sia ñnyịn ikikamake ñkpọ ndomokeed idi ederimbod, idiinyʌññọ iben ñkpọ ndomokeed inyọñ. 8 Adieke ñnyịn inieghe ñkpọ se idia, ye afọñ se isịne, akpena iyʌkkọ ke ado. 9 Mbon e-eyemme edido mbon inie esiduọ edʌk ke idomo ye afia, ye idiọọk ndisịme udọñ a-asidatta ammọ akesuunọ ke mbiara ye nsobo. 10 Sia udọrọ itọñ akʌk ado adʌñ afịd idiọọkñkpọ. Ndin ato ke adinyanna mbịne akʌk, uwak awo emaeyooñ ekpọñ mbuọdidem, enyʌñ edat uwak mfʌhọ enọ idem ammọ unan.

11 Amaado afo, awo Abasi, feghe kpọñ mme ñkpọ ami, yịre adinenido, uteeñe Abasi, mbuọdidem, ima, ime ye nsuukidem. 12 Nwana eti anwan mbuọdidem, sọọñọ mʌm nsi-nsi uwem kama, emaekukoot fiin ete adibọ anie, a-afo akenyʌññọ ayaara ke iso uwak ntiense. 13 Ke iso Abasi, a-anọọhọ afịd ñkpọ uwem, ye ke iso Krais Yisọs, a-aketañña eti ikọ mbuọdidem ke iso Pọntiọs Pailed, mmuwuuk fiin 14 nte anịm ewʌhọ ami ayọhọ-ayọhọ, anyʌñ anana ndo me se etañ idọọk ikọ edian, tutu usen adidi Abọọñ ñnyịn Yisọs Krais. 15 Abasi adiiyaara anye ke akemini amọ, kpa anye a-adooho adisana Abasi ye Andikara ikpọọñ, Adidem mme ndidem ye Abọọñ mme mbọọñ, 16 anye i-imiidiikpaaha, anyʌññọ adʌñ ke unwana a-awo imiikanna adisaña ñkpere, a-adooho kpaanam awo ikịtte, inyʌññọ idikan ikịt. Ubọọñ ye adudu enie anye ke nsi-nsi. Amen.

17 Sọọñọ tañ nọ mme anie ñkpọ awo ayio mfịn ate ammọ ekuukokko idem; ekuunyʌñ ekọọñ idodanyen ammọ ke inie a-akemeke iyaañ awo, ado edot anyen ke Abasi i-inọọhọ ñnyịn afịd ñkpọ uwak-uwak ate idaara ito do. 18 Bo ammọ enam nti utom, enyʌñ efọn ido, enyʌñ ebeeñe idem ediwuana se ammọ enie ye mbon mfen. 19 Ke adinam ntom, ammọ eyaetʌm inie ebono enọ idem ammọ nte eti itiad idakisọñ ke ini iso, nọ ammọ ediikan imʌm uwem a-adooho ataa uwem ikama.

20 Timoti, nekke kpeme se emaekeyaak usịn fiin ke ubọk. Sio idem mfo kpọñ ikpu-ikpu ndutañña imiisañake ñkpọ ye Abasi ye uyịre-uyịre eniin, a-ndusʌk awo edatta nte ifiọk, 21 a-adooho ke adinyịmme mme ñkpọ ami, ubaak awo e-eduọọk mbuọdidem.

Yak mfọn Abasi aba ye afịd ndufo.