1 Sia ñnyịn imidiọọñọ ke adieke ewuudo atayad a-ñnyịn idʌññọ ke isọñ, iminie nsi-nsi ufọk ke hefịn A-Abasi inọọhọ ñnyịn, a-awo imiidatta ubọk ibọp. 2 Sia ke ini inaaha ke atayad ami, ñnyịn isʌk ikuun inie udọñ adidʌk nsịne ke itie idʌñ Abasi ke hefịn, 3 sia imaisịne afọñ, awo idiikịtte ñnyịn ifed. 4 Sia naña nte ñnyịn isịneke ke atayad ami, ñnyịn iba ke ñkuun ndin ifeefịghe ñnyịn ke esịd sia ñnyịn iyemme nọ isịññe ñnyịn afọn, ado iyem nọ isịn ñnyịn afọñ itieidʌñ ñnyịn ke hefịn, nọ ato do uwem aben ikpọkidem ñkpa amen. 5 Ndin andikibeeñe ñnyịn nnịm nnọọ ñkpọ ami ado Abasi, a-akinọọhọ ñnyịn Sịbidịd nte ubiọñ adiben ñwọt se idiidi ke ini iso.

6 Ke ntoro, ñnyịn iminie uko afịd ini, inyʌñ idiọọñọ ke adaña ini ñnyịn ibaaha ke ikpọkidem, ñnyịn ibaaha ye Abọọñ. 7 Sia ñnyịn idu uwem ke mbuọdidem, idooho ke se ikịt ke anyen. 8 Ami mbo ke ñnyịn iminekke inie uko adikpikpọñ ikpọkidem ami ñkeba ye Abọọñ. 9 Ami anam ñnyịn inwana adinem anye esịd, ke adooho ñnyịn iba ke ufọk ke ikpọkidem me ibaaha. 10 Sia ana afịd ñnyịn iwuọ ida ke iso itie ikpe Krais nọ awo keedekeed abọ utịb a-akemme ye se anye akenam ke ikpọkidem, ke ñkpọ ado adooho eti, me anyʌññọ ado idiọọk.

11 Sia adooho ñnyịn imidiọọñọ se adibaak Abọọñ ado, ñnyịn imidomo ukeme adikpak mbon mfen. Se ñnyịn ido ana inwañ-inwañ ke iso Abasi, ndin mmenie idodanyen ke inwaña ndufo ke akikere esịd ndufo ñko. 12 Idooho nte ñnyịn iyem aditịmme ntooro idem ñnyịn ke iso ndufo, ado inọ ndufo ufañ adidat ñnyịn nduaak inua, nọ ndufo enie se ebọọrọ mbon e-eduaha inua ke se ekịt ke anyen, idooho ke se ito eti esịd. 13 Sia adieke adooho iwuod iboiyo ñnyịn, naña usʌk awo ebo, ado ke ntak Abasi; anyʌñ ado ke ufọn ndufo adieke ñnyịn inieghe eti iwuod. 14 Ado ima Krais idat ñnyịn usʌñ; sia iminịm ke awo keed akekpa anọ afịd awo, ke ntoro afịd awo emaekpañña. 15 Ndin anye akenyʌñ akpa anọ afịd awo mbaak mbon e-ebaaha ke uwem edidu uwem aba enọọ idem ammọ, ado edu uwem enọ anye a-akekpaaha anọ ammọ, e-ekenyʌññọ enam aset.

16 Ke ntoro, tọọñọ ke idahami ñnyịn iseeghe awo ke anyen abʌkidem. Akpesʌkado a-ñnyịn ikidiọọñọke Krais ke abʌkidem, ñnyịn idiọọñọke anye aba ke utọ usʌñ ado. 17 Ke ntoro, adieke awo abaaha ke Krais, emaebot anye ufa, ñkaan ñkpọ eboiyo efep; sese afịd ñkpọ ekappa edo ufa. 18 Ado afịd ñkpọ ato Abasi, a-akenamma ñnyịn itie ke emem ye anye ke Krais, a-akenyʌññọ inọọ ñnyịn utom, abo ñnyịn inam awo aba ke emem ye anye. 19 Abasi a-asịn emem ye anye ye ederimbod ke Krais, inyʌññọ ibat ndudue mme awo inọ ammọ, ado amaaben ikọ adikappa mba ke emem ye anye inọ ñnyịn ate ikwọrọ. 20 Ntom ke ñnyịn ido mme isʌñutom Krais nte ñkpọ A-Abasi idatta ñnyịn ikpe ndufo ubọk. Ñnyịn imikpeiye ndufo ke iwuod Krais: Ibono ke emem ye Abasi. 21 Abasi akenam anye i-imiikinieghe idiọọkñkpọ akappa ado idiọọkñkpọ inọ ñnyịn, nọ ato do ke anye ñnyịn ikappa ido adinenido Abasi.