1 Nditọeka mmi ke Krais, ikpinaaha uwak ndufo edo mme andikpeeb, sia ndufo emediọọñọ ke eyaekpe ikpe ñnyịn mme andikpeeb ke akpọsọñ usʌñ akan ake mbon mfen. 2 Afịd ñnyịn imiduọ ke uwak usʌñ. Awo ndomokeed i-imiinamma ndudue ke se anye atañ ado awo a-afọnnọ ama, a-akemekke adinie mfarakeidem.

3 Ñnyịn imaidọñ ntək ukwak ke inua enañmbakara adinam ammọ ekop uyio ñnyịn, ñnyịn imikan iwọññọ afịd idem enañ ado naña ñnyịn iyeyem. 4 Idat nsʌñikañ ñko nte uwọdñkpọ. Akpesʌkado a-ammọ ekponno eti-eti ndin akpọsọñ afịm anyʌñ awat ammọ, ado ekama ataa etək-etək ukpadñkpọ uwat ubom ewat ammọ, enyʌñ ewọññọ ammọ ekaa itie a-adoohodo a-andiwad ayemme ammọ eka. 5 Ntoro ñko, edeme ado etək ndido idem, ado anye awọk inua ataa eti-eti. Kere naña edat etək ebəkikañ esịn ikañ ke ekamba akai. 6 Edeme ñko ado ikañ; anye afe idiọọkñkpọ ke atu mme ndido idem. Edeme abiat afịd idem awo, asịn ikañ ke afịd ikpeghe uwem, ndin enyʌñ esʌm nsi-nsi ikañ nsobo esịn ke anye.

7 Awo a-anam afịd uduud unam, afịd inuen, afịd unam enyọọnọnyọọn, ye afịd unam ke esịd mmọọñ esuuk iwuod enọ anye, 8 ado awo ndomokeed ikanna ikara edeme. Anye ado idiọọkñkpọ i-imiinieghe nduọkadudu, a-ayọhọke ye ataa idiọọk ibọk ñkpa.

9 Edeme ke ñnyịn idat itooro Abọọñ ye Ete ñnyịn, inyʌñ idat anye ñko isueñ mme awo, e-ebotto ke mbid Abasi. 10 Itooro ye nsueñ ato kpa inua keed ado awuọ. Mme nditọeka mmi ke Krais, ikpinaaha ado ntoro. 11 Nte nsana mmọọñ ye mmọọñ inʌñ ekeme edifeghe nto idịm keed ñwuọ? 12 Mme nditọeka mmi ke Krais, eto fik akeme inwịm ọlif, me eto sokoro akeme inwịm fik? Ntoro ñko, idịm mmọọñ inʌñ ikemeke adisio inem mmọọñ.

13 Anie awo inie aniọñ, ñkpọ anyʌñ anwaña anye ke atu ndufo? Yak anye aben awọt ke eti eduuwem amọ, ke adinam ñkpọ ke nsuukidem a-atooho ke aniọñ. 14 Ado adieke ndufo enieghe idiọọk isịnanyen ye udọñ ñkpoon ñkpọ ke esịd ndufo, ikiiwọk inua ibaña anye, ikiinyʌñ isịn adikịt akpanikọ. 15 Utọ "aniọñ" ado itooho hefịn isọiyọ idi, ado ato isọñ, idooho ake Sịbidịd, ado ake dimọn. 16 Sia itie ake ufịb ye udọñ adidia ñkpọ ikpọọñ abaaha, ndo ke afo ediikịt ndutịme ye afịd idiọọk eduuwem.

17 Ado aniọñ a-atooho hefịn ado adisana, ama emem, akere ñkpọ abaña mbon mfen, asuuhọ idem, ayọhọ ye mbọm ye nti mfịd, idaaha ñkañ keed anyʌñ anana abiaña ye unam ñkpọ anyen awo. 18 Mme anam emem e-etọọhọ ñkpasi ke emem edọk mfịd adinen ido.