1 Ado nte ñnyịn imitọọñọ adimaana ntooro idem ñnyịn? Me ado nte ñnyịn iyem enọ ñwed itooro isọk ndufo, me ibọbọ ito ndufo naña usʌk awo eyem? 2 Ndufo ke idem ndufo edo ñwedetob a-ñnyịn iwette ke esịd ñnyịn a-afịd awo ediọọñọke enyʌñ ekoot. 3 Ndufo emewọt ke mmimọ ido ñwedetob a-atooho Krais, a-adooho ibọọrọ utom ukwọrọikọ ñnyịn, a-awo imiiwette ke mmọọññwed ikpọkidem, ado ewet ke Sịbidịd aduuwem Abasi, idooho ke itiad ñwed, ado ke awọñesịd awo.

4 Utọ uko ami ñnyịn inie ito Krais ke iso Abasi. 5 Idooho nte ñnyịn imikeme inam ñkpọ ndomokeed ke adudu idem ñnyịn; ado ukeme ñnyịn ato Abasi. 6 Anye anam ñnyịn inie ukeme adido mme asañautom ufa edioomo, idooho edioomo e-ewettewet, ado ado edioomo e-enamma ke Sịbidịd; sia mbed e-ewettewet awowot, ado Sịbidịd anọ uwem.

7 Adieke usañautom a-akedatta ñkpa adi, e-ekekamake mme abiisi ekap ke itiad, akesañake ye ubọọñ adi, a-akenamma nditọ Isrel ikanna iwuuk anyen ise Moses iso ke ntak ubọọñ iso amọ, akpesʌkado imiikisọñọke ida; 8 nte usañautom ake Sịbidịd idiikappa idikpon ke ubọọñ ikan ami? 9 Adieke usañautom a-akebenne ubiomikpe adi a-akesañake ye ubọọñ, usañautom a-abenne adinenido adi adiikpon die ke ubọọñ! 10 Sia, ke akpanikọ, se ikinie ubọọñ inieghe ubọọñ aba ekpeben edomo ye ubọọñ a-akponno akan. 11 Sia adieke se ikiboiyo ifep a-akenieghe ubọọñ, die ndin ke ubọọñ i-imiidiiboiyoke ifep adiikpeene!

12 Ke ntoro, sia ñnyịn inieghe utọ idodanyen ami, ñnyịn iminekke inie ayọhọ uko. 13 Ñnyịn ibaaha nte Moses a-akedatta ufʌkiso afʌk iso mbaak nditọ Isrel edikịt utịd ubọọñ a-akeboiyoke afep. 14 Ado emaenam akikere ammọ akappa ndisịme sia tutu asịm mfịn ufʌkiso ado asʌk ababa ke ini ekoodo akaan edioomo, sia ke Krais ikpọọñ ke adiboiyo ifep. 15 Ado tutu asịm mfịn ami, ufʌkiso ado asʌk afọfʌk esịd ammọ ke ini ekoodo ñwed Moses. 16 Ado ini akeedodo a-awo ndomokeed awọññọke akeene Abọọñ, e-eben ufʌkiso ado efep. 17 Abọọñ ado Sịbidịd, ndin itie nte Sịbidịd Abọọñ aba, uwuọufʌn aba do ñko. 18 Ndin afịd ñnyịn e-ekefʌkkọke iso imikan adikịt ubọọñ Abasi; ndin Abọọñ a-adooho Sịbidịd ikpəho ñnyịn idem asịn ke mbid amọ ke ubọọñ a-atooho Abọọñ, a-adooho Sịbidịd.