1 Ke Yisọs amaakekpeep mme mbed amọ duob mme iba ima, anye amaadakka do akaa adikpeep ñkpọ ñnyʌñ ñkwọrọ ikọ ke mme abio Kalili.*

2 Ke ini Yọọn, a-akesịneke ke ufọk ñkpakọb, aketieghe akop mme utom se Krais akenañña, anye amaasio mme mbed amọ adọñ ate ekebịp 3 anye ebo, "Afo ado anye a-akenaaha nte adi, me a-ado se ñnyịn itie ibet awo mfen?"

4 Yisọs amaabọọrọ ate, "Itịmme ikaa ikidọkkọ Yọọn se ndufo ekop enyʌñ ekịt: 5 Mme nnan ekịt usʌñ, mme mbʌñọ esaña isañ, mme akpamfia* esaana, mme inan ekop ñkpọ, enam mme akpañkpa eset, ndin enyʌñ ekwọrọ eti mbʌk Abasi enọ mme uweene. 6 Afọfọn anọ awo akeedodo a-amiididuọhọ ke ntak mmi."

7 Ke ini mme mbed Yọọn emaekedaaña enyọñọ, Yisọs amaatọọñọ aditañ ikọ nnọọ atu awo mbaña Yọọn, ate: "Nsoo ke ndufo ekewuọ ekaa adikise ke anaan? Ñnyanyaha a-afịm anyeeñeke? 8 Imiidooho ntoro, nsoo ke ndufo ekewuọ ekaa adikise? Awodeen a-asịneke uyaiya afọñidem? Iyoo, mbon e-esịneke uyaiya afọñidem ebañña ke mme akwere ndidem. 9 Nsoo ndin ke ndufo ekewuọñọ ekaa adise? Prọfed? Ii, ami idọkkọ ndufo, anye akpon akan prọfed." 10 Anye ami ado anye e-ekewette ebaña, ete " ‘Sese, ami ñyaadọñ isʌñutom mmi ubem fiin iso

nọ adiikidiọñ usʌñ anịm unọ fiin.’

11 Ke akpanikọ ami idọkkọ ndufo nte ke atu afịd se ibaan eman, akenam ibaaha ndomokeed a-akponno akan Yọọn Aduọkmmọọñ; kpayeado andisịp ñkan ke abioubọọñ hefịn a-akpon akan anye. 12 Tọọñọ ke ini Yọọn Aduọkmmọọñ, tutu awuọ idahami, abioubọọñ hefịn a-akịt afai, ndin mbon afai eyem idat afai nnie anye. 13 Sia afịd mme Prọfed ye Mbed emaetañ prọfesi tutu Yọọn adidi. 14 Ndin ndufo ekpenyịmme adinịm se ntañ, anye ado Elaiya a-akenaaha atịmme adi. 15 Awo akeedodo a-anieghe utọñ, yak anye akop!

16 "Nsoo ke ami ñkpedat ndomo ye emana ami? Ammọ eba nte ntəkayịn e-etieghe ke mme anwa udua ebọñ ekoot emọ-emọ ete:

17 " ‘Ñnyịn imaifịt adʌk inọ ndufo,

ado ndufo ikinekke;

imaikwọ ikwọ ikpo,

ado ndufo ikifʌhọke.’

18 Sia Yọọn amaadi, idiaha ñkpọ, inyʌññọ inwọñ ukọd, ndin ammọ ete, ‘Anye anie dimọn.’ 19 Ayịn Awo amaadi, adia ñkpọ anyʌñ anwọñ ukọd, ndin ammọ ete, ‘Anyem ado adiauyʌkkọ ye akpammịn, ufan mme abọọ taks ye mme anam idiọọkñkpọ.’ Ado edat utom aniọñ ediọọñọ ke aniọñ anen."

20 Ndin Yisọs amaatọọñọ adisua nnọọ mme abio se anye akenañña mme uwak utịppeñkpọ, sia ammọ ikikamma adikappa esịd. 21 "Adọdiọọk inọ ndufo Korasin! Adọdiọọk inọ ndufo Bedsaida! Sia akpedo ekenam afịd mme utịppeñkpọ ami ke Tai ye Sidọn, mbon ado ekpaekesịne afọñ ikpo ekappa esịd enyʌñ enekke etua ñkpọfiọk tọọñọ ako. 22 Ado ami ibo ndufo ke ayaafọn ye Tai ye Sidọn ke usen ubiideikpe ikan ndufo. 23 Ñko amaado afo Kapanum, afo ayem nọ ubenne fiin ekewuọ mme hefịn? Iyoo, afo uduusọiyọ uka Hedis.* Sia akpedo ekenam afịd mme utịppeñkpọ ami ke Sọdọm, mmọdo akpesọọñọ ada tutu usen mfịn. 24 Ado ami ibo ndufo ke ayaafọn ye abio Sọdọm ke usen ubiideikpe ikan ndufo."

25 Ndin akedikem ini ado, Yisọs amaabo, "Ami mmutooro fiin, Ete, Abọọñ a-abaaha ke hefịn ye ke isọñ, sia afo amedịp mbon aniọñ ye mme adiọọñọñkpọ mme ñkpọ ami, anyʌñ ayaara ammọ anọ ntəkayịn. 26 Ii, Ete sia se ikunem fiin esịd adinam adodo.

27 "Ete mmi amaayaak afịd ñkpọ ansịn miin ke ubọk. Awo ndomokeed idiọọñọke Ayịn ke mmiibọhọke Ete, kpa naña awo ndomokeed mmiidiọọñọke Ete ke mmiibọhọke Ayịn, ye mbon se Ayịn amek adiyaara anye nnọọ.

28 "Idi imbịne miin, afịd ndufo e-ekpaaha mba enyʌñ ebiom ndoppo mbiomo, ndin ami ñyainọ ndufo nduọkadudu. 29 Iben akpọnọ mmi ikọñọ inyʌñ ikpeep ñkpọ into miin sia ami ndo sʌñ-sʌñ ñnyʌñ nnie nsuukidem ke esịd, ndin ndufo eyaenie nduọkadudu enọ ukpọñ ndufo. 30 Sia akpọnọ mmi ado mmem-mmem, mbiomo mmi anyʌñ ayakka."