1 Yak afịd awo esuuk iwuod enọ mme adaiwuod ukara, sia ukara ndomokeed ibaaha ibọhọke anye a-Abasi anịmme. Mme andikara e-ebaññake edoñño mbon se Abasi amaakemek. 2 Ke ntoro, awo a-anwanake ye ukara anwana ye ukara a-Abasi amaakenịm, ndin mbon se inam ntoro eyaedat ubiomikpe enọ idem ammọ. 3 Sia mme adaukara idoññoke ñkpọ ndịk inọ mbon e-enaññake nti ñkpọ, ado edoñño ñkpọndịk enọ mbon e-enaññake ndiọi ido. Ndufo emeyem ibọkkọ ndịk awo a-abaaha ke ukara? Inam se inen, ndin anye ayaitooro ndufo. 4 Sia awo a-abaaha ke ukara ado ayịnufọk Abasi ke ufọn ndufo. Ado adieke enamma idiọọk, ikop ndịk, sia anye ikamake akañkañ amọ ke unana ntak. Anye ado isʌñutom Abasi, ndin a-anie unen adimia anam idiọọkñkpọ ufen. 5 Ke ntoro, a-adot adisuuk iwuod nnọọ ukara, idooho ke ntak umia ufen ikpọọñ, ado ke ntak eti akikere esịd ñko.

6 Ami ñko ado ntak a-ndufo ekpeeghe etịbe abio, sia mbon ukara edoñño nditọutom Abasi, e-eyaaha afịd ini ammọ esịn ke utom ukara. 7 Inọ afịd awo se ndufo ekama ammọ: Adieke afo akamake taks, kpe taks, adieke akamake utịb akʌk abio, kpe; adieke adooho uteeñe, nọ uteeñe; adieke adooho ukpono, nọ ukpono.

8 Inaaha awo ndomokeed akamaisọn, ibọhọke isọn adika iso mma emọ-emọ, sia awo akeedodo a-amaaha awo mfen a-anịm afịd mbed. 9 Mme mbed e-ebooho, "Kuusịn efịbe," "Kuuwot awo," "Kuuyịp inọ," "Kuusịn anyen ke ñkpọ awo," ye mme mbed mfen akeedodo, ekọñọ ke ewʌhọ keed ami: "Ma mbọhọidʌñ mfo nte idem mfo." 10 Ima inamma mbọhọidʌñ idiọọk. Ke ntak ami ima ado adinịm mbed ayọhọ-ayọhọ.

11 Ndin inam ami, sia ndufo emediọọñọ ini ami. Ini ado ami a-anaaha ndufo edemme ke idab, sia adinyaaña ñnyịn a-akpere idahami akan idaha a-ñnyịn ikitọọñọke inịm ke akpanikọ. 12 Ayio ayaasiere, ubakusen akpere. Ndin yak ñnyịn ikpọñ mme ndiọiñkpọ ekịm, iben afọñ ekọñ unwana isịne ke idem. 13 Yak ñnyịn idu uwem a-afọnnọ nte iba ke uweemeayio, idooho ke unana mfadidem ye ukpa mmịn, idooho ke abʌd-abʌd ido, me use me mbubiam eduuwem, idooho ke utọk me ke ufịb. 14 Ado iben Abọọñ Yisọs Krais isịne ke idem ndufo, ndin ikiikere adiyʌkkọ mme ndiọi udọñ abʌkidem ndufo.