Adinọ mme Uweene Ñkpọ
1 "Ikpeme idem ndufo, ikiinam nti ñkpọ ndufo ke iso mme awo ibo yak ammọ ikịt. Ekpenam ntom, ndufo idiibọọhọ Ete ndufo a-abaaha ke hefịn utịb.
2 "Ke ntoro, imainọ uweene ñkpọ, ikiisaña ifịt adukpoñ ikanna, itañ anwa-anwa naña mbon mbubịk esinam ke mme sinakọk ye ke mme efaak nọ ebọ itooro mbon awo. Akpanikọ ke idọkkọ ndufo, ammọ e-ebọbọ utịb ammọ. 3 Ado ndufo imainọ uweene ñkpọ, ikiiyak ubọk ufiin ndufo adiọọñọ se ubọk nnasia anam, 4 nọ enọ ndufo ado ke ndịbe. Ndin Ete ndufo a-akịtte se ndufo enam ke ndịbe ayainọ ndufo utịb.
Akam
5 "Ñko ke ini ndufo ebọññọ akam, ikiinam nte mbon mbubịk, sia ammọ esima adida ke mme sinakọk ke mme inuuk efaak nọ mme awo ekịt ammọ. Ntañ akpanikọ inọ ndufo, ammọ ebọbọ utịb ammọ ayọhọ-ayọhọ. 6 Ado ndufo imaibọñ akam, idʌk esịd ubeed ndufo, ikʌk usʌñ inyʌñ ibọñ akam inọ Ete ndufo ke ndịbe. Ndin Ete ndufo a-akịtte afịd ñkpọ se enam ke ndịbe, ayainọ ndufo utịb.
Utreudia
16 "Ndufo imaitie utreudia, ikiikama iso mfʌhọ-mfʌhọ nte mbon mbubịk, sia ammọ esifiọmmọ iso nọ mme awo ediọọñọ ke mmimọ itre udia. Ntañ akpanikọ inọ ndufo, ammọ ebọbọ utịb ammọ ayọhọ-ayọhọ. 17 Ke ntoro, ndufo imaitie utreudia, iyie iso, inyʌñ ifiọññọ adan, 18 mbaak awo ndomokeed adidiọọñọ ke ndufo etre udia, ibọhọke Ete ndufo a-awo imiikịtte. Ndin Ete ndufo a-akịtte afịd se enam ke ndịbe, ayainọ ndufo utịb.