Usiene Aka ke Usiene
38 "Ndufo emekop ke emaebo ‘Anyen aka ke anyen, eded anyʌñ aka ke eded.’ 39 Ado ami ibo ndufo, ikiisio idiọọk awo usiene idiọọk. Utu ke ado, awo ndomokeed akpusiak fiin ufia ke mbañ ubọk nnasia, kanna mbañ edem uko nọ anye umia ñko. 40 Ñko adieke awo ndomokeed ayemme adukoot fiin ikpe ke esob nọ ubọ afọñ anyọñidem mfo, nọ anye afọñidem mfo kọrọ. 41 Awo ndomokeed akpukpak fiin nọ asaña itiad keed ye anye, kappa saña itiad iba. 42 Nọ awo u-ubeeñeke fiin ñkpọ, kuunyʌñ utre adinọ awo a-ayemme ewuọd uto fiin.
Adima mme Asua
43 "Ndufo emekop ke ekebo, ‘Ma mbọhọidʌñ mfo nyʌñ sua awo usua mfo.’ 44 Ado ami ibo ndufo, ima mme asua ndufo inyʌñ ibọñ akam inọ mbon i-ikọbọke ndufo, 45 nọ ndufo edo nditọ Ete ndufo a-abaaha ke hefịn; sia unwana utịn amọ ayayamma anọ nti ye ndiọi awo, anyʌñ anọ nti ye ndiọi awo edịm ukem-ukem. 46 Adieke ndufo emaaha mbon i-imaaha ndufo ikpọọñ, nsoo udod ke ndufo ediibọ? Idooho kpa ntoro ke mbon ubọ taks enam? 47 Ñko, ndufo ekpekọọm mbon ndufo ikpọọñ, nsoo ke ndufo enam ekan mbon mfen? Nte mbon i-imiidiọọñọke Abasi isinyʌññọ inam ukem ado? 48 Ana ndufo efọn ema, kpa naña Ete ndufo ke hefịn afọn ama.