1 Mme Farisi ye mme Sadusi emaedi edidomo Yisọs ke adibo anye yak iwọt mmimọ idiọọñọ a-atooho hefịn.

2 Yisọs amaabọọrọ, "Ndubiayio amaadi ndufo ebo, ‘Anyọñ ayaayaiya, sia ikpaanyọñ ado ndad-ndad,’ 3 ndin ke ubakusen ndufo ebo, ‘Mfịn ayobio ayaaba, sia ikpaanyọñ adat ndin anyọñ anyʌñ afʌhọ.’ Ndufo emediọọñọ naña ekappa idiọọñọ ikpaanyọñ, ado idiọọñọke adikappa idiọọñọ ini ntom. 4 Emana mbon mbubịk ye emana mbon efịbe eyem idiọọñọ, ado awo idiinọọñọ ammọ idiọọñọ ke amaaboiyo idiọọñọ Yọna." Ndin Yisọs amaakpọñ ammọ adakka anyọñ.

5 Mme mbed Yisọs, ke ini ammọ emaekekanna eka edem ibiok uko, emaefre adiben uyo. 6 Yisọs amaabo ammọ, "Inekke ikpeme, inyʌñ ikpeme idem ndufo mbaak yiis mme Farisi ye mme Sadusi."

7 Ammọ emaeneme ke ufọọd ammọ ebo, "Ado sia ñnyịn ikibenne uyo ndomokeed idi."

8 Yisọs amaadiọọñọ se ammọ ekeneme, ndin anye amaabo ammọ, "Ndufo mbon etək mbuọdidem, ntak etañña ke atu ndufo ebo ke ikamake uyo-o? 9 Isʌkkọ inwanwaña ndufo? Ndufo itoiyoke uyo ition e-ekenọọhọ tọsịn awo ition ye ibad akpasa se ndufo ekekoono? 10 Itoiyoke ñko uyo itiaba e-ekenọọhọ awo tọsịn inaañ ye ibad akpasa se ndufo ekekoono? 11 Anam die nọ idiinwañake ndufo ke ami ñketañña mbaña uyo? Ado ikpeme idem ndufo ke abaña yiis mme Farisi ye Sadusi." 12 Do ndin amaanwaña ammọ ke anye akebo ammọ ekpeme idem ebaña ukpeebñkpọ mme Farisi ye mme Sadusi, idooho yiis asinamma uyo atịt.

13 Ke ini Yisọs amaakedi utịd Siseria Filipai, anye amaabịp mme mbed amọ mbịme ate: "Anie ke mme awo ebo ke Ayịn Awo ado?"

14 Ammọ emaebọọrọ, "Ubaak ebo Yọọn Aduọkmmọọñ; ubaak ebo Elaiya; ubaak ete, Yerimaiya me keed ke atu mme prọfed."

15 Ndin anye amaabịp ammọ ate, "Ado ndufo ebo ke ami ndo anie?"

16 Ndin Saimọn Pita amaabọọrọ, "Afo ado Krais, Ayịn ndu-ndu Abasi."

17 Yisọs amaabọọrọ anye ate, "Saimọn ayịn Yọna, afo ado awo e-emaedọdiọñ, sia ikidooho abʌk ye iyiib ekeyaara ami unọọ fiin, ado Ete mmi ke hefịn. 18 Ke ntoro, ami udọkkọ fiin nte afo ado Pita,* ndin ke anyọñ itiad ami, ami ñyaabọp ufọkabasi mmi, ndin inuaatob Hedis* idiikanna anye. 19 Ami ñyaunọ fiin mme ukpọhọde abioubọọñ hefịn: se adodo a-afo abọppọ ke isọñ, eyaebọp ke hefịn, ñko se adodo a-afo atatta ke isọñ eyaetat ke hefịn." 20 Ndin anye amaakpan mme mbed amọ ate ekuudọkkọ awo ndomokeed ke imọ ido Krais.

21 Tọọñọ ke ini ado Yisọs amaatọọñọ aditañ anwa-anwa anọ mme mbed amọ ke ana imọ ika Yeruselem ikibọ nsio-nsio ufen ke ubọk mme ñkpisọñ, mme ñkpoon aku ye mme andikpeeb mbed, ñko ke ana ewot anye, ndin ke ayọhọ usen ita eyaenam anye aset ke ñkpa.

22 Ndin Pita amaaben anye asịkke ada nsan-nsan anyʌñ atọọñọ adisua nnọọ anye ate, "Abasi akan, Abọọñ! Tutu amama utọ ñkpọ ami idiitịppe unọ fiin."

23 Ado Yisọs amaakanna anyʌñ abo Pita, "Ndakka miin ke iso, Setan! Afo ado ñkpọiduọ annọ miin; afo ukereke ñkpọ a-abañake Abasi, ado akere ñkpọ a-abañake uduud awo."

24 Ndin Yisọs amaabo mme mbed amọ, "Awo ndomokeed ayemme iñkeene miin ana akañ idem amọ, aben krọs amọ anyʌñ añkeene miin. 25 Awo akeedodo a-ayemme adinyaaña uwem* amọ ayaaduọọk anye. Ado awo akeedodo a-aduọhọ uwem amọ ke ntak mmi, ayaanyaaña anye. 26 Nsoo ndin idiido udod ke awo adinie afịd ederimbod ado aduọọk ukpọñ amọ? Me nsoo ke awo akeme adinọ nte ukpʌhọ ñkpọ ke ukpọñ amọ? 27 Sia Ayịn Awo asʌk adi ke ubọọñ Ete amọ ye mme enyere amọ, ndin anye ayaanọ awo keedekeed utịb a-akemme ye se anye akenam.

28 "Ke akpanikọ ke ami idọkkọ ndufo, aba ubaak awo e-edaaha ke itie ami i-imiidiikịtte ñkpa tutu ammọ ekịt Ayịn Awo nte adi ke abioubọọñ amọ."