Mateus 26

Kedsemeni

36 Ndin Yisọs amaasaña ye mme mbed amọ akaa itie keed ekekoodo Kedsemeni, amaanyʌñ abo mme mbed amọ ate, "Ndufo itie mi nọ ami ñka ñkebọñ akam." 37 Anye amaadat Pita ye nditọ ideen Sebidi iba akaa do, ndin anye amaatọọñọ akop akpọsọñ mfʌhọ, anyʌñ aba anye mfịna-mfịna. 38 Anye ndin amaabo ammọ ate, "Ukpọñ mmi ayọhọ ye mfʌhọ tutu akpere ñkpa. Itie mi inyʌñ itaba idab ye ami."

39 Ke amaanake asaña aka iso etək, anye amaaduọ ke isọñ akʌp iso anyʌñ abọñ akam ate, "Ete mmi, akpedo usʌñ aba, ben kọọb ami fep nnọ miin. Ado ke ado ke uduak mmi, yak ado ke uduak mfo."

40 Anye amaatịmme abịne mme mbed amọ, ado akekịt nte ammọ esʌk edadaiya, anye amaabịp Pita ate, "Awuọñọ ndufo ikanna aditaba idab ye ami ke ukpọk awa keed? 41 Itaba idab inyʌñ ibọñ akam mbaak ndufo ididʌk idomo. Sịbidịd a-anyịmme, ado ikpọkidem a-akop mmemidem."

42 Anye amaatịmme akaa akebọñ akam ayọhọ akañ iba, "Ete mmi, akpedo kọọb ami ikemeke adimboiyo ibọhọke ami ñnwọñ anye, yak uduak mfo asu."

43 Ke ini anye aketịmmeke adi anye amaadikịt mme mbed amọ naña esʌk edadaiya, sia idab amaayeet ammọ. 44 Anye amaadakka akpọñ ammọ anyʌñ atịmme akebọñ akam ayọhọ akañ ita, asʌk abọñ kpa ukem ukod akam ado.

45 Akem anye amaatịmme abịne mme mbed amọ anyʌñ adibo ammọ ate, "Ndufo esʌk edadaiya enyʌñ eba ke nduọk adudu? Se ini akem, ndin eyaak Ayịn Awo esịn ke ubọk mme anam idiọọkñkpọ. 46 Idakka ida! Yak ñnyịn ika! Se awo antappa miin adiighe mi!"