1 Nsoo inam anwan ye utọk eba ke atu ndufo? Nte ammọ itooho mme udọñ ndufo enwanake ke idem ndufo? 2 Ndufo eyem ñkpọ ado inieghe, ndin ndufo ewot awo. Ndufo esịn anyen, ado ikanna inie se eyem, ndin ndufo e-etọhọ enyʌñ enwana anwan. Ndufo inieghe, sia ndufo ibeeñeke Abasi. 3 Ke ini ndufo ebeeñeke, ndufo ibọọhọ, sia ndufo ebeeñe ye idiọọk ntak, nọ ndufo ebiat se enie ke udọñ abʌkidem ndufo.

4 Ndufo mme asịn efịbe,* ado nte ndufo idiọọñọke ke ufan ye ederimbod ado usua ke ukañ Abasi? 5 Ado nte ndufo ekere ke ikọ Abasi atañ ke unana ntak ke Abasi anie akpọsọñ udọñ anọ Sịbidịd a-anye anamma adʌñ ke idem ñnyịn? 6 Ado anye inọ ñnyịn uwak mfọn. Ntak ado anam Ikọ Abasi abo:

"Abasi abiọọñọ mbon ntañidem,

ado anọ mbon nsuukidem mfọn."

7 Isuuk idem ndufo ndin inọ Abasi. Ibiọọñọ andidiọọk, ndin anye ayaafeghe ikpọọñ ndufo. 8 Isaña ikpere Abasi, ndin anye ayaasaña ikpere ndufo. Iyie ubọk ndufo, ndufo mme anam idiọọk, ndin inam esịd ndufo asana, ndufo mme anie esịd iba. 9 Itua, ifʌhọ, inyʌñ itie ikpo. Ikpəho imam ndufo isịn ke ntuaaña, inyʌñ ikappa inemesịd ndufo isịn ke mfʌhọ. 10 Isuuk idem ndufo ke iso Abọọñ, ndin anye ayaidịppe ndufo ke anyọñ.

11 Nditọeka* ke Krais, ikiibiat emọ-emọ awo anyịñ ke adisio anye ndo. Awo keed akeedodo a-atañña idiọọk ikọ abaña ayịnete amọ awodeen me awonwaan me abiom anye ikpe, anye a-abiat mbed anyʌñ akappa akpe ikpe anọ mbed. Afo umaubiere ikpe unọ mbed, afo unịmme mbed ado, ado atie adibiide ikpe nnọọ mbed. 12 Anọọmbed ye Abiideikpe keed kpọd aba, a-adooho anye a-akanna adinyaaña ñnyʌñ nsobo. Ado afo, afo ado anie adibiide ikpe nnọọ mbọhọidʌñ mfo?

13 Ndin ikpañ utọñ, ndufo e-ebooho, "Mfịn ami me ñkpọñ ñnyịn iyaikaa abio ami me abio ako, ikitie isua keed ke udo, inam ndubeghe inyʌñ inwana akʌk." 14 Ndufo idiọọñọke se idiitịppe ñkpọñ. Nsoo ido uwem ndufo? Ndufo edo ntuhube a-awuọhọ ke etək ini, ndin asop. 15 Utu ke ado, akpena ndufo ekap ebo, "Akpedo uduak Abọọñ, ñnyịn iyaidu uwem ndin iyainam ami me ako." 16 Naña aba ami, ndufo ewọk inua ke mme adinam ñkokkoidem ndufo. Afịd utọ ñwọkinua ado, ado idiọọkñkpọ. 17 Awo keed ndin akeedodo a-adiọọñọke eti ñkpọ a-anye akpenamma, ndin anye inamma, a-anam idiọọkñkpọ.