1 Ke ini Yisọs amaakemana ke Betlehem ke Yudia ke ini ukara Adidem Herọd, mme adiọọñọñkpọ* awo e-eketooho usakkautịn emaedi Yeruselem 2 edibịp ete, "Mmọ anye a-amanake nte adidem mme Yuu? Ñnyịn imaikịt ntantaafiọñ amọ ke ini akesakkake ndin imidi adikpono anye."

3 Ke ini Adidem Herọd akekoppo ñkpọ ami, amaafịna anye ye afịd Yeruselem. 4 Ke ini anye amaakekoot afịd ikpọ aku ye mme andikpeeb mbed abon keed, anye amaabịp ammọ abaña itie a-akenaaha Krais adimana. 5 Ammọ emaebọọrọ ete, "Ke Betlehem ke Yudia, sia ntom ke prọfed awet:

6 " ‘Ado afo, Betlehem, ke isọñ Yuda,

usịppe ke usʌñ ndomokeed ukan ke atu mme andikara Yuda;

sia ke afo ke andikara adiito,

anye adiido andikpeme ikọd mmi Isrel.’ "

7 Ndin Herọd amaakoot mme adiọọñọñkpọ awo ado ke ndịbe anyʌñ adiọọñọ ato ammọ ataa ini a-ntantaafiọñ akewuọhọ ada. 8 Ndin anye amaanọ ammọ eka Betlehem ate, "Ikaa ikinekke iyem ayịn ado. Imaisʌk ikikịt anye, inam nọ ami ndiọọñọ, nọ ami ñko ñnyʌñ ñka ñkekpono anye."

9 Ke ammọ emaekekop se adidem aketañ, ammọ emaekaa iso ke isañ ammọ, ndin kpa ntantaafiọñ a-ammọ ekekịtte ke usakkautịn akedat ammọ usʌñ tutu aketre ke itie a-ayịn ado akebaaha. 10 Ke ammọ emaekekịt ntantaafiọñ ado, ammọ emaenekke enem esịd. 11 Ke emaekesịm ufọk a-ayịn akebaaha, ammọ emaekịt ayịn ye Mmeri eka amọ, ndin emaetuak iwuod enyʌñ ekpono anye. Ndin ammọ emaetat ekpad ñkpọuto ammọ enyʌñ enọ anye mme enọ: kold, frañkinsensi ye anemufịk adan. 12 Ndin sia emaekekpan ammọ ke ndab ebo ammọ ekuutịmme ekekịt Herọd aba, ammọ emaesaña usʌñ mfen enyọñọ abio ammọ.

13 Ke ammọ emaekenyọñọ, enyere Abọọñ amaawọt Yosef idem ke ndab ate, "Dakka da, ben ayịn ye eka amọ feghe kaa Iyib. Tie do tutu ami udọkkọ fiin idaha se uduunyọñ, sia Herọd ayaayem ayịn ado adiwot."

14 Ndin anye amaadakka ada, aben ayịn ye eka ke akonayio akaa Iyib. 15 Do ke ammọ ekeba tutu Herọd akpa. Aketịppe ntom nọ se Abọọñ aketañ ato prọfed amọ asu: "Ke Iyib ke ami ñkekoot ayịn mmi nsio."

16 Ke ini Herọd akediọọñọke ke mme adiọọñọñkpọ awo ado emaibiaña imọ, anye amaayat esịd ñkpa-ñkpa, anyʌñ anọ uyio ate ewoot afịd nditọ ideen ke Betlehem ye mme ñkanñkʌk a-mmiikisọññọ ikan isua iba akeene se anye akekop ato mme ntaifiọk ado abaña ini se ntantaafiọñ akewuọ ada. 17 Ke ntom se prọfed Yerimaiya aketañ amaasu:

18 "E-ekop uyio ke Rama,

ntuaña ye akpọsọñ mfʌhọ,

Ratiel atua abaña nditọ amọ

inyʌññọ ikop ndọñesịd,

sia ammọ ibaññake aba ke uwem."

19 Ke Herọd amaakekpa, enyere Abọọñ amaawọt Yosef idem ke ndab ke Iyib 20 anyʌñ abo anye ate, "Dakka da, ben ayịn ye eka amọ nyọñ isọñ Isrel, sia mbon e-ekeyemme edidat uwem amọ ekpañña."

21 Do ndin ke Yosef akedakka ada, aben ayịn ye eka atịmme anyọñ isọñ Isrel. 22 Ado ke ini anye akekoppo nte ebo ke Akelaus akeda ukara ke Yudia, ke itie ete amọ Herọd, ndịk amaanam anye adika do. Sia emaekekpan anye ke ndab ete anye akuukaa Yudia, anye amaakappa akaa ñkanñkʌk Kalili, 23 anyʌñ akedʌñ do ke abio e-ekekoodo Nasared. Ke ntom, se mme prọfed eketañ amaasu: Ke ediikoot anye awo Nasared.