1 Yems, isʌñutom Abasi ye ake Abọọñ Yisọs Krais, awet ñwed ami anọ esiin duob mme iba e-esuanake ke atu mme idịd. Ami mmikọọm ndufo.

2 Idat ami ke ataa idaara, nditọeka* mmi ke Krais, ini keed akeedodo a-ndufo ekịtte ndutʌhọ ke nsio-nsio usʌñ, 3 sia ndufo emediọọñọ ke adidomo mbuọdidem ndufo anam ndufo enie ataa ime. 4 Iyak ime akweeñe utom amọ nọ ato do ndufo ediọọñọ idem ayọhọ-ayọhọ, inanake ñkpọ ndomokeed. 5 Adieke awo ndomokeed ke atu ndufo ananake aniọñ, yak anye abeeñe Abasi, a-anọọhọ afịd awo ke ntadubọk, ikịtte ndudue ndomokeed, ndin eyaenọ anye. 6 Ado anye amaabeeñe, ana anye anịm ke akpanikọ, inieghe eyịghe, sia awo a-anieghe eyịghe aba nte mbufuud mmọọñ, a-afịm afịtte anyʌñ atop. 7 Utọ awo ado ikpinaaha akere ke imọ iyaibọ ñkpọ ndomokeed ito Abọọñ. 8 Utọ awo ado aba nte awo esịd iba, inieghe iwuuk ke afịd se anye anam.

9 Ayịneka a-anịmme Abasi ke akpanikọ a-abaaha ke usuuhọ itie akpena adaara sia anye a-akpon ke iso Abọọñ. 10 Ado mbon imọ akpena enem esịd ke ini Abasi asuuhọke ammọ itie, sia ukuud ammọ ayaaboiyo afep nte ñkpokpoñ ke ikọd. 11 Sia utịn asakka ye akpọsọñ ufiob anyʌñ ayeeme se etọ; nseghe ñkpokpoñ ayeppe ndin uyai amọ abiara. Ke ukem usʌñ ado, mbon imọ eyaeduọ ke ini ammọ esʌkkọ ekaiso ke ndubeghe ammọ.

12 Afọfọn anọ awo a-anieghe ime ke ini anye akịtte idomo, sia anye amaaboiyo idomo, anye ayaabọ anyanya uwem A-Abasi akenwọñọke anọ mbon e-emaaha anye.

13 Ke ini idomo, yak awo ndomokeed akuubo, "Abasi andomo miin." Sia idiọọkñkpọ ikanna idomo Abasi, anye ñko inyʌññọ idomo awo ndomokeed; 14 ado edomo awo keedekeed ato ke idiọọk udọñ amọ, edʌt anye esio ndin etap anye. 15 Ndin idiọọk udọñ amaayommo, anye aman idiọọkñkpọ, ndin idiọọkñkpọ amaakpon ama, aman ñkpa.

16 Ikiiyak awo ibiaña ndufo, ndima nditọeka ke Krais. 17 Afịd nti ñkpọ ye afịd mfọnmma enọ eto anyọñ, esọiyọ eto Ete unwana a-hefịn, i-imiikpəhọke nte mme ndukpọñ ekpuuñọke. 18 Anye amaamek adibon ñnyịn nto ikọ akpanikọ, nọ ato do ñnyịn ido nte akpa mfịd ke atu afịd se anye abot.

19 Mme ndima nditọeka ke Krais, idat ukpeebñkpọ ito ñkpọ ami. Yak afịd awo esọp adikop, ado ke esọp aditañ, ñko ke esọp adiyat esịd, 20 sia iyadesịd awo idatta adinen uwem A-Abasi ayemme idi. 21 Ke ntoro, isịññe mme afịd mbubiam eduuwem ye uwak idiọọkñkpọ a-abaaha ini ami, ndin ke nsuukidem inyịmme ikọ a-atọọhọ ke esịd ndufo a-akemeke inyaaña ndufo.

22 Ikiikpañ utọñ ikop ikọ kpọd, ndin ndufo ebiaña idem ndufo. Inam se ikọ atañ. 23 Awo akeedodo a-akpaña utọñ akop ikọ ado inamma se ikọ atañ aba nte awo a-aseeghe iso amọ ke ukịdiso, 24 ndin amaase ama adakka, ke ndo-ndo ado anye afre naña anye aba. 25 Ado awo a-asọññọ anyen ase mfọnmma mbed a-asioho awo ke ufʌn anyʌñ akaiso anam ami, ifreke se anye akekop, ado akaiso anam anye, eyaediọñ anye ke se anye anam.

26 Mbon e-edatta idem ammọ nte mme akpono Abasi ado ammọ imʌmmọ edeme ammọ ke akpọsọñ ubọk, ebiaña idem ammọ, ndin ukpono Abasi ammọ ado ikpu-ikpu. 27 Edu ukpono A-Abasi Ete ñnyịn adatta nte adisana ye anana ndo ado ami: Adise ñkpọ mbaña nditọ akpa ye mme ebekpa ke ini nnananyen ammọ ye awo adinịm idem amọ asana mbaak ederimbod edibiat anye.