1 एक अगमवाणी:

याहवेहको वचन हद्राक सहरको विरुद्धमा छ,

र उहाँ दमस्कसमा आएर विश्राम गर्नुहुनेछ;

किनकि सबै मानिसहरू र इस्राएलका सबै कुलहरूका

आँखा याहवेहमाथि नै छन्;

2 अनि उहाँको दृष्‍टि हमातमाथि पनि छ, जो त्यसको सिमानामा छ;

अनि टायर र सीदोनमाथि छ, तथापि तिनीहरू अति धेरै दक्ष छन्।

3 टायरले आफ्नो लागि एउटा बलियो किल्‍ला बनाएको छ;

त्यसले चाँदी धुलोझैँ,

र सुन सडकको फोहोरझैँ थुपारेको छ।

4 तर प्रभुले त्यसको सम्पत्ति खोस्‍नुहुनेछ,

र त्यसको शक्तिलाई समुद्रमा नाश पारिदिनुहुनेछ;

अनि त्यो आगोद्वारा भस्म हुनेछ।

5 अश्कलोनले त्यो देख्नेछ र डराउनेछ;

गाजा सहर कष्‍टले छटपटाउनेछ;

अनि एक्रोन सहर पनि त्यसको आशा हराउनेछ,

र गाजा सहरले आफ्नो राजा गुमाउनेछ;

अनि अश्कलोन उजाड हुनेछ।

6 विदेशीहरूले अश्दोदलाई कब्जा गर्नेछन्;

अनि म पलिश्तीहरूको घमण्डलाई नष्‍ट गरिदिनेछु।

7 म तिनीहरूका मुखबाट रगत

र तिनीहरूका दाँतका बीचबाट घृणित कुरा खोस्‍नेछु।

तिनीहरूबाट बचेका जतिचाहिँ हाम्रा परमेश्‍वरका हुनेछन्,

र तिनीहरू यहूदाको वंशजस्तै हुनेछन्;

एक्रोनचाहिँ यबूसीहरूजस्ता हुनेछन्।

8 तर म मेरो भवनलाई आक्रमणकारीबाट

रक्षा गर्न चारैतिर छाउनी बनाउनेछु।

कुनै पनि अत्याचारीले मेरा मानिसहरूलाई फेरि कहिल्यै जित्नेछैन;

किनकि अहिले मैले निगरानी गरिरहेको छु।

9 हे सियोनकी छोरी, खूब आनन्द गर्!

यरूशलेमकी छोरी, चर्को सोरमा करा!

हेर्, तेरो राजा तँकहाँ आउँदैहुनुहुन्छ;

उहाँ धार्मिक र विजयी हुनुहुन्छ;

नम्र र गधामाथि सवार हुनुभएर आउनुहुन्छ;

गधाको एउटा बछेडामाथि सवार भएर आउँदैहुनुहुन्छ।

10 म एफ्राइमबाट लडाइँका रथहरू

र यरूशलेमबाट युद्धका घोडाहरू नष्‍ट गर्नेछु;

अनि युद्धको धनु भाँचिनेछ।

उहाँले राष्ट्रहरूलाई शान्ति घोषणा गर्नुहुनेछ।

उहाँको राज्य शासन एउटा समुद्रदेखि अर्को समुद्रसम्म

र यूफ्रेटिस नदीदेखि पृथ्वीको अन्तसम्म नै फैलिनेछ।

11 तेरो विषयमा चाहिँ तँसँग भएको मेरो रगतको करारको कारण,

म तेरा कैदीहरूलाई पानीविनाको खाडलबाट मुक्त गरिदिनेछु।

12 हे आशावादी कैदीहरू, तिमीहरू आफ्ना बलियो किल्‍लातिर फर्क;

अहिले पनि म घोषणा गर्छु, कि म तिमीहरूलाई दोबर गरी पुनर्स्थापित गर्नेछु।

13 म यहूदालाई मेरो धनु दोबारेझैँ दोबार्नेछु,

र त्यसलाई एफ्राइमले भरिदिनेछु।

हे सियोन, म तेरा छोराहरूलाई,

ग्रीसका छोराहरूको विरुद्धमा सुर्‍याउनेछु;

अनि सियोनलाई एउटा योद्धाको तरवारझैँ बनाउनेछु।

14 त्यसपछि याहवेह तिनीहरूमाथि देखा पर्नुहुनेछ;

उहाँको वाण बिजुलीझैँ चम्कनेछ।

सर्वशक्तिमान् याहवेहले तुरही फुक्नुहुनेछ;

उहाँ दक्षिणका आँधीहरूमा आउनुहुनेछ;

15 अनि सेनाहरूका याहवेहले तिनीहरूलाई रक्षा गर्नुहुनेछ।

तिनीहरूले नाश गर्नेछन्,

र घुयेँत्रोका ढुङ्गाहरूले परास्त गर्नेछन्।

तिनीहरूले पिउनेछन् र मद्य पिएझैँ गर्जनेछन्;

तिनीहरू वेदीका कुनाहरूमा राखिएका

ठूला-ठूला छर्कने कचौराजस्तै भरिनेछन्।

16 त्यस दिन याहवेह तिनीहरूका परमेश्‍वरले

गोठालोले आफ्ना बगाललाई बचाएझैँ बचाउनुहुनेछ।

उहाँको देशमा तिनीहरू

मुकुटका चम्किला रत्नझैँ चम्कनेछन्।

17 तिनीहरू अति आकर्षित र सुन्दर हुनेछन्!

जवान मानिसहरू अन्‍नले हृष्‍टपुष्‍ट हुनेछन्,

र जवान स्त्रीहरूचाहिँ नयाँ दाखमद्यले आनन्दित हुनेछन्।