Lucas 15

Ñke Ete Anie Mbọm

11 Yisọs amaamaana adian do, "Ete keed amaaba a-akenieghe nditọ ideen iba, akpan ye udọ. 12 Udọ amaabo, ‘Ete, nnọ miin udeeme inie mmi.’ Ndin ete amaabakka inie amọ ke itie iba anọ ammọ awo iba.

13 "Ikikpeenekekpeene, Udọ amaakoono afịd se anye akenie adakka isañ akaa anyan idịd. Akekewuọ do, anye amaaketahade inie amọ ke adidu abʌd-abʌd uwem. 14 Ke anye amaaketahade inie amọ ama, ekamba akañ amaadisịm afịd abio ado, ndin anye amaatọọñọ adiba ke akpọsọñ unana. 15 Ke ntoro, anye amaakeyaak idem amọ anọ awo abio ado adinam utom usen; ndin awo ado amaanọ anye utom adinọ mme edi ndidia ke mme inwañ edi amọ. 16 Amaadọñ anye adidia ñkpọk ndidia se mme edi ekesidia ñkama mmʌm idịb, ado awo ikinọọhọ anye ñkpọ ndomokeed.

17 "Ke iwuod amaaketekke anye inaa, Udọ amaabo idem amọ ate, ‘Mme nditọutom ifañ ke ufọk ete mmi inie se edia inyʌñ inie se esọsʌhọ, ado se miin mi naña akañ abo idiñwot! 18 Ami ñyaadakka mbịne ete mmi, ñnyʌñ ñkebo anye nte: Ete mmi, mmedue hefịn, ñnyʌñ udue fiin. 19 Ami ndotto aba se añkoot ayịn mfo; ndat miin nte keed ke atu nditọutom mfo.’ 20 Ndin anye amaadakka abịne ete amọ.

"Ke ini ete amọ akedaaha akịt anye ko ke anyan usʌñ, mbọm amọ amaanam anye; ndin anye amaanyʌñ afeghe abịne Udọ, akefat anye anyʌñ atʌm anye inua.

21 "Udọ amaabo ete amọ, ‘Ete mmi, ami mmedue hefịn mmenyʌñ udue fiin. Ami ndotto aba se añkoot ayịn mfo.’

22 "Ado ete amọ amaanọ nditọufọk uyio ate, ‘Usọp! Idat afọñ se iyaiya ikan idisịn Udọ. Isịn anye ñkpainuun ke ubọk, ye ikpaukod ke ukod. 23 Iwot afọn idem abaakenañ e-ekebọọhọ enịm. Yak inam usọrọ inyʌñ idaara. 24 Sia ayịn mmi ami amaakpa ndin amaana adu uwem; anye amaasop ndin imimaana ikịt anye.’ Ndin usọrọ amaatọọñọ.

25 "Ke afịd ini ami, Akpan mmọdo ke inwañ akeba asʌk anam utom. Ke anye amaakenyọñ adikpere ufọk, anye amaakop uyio ikwọ ye unek. 26 Anye amaakoot ayịnufọk keed abịp me nsoo ido. 27 Ayịnufọk ado amaabọọrọ anye ate, ‘Udọ eka mfo anyọñ adi, ndin ete mfo a-awot ataa afọn idem abaakenañ sia anye a-adiwuọ ufọk ke ifuuro ye nsọñidem.’

28 "Akpan amaakop iyadesịd anyʌñ asịn adidʌk ufọk ñkewuana ye ammọ. Ndin ete amọ amaawuọ esiin akekpeiye anye. 29 Ado anye amaabọọrọ ete amọ ate, ‘Sese! Afịd mme isua eboiyoke mi, ami mmewa idem nnam utom unọ fiin, ñkop item, nsọññọ iwuod ñnyʌññọ umiom fiin. Ado kpaanam afo unnọọhọ miin etək ñyịn ebod ubo ñwot nnam usọrọ ye mme ufan mmi. 30 Ado Udọ mfo ami a-akekesuanna inie mfo ye mme akpara akenyọñ adi, afo adimʌm afọn idem abaakenañ awot anọ anye!’

31 "Ete amọ amaabọọrọ anye ate, ‘Akpan mmi, afo aba mi ye ami afịd-afịd ini, afịd ñkpọ se ami nnie, ado afo anie. 32 Akena ñnyịn idaara inyʌñ ikop inemesịd, sia ayịneka mfo ami amaakpa ndin a-amaana adu uwem; anye amaasop, ndin imimaana ikịt anye.’ "