1 Ke ntoro ami mmaabiide ke esịd mmi nte ke ndiitịmmeke ndise ndufo ke usʌñ adiinọ ndufo ubiak. 2 Sia adieke ami nnamma nọ ndufo efʌhọ, anie ndin isʌhọ se idiinam esịd annem miin ke imiibọhọke kpa ndufo a-ami nnamma nọ efʌhọ? 3 Ami ñkewet naña ñkewet ado, mbaak ami mmaadi ndidibọ mfʌhọ ke ubọk mbon e-ekpenamma nọ ami ñkop idadesịd. Ami mmaanie idodanyen ke afịd ndufo eyaewuana ke idadesịd mmi. 4 Akpọsọñ ukuud, mbʌññọesịd ye uwak mmọọñayịd ekenam ami ñwet ñwed ado inọ ndufo. Ikidooho adinam ndufo efʌhọ, ado nọ ndufo ediọọñọ ntotəño ima a-ami nnieghe inọọ ndufo.

5 Ado akpedo aba awo a-anamma mfʌhọ aba, inekkeke ido ami ke anye anọ mfʌhọ, akapado afịd ndufo, mbaak adiba nte mmenekke ndiọọk itañ. 6 Ufen se uwak awo enọ awo ado akem ye anye. 7 Akpena ndufo ekap efeen enọ anye, enyʌñ edọñ anye esịd, mbaak ekamba mfʌhọ adiben anye amen. 8 Ke ntoro, mmikpeiye ndufo nte emaana esọọñọ ima a-ndufo emaaha anye. 9 Ntak mfen ami ñkiwette ndufo ado ke ñkeyem idiọọñọ me ndufo eyaekan eboiyo idomo enyʌñ enam item ke afịd ñkpọ. 10 Awo keed akeedodo a-ndufo efeene ñkpọ enọọ, ami ñko mmefeen nnọ awo ado. Ndin se ami mfeen, akpedo a-aba ñkpọ se akpena efeen, ami mmefeen ke iso Krais ke ntak ndufo, 11 mbaak Setan adikan ñnyịn ubọk, sia ñnyịn imiinanake ifiọk ibaña ñkara amọ.

12 Ke ini ami ñkekaaha Troas adikwọrọ eti etob Krais, mmaakịt ke Abọọñ amaabeere usʌñ annọ miin, 13 ami ñkinieghe emem ke sịbidịd sia mmeñkekịtte Taitọs ayịneka mmi awodeen ke Krais ke udo. Ndin mmaakọọm ammọ itiesʌñ mboiyo do ñkaa Masidonia.

14 Ado ekọọm anie Abasi i-idatta ñnyịn usʌñ afịd-afịd ini nte ifʌn asaña ke adikan ke Krais, anyʌñ ikama ñnyịn asuan inem ufịk etob ifiọk amọ anwa-anwa ke afịd itie. 15 Sia ke atu mbon e-enyaañake ye mbon e-etakka ñnyịn ido anem ufịk adan ke Krais inọ Abasi. 16 Ñnyịn ido idiọọk ufịk adatta ñkpa asọk usʌk awo, ado ikappa ido inem ufịk abenne uwem asọk mbon mfen. Ndin anie ikan inam utọ utom ado? 17 Ñnyịn ibaaha nte uwak awo e-enyamma ikọ Abasi edia udod. Utu ke ado, ke iso Abasi ñnyịn itañ ikọ ke Krais ke esịd akpanikọ nte mbon A-Abasi asiooho adọñ utom.