1 Nsoo ndin ido udod a-abaaha ke adido Yuu, nsoo inyʌñ ido ufọn a-asịneke ke adifọọrọ edʌd? 2 A-afọn ke afịd usʌñ! Ke akpa ifed, eyaak ikọ Abasi esịn mme Yuu ke ubọk.

3 Yak ise ise, akpedo usʌk ammọ inịmme ke akpanikọ-ọ? Nte unana ammọ adinam akpanikọ ayaabiat akpanikọ Abasi? 4 Iyoo! Yak Abasi asʌk ado anam akpanikọ, akpekọm afịd awo edoñño mme asʌhọ nsu. Kpa naña ewet:

"Nọ ato do ewọt ke afo amenen ke se afo atañ,

anyʌñ anie edikan ke ini afo akpeeghe ikpe."

5 Ado adieke mme ukwañ ido ñnyịn asioho adinenido Abasi adaaha anwa-anwa, nsoo ndin ke ñnyịn idiitañ? Nte Abasi inenne ke adiben ifiobesịd amọ idot ñnyịn? (Ami ñkama eniin ifiọk awo ntañ ikọ.) 6 Idooho ntoro! Akpedo ado ntoro, Abasi akpenam die akpe ikpe ederimbod? 7 Awo akeme adifaaña mbo, "Adieke nsu-nsu uwem mmi anamma akpanikọ Abasi awuọ anyʌñ anam ubọọñ amọ akpon, nsoo ido ntak e-embiommo miin ikpe nte anam idiọọkñkpọ?" 8 Ntak a-awo imiitañña naña usʌk awo ebo ke ñnyịn ibo "Yak ñnyịn inam idiọọkñkpọ nọ nti ñkpọ awuọ adi-e?" Ubiomikpe ammọ adot.

9 Nsoo ido utịd iwuod ikọ ñnyịn ndin? Nte ñnyịn imifọn ikan ammọ? Idooho ntoro! Ñnyịn imiwọwọt ibo ke mme Yuu ukem-ukem ye mme Gentile eba ke idak idiọọkñkpọ. 10 Nte naña ewet:

"Ibaaha awo se inen, ibaaha awo ndomokeed;

11 ibaaha awo keed se ñkpọ anwaña;

ibaaha awo ndomokeed a-ayemme Abasi.

12 Afịd ammọ e-ekpọñ usʌñ,

afịd ediana keed ekappa mme ñkpafi;

ibaaha awo keed a-anamma eti,

ibaaha awo ndomokeed."

13 "Usʌñ itọñ ammọ edoñño mme anainwañ udi;

edeme ammọ enam abiaña."

"Idiọọk ifod udʌkikọd ayọhọ ñkpọkinua ammọ."

14 "Mme inua ammọ eyọhọ ye nsueñ ye idiọọkesịd."

15 "Ñkpad ammọ esọp ke uduọk iyiib;

16 atahade ye ukuud eyọhọ usʌñ ammọ,

17 ndin usʌñ emem, ammọ idiọọñọke,"

18 "Mbaak Abasi ibaaha ammọ ke idem."

19 Idahami ñnyịn imidiọọñọ ke se adodo a-mbed atañña, atañ anọ mbon e-ebaaha ke idak mbed, nọ afịd ederimbod edisịne ke ubiireikpe Abasi. 20 Ke ntak ado awo ndomokeed idooho adinen ke iso Abasi ke adinịm mbed; utu ke ado, ato ke mbed ñnyịn idiọọñọ idiọọkñkpọ.

21 Ado idahami e-enam ediọọñọ adinenido a-atooho Abasi, ke esioho mbed efep: Mbed ye mme Prọfed edoñño mme ntiense. 22 Adinenido ato Abasi ke mbuọdidem ke Yisọs Krais anọ afịd mbon se inịm ke akpanikọ. Ukpʌhọ ndomokeed ibaaha ke ufọọd mme Yuu ye mme Gentile, 23 sia afịd awo e-enam idiọọkñkpọ enyʌñ ewuọ ekpọñ ubọọñ Abasi. 24 Afịd awo enyʌñ e-ekịt unen ke mfọn a-atooho adifak ake Krais Yisọs. 25 Abasi amaanọ Krais nte uwa a-akpeeghe isob asio awo ke idiọọkñkpọ ato ke iyiib amọ a-anaaha ebọ eto mbuọdidem. Anye akenam ami adiwọt ido amọ sia ke adiyọ ammọ anye amaafeen mme idiọọkñkpọ e-ekenamma ke usen edem, inyʌññọ imia ammọ ufen. 26 Abasi akenam ami adiwọt adinenido amọ ke ayio ami, nọ anye anen anyʌñ ado andinam mbon e-enịmme Yisọs ke akpanikọ enen.

27 Ñwọkinua ñnyịn ndin asịne ke nsoo? E-esio anye ado efep. Ke ntak mbed akee? Me ke mbed asañake ye utom? Iyoo, ado ke ntak mbed ayemme mbuọdidem. 28 Sia ñnyịn isʌk ibo ke awo anen ato ke mbuọdidem, ke aboiyoke adinam se mbed abo enam. 29 Me nte Abasi ado Abasi mme Yuu ikpọọñ? Nte anye idooho Abasi mme Gentile ñko? Ii, ake mme Gentile ñko, 30 sia ado Abasi keed kpọd aba, a-adiinọ mbon e-efọọrọke edʌd ke mbuọdidem unen ye mbio imiifọọrọke edʌd kpa ke ntak mbuọdidem keed ado. 31 Nte ñnyịn ndin imibiat mbed ke ntak mbuọdidem ami? Idooho ntoro! Utu ke ado, ñnyịn isọọsọọñọ mbed.