1,2 Mɔlebɛbo ne ɛnee Edwɛkɛ ne wɔ ɛkɛ, na Edwɛkɛ ne nee Nyamenle a wɔ ɛkɛ a, yɛɛ Edwɛkɛ ko ne ala a le Nana Nyamenle. Mɔlebɛbo ne ɛnee ɔ nee Nyamenle a wɔ ɛkɛ a, na debie biala mɔɔ bɛyɛle la, bɛluale ɔ nwo zo a bɛyɛle a. 3 Yemɔ a ɔbɔle ninyɛne muala a, na debie biala ɛnle ɛkɛ mɔɔ bɛhoatile ye a bɛbɔle a. 4 Yemɔ a le Damɛnlangoate ngoane a, ngoane ne mɔɔ le kɛnlaneɛ mɔɔ ɔta ɔmaa ewiade amra amuala la. 5 Yemɔ a le Kɛnlaneɛ ne mɔɔ ɔta awozinli nu mɔɔ awozinli ɛngola ɔ nwo zo keda la.

6,7 Nyamenle zoanle nrenyia bie mɔɔ bɛfɛlɛ ye Dwɔn la kɛ ɔrali Kɛnlaneɛ ne anwo daselɛ. 8 Tɛ Dwɔn mumua ne a le Kɛnlaneɛ ne a; na emomu yemɔ ɔralile Kɛnlaneɛ ne anwo daselɛ ala. 9 Kɛnlaneɛ ɛhye a le nɔhalɛ Kɛnlaneɛ ne mɔɔ ɛlɛba arada aleɛabo amuala a.

10 Ɔwɔ ewiade, yɛɛ ɔdaye a ɔbɔle ewiade a, noko akee ewiade amra annwu ye. 11,12 Wɔ ɔdaye ye maanle nu, ɔ nee wɔ ɔdaye ye menli, Dwuuma ne mɔ avinli bɔbɔ, bɛanlie ye bɛando nu. Menli ekyii bie ala a liele ye a. Na bɛdabɛ mɔɔ bɛliele ye noko la, ɔmaanle bɛ tumi kɛ bɛyɛ Nyamenle amra. Mɔɔ hyianle ala la a le diedi mɔɔ bɛkɛnyia ye wɔ ye ngoanelielɛ tumi ne anu la. 13 Bɛdabɛ mɔɔ bɛdie ɛhye bɛdi la nyia awolɛ fofolɛ, tɛ nwonane nu awolɛ mɔɔ ɔvi sonla akɔnɔ nu la ɔ, na emomu mɔɔ vi Nyamenle ɛhulolɛdeɛ nu la ɔ.

14 Na Edwɛkɛ ne rayɛle Sonla na ɔ nee yɛ dɛnlanle, nla ɛlolɛ nee nɔhalɛ yile ye tɛkɛɛ. Na yɛ nuhua bie mɔ ɛnwu ye anyunlunyia ne mɔɔ kile kɛ amgba yemɔ a le Selɛ bedevinli ne Ara kotokokye ne la.

15 Dwɔn lile ɔ nwo daselɛ zele kɛ, "Ɛhye a ɛnee melɛka ɔ nwo edwɛkɛ kɛ, ‘Awie bie mɔɔ le kpole tɛla me la ɛlɛba, ɔluakɛ, mɔlebɛbo ne ɛnee ɔwɔ ɛkɛ la.’ "

16 Na wɔ ye ɛlolɛ totohyia ne anu yɛɛ yɛdayɛ noko yɛnyia bie a. 17 Mɛla ne yemɔ ɔlua Mosisi anwo zo a yɛ sa hanle ye a, na ɛlolɛ ne nee nɔhalɛ ne ɛdeɛ, yemɔ ɔvi Gyisɛse Kelaese. 18 Awie biala ɛtɛnwunle Nana Nyamenle ɔ nye zo ɛlɛ, na ɔ Ra kotokokye ne mɔɔ ɔ nee ye wɔ ɛkɛ la yemɔ ɔze ye, na yemɔ a yela ye ali noko yehile yɛ a.

19 Dwuuma mgbanyima ne mɔ zoanle bɛ azɛlɛvolɛ nee azɛlɛvolɛ boavolɛma vile Gyɛlusalɛm kɛ bɛhɔbiza Dwɔn kɛ saa yemɔ a le Ngoanedievolɛ ne la a.

20 Na Dwɔn buale bɛ wienyi kɛ, "Tɛ mame a le Kelaese ne ahaa o."

21 Bɛbizale ye kɛ, "Na nwane a le wɔ? Wɔmɔ a le Yilaegya anzɛɛ?" Ɔbuale bɛ kɛ, "Kyɛkyɛ." Eza bɛbizale ye kɛ, "Ɛnee wɔmɔ a le Kapezonli ne anzɛɛ?" Ɔbuale bieko ɔzele kɛ, "Kyɛkyɛ."

22 Akee bɛzele ye kɛ, "Ɛnee akee nwane a le wɔ? Ka kile yɛ, amaa yɛanwu mɔɔ yɛkaha yɛahile menli mɔɔ zoanle yɛ la. Duzu a ɛlɛ ye ɛka wɔ ɛdawɔ mumua ne ɛ nwo a?"

23 Ɔbuale bɛ kɛ, "Mame a le ɛnelɛ ne mɔɔ ɛlɛtea nu wɔ fiemgbole ne azo kɛ, ‘Bɛziezie Awulae adenle ne anu!’ kɛmɔ kapezonli Ayezaya hanle la."

24,25 Akee Falasiima ne mɔ mɔɔ wɔ ɛzoavolɛma ne mɔ anu la bizale ye kɛ, "Saa tɛ wɔmɔ a le Ngoanedievolɛ ne anzɛɛ Yilaegya anzɛɛ Kapezonli ne a, ɛnee akee duzu tumi a ɛlɛ kɛ ɛkɛzɔne menli a?"

26 Dwɔn buale bɛ kɛ, "Mame nzule ala a mefa mesɔne a, na awie bie wɔ menli dɔɔnwo ɛhye anu ɛke kɛkala mɔɔ bɛtɛyiale ye ɛlɛ a, 27 na ɔnrɛhyɛ biala ɔbabɔ ye gyimayɛlɛ ne abo wɔ bɛ nu, na ye mgbɔlaboa ne bɔbɔ mɔɔ ɔwula la, memfɛta kɛ menwɔzanyi ye nyɛma ne bɔbɔ."

28 Ɛhye zile wɔ Bɛtani mɔɔ le namule bie mɔɔ wɔ Azule Dwɔdan ne anzi, ɛleka mɔɔ ɛnee Dwɔn ɛlɛsɔne menli la.

29 Aleɛ hyenle la, Dwɔn nwunle Gyisɛse kɛ ɔlɛba ɔ nwo ɛkɛ ne, na ɔdeanle nu ɔzele kɛ, "Bɛnlea! Nyamenle Boane Ralɛ ne mɔɔ ye aleɛabo ɛtane la a ɛlɛba la! 30 Yemɔ yɛɛ menlile ɔ nwo daselɛ kɛ, ‘Sonla bie mɔɔ tɛla me kpole mɔɔ mɔlebɛbo ne ɛnee ɔwɔ ɛkɛ la ɛlɛba la.’ 31 Ɛnee medame bɔbɔ menze ye, zɔhane ati melɛfa nzule meazɔne menli amaa ɔlua zo meala ye ali meahile Yizilayɛ maanle ne."

32 Akee Dwɔn lile daselɛ kɛ, "Menwunle Sunsum ne kɛ ɔvi anwuma maanle ne anu kɛ aabule la yedwu yeradɛnla Gyisɛse ati zo."

33 Eza Dwɔn hanle ye bieko kɛ, "Ɛnee menze kɛ yemɔ ɔ, na mekɛ mɔɔ Nana Nyamenle zoanle me kɛ mengɔnzɔne menli la, ɔzele me kɛ, ‘Saa ɛnwu kɛ Sunsum Nwuanzanwuanza ne ɛlɛdwu awie bie anwo zo a, ɛnee ɛze kɛ mɔɔ ɛ nye la ye adenle ne la ɛne. Yemɔ a le ahenle ne mɔɔ fa Sunsum Nwuanzanwuanza ne yeazɔne la.’ 34 Menwunle kɛ ɛhye ɛzi pɛpɛpɛpɛ wɔ nrenyia ɛhye anwo zo, na ɛhye ati noko a melɛdi daselɛ kɛ yemɔ a le Nyamenle Ra ne la a."

35 Aleɛ hyenle mɔɔ ɛnee Dwɔn nee ye ɛdoavolɛma ne mɔ nwiɔ gyi ɛkɛ la, 36 bɛnwunle kɛ Gyisɛse ɛlɛpɛ nu. Dwɔn nleanle ye koonwu na akee ɔdeanle nu ɔzele kɛ, "Bɛnlea! Nana Nyamenle Boane Ralɛ ne ɛne!"

37 Dwɔn ɛdoavolɛma nwiɔ ne dele ɛhye la bɛlile Gyisɛse anzi.

38 Gyisɛse dole ɔ nye ɔ nzi na ɔnwunle kɛ bɛdoa ye la, ɔzele bɛ kɛ, "Duzu a bɛkpondɛ a?"

Bɛzele ye kɛ, "Kilehilevolɛ, nienwu a ɛde a?"

39 Na ɔzele bɛ kɛ, "Bɛrɛla na bɛranlea." Ɔti bɛ nee ye hɔle ɛleka mɔɔ ɔde la, na bɛ nee ye dɛnlanle hɔkpulale nɔsolɛ. 40 Dwɔn ɛdoavolɛma nwiɔ ne mɔɔ ɔvale Gyisɛse ɔhilele bɛ na bɛlile ɔ nzi la anu ko a le Andelu, Saemɔn Pita adiema ne.

41 Andelu nwunle ɔ diema Pita la ɔzele ye kɛ, "Yɛnwu Ngoanedievolɛ ne!" 42 Akee ɔ nee Pita bɛhɔle Gyisɛse ɛkɛ.

Gyisɛse nleanle Pita koonwu na ɔzele ye kɛ, "Wɔmɔ a le Saemɔn, Dwɔn ara nrenyia ne, noko akee bɛbavɛlɛ wɔ Sifase anzɛɛ Pita, mɔɔ ɔ bo a le kɛ, ‘Bolɛ’ la!"

43 Aleɛ hyenle la Gyisɛse yɛle ye adwenle kɛ ɔkɔ Galeli. Na ɔnwunle Felepe na ɔzele ye kɛ, "Badoa me!" 44 Felepe vi Bɛteseeyeda, mɔɔ le Andelu nee Pita bɛ sua zo.

45 Akee Felepe nwunle Natanayɛle na ɔzele ye kɛ, "Yɛnwu Ngoanedievolɛ ne, sonla holɛ ko ne mɔɔ Mosisi nee kapezoma ne mɔ hanle ɔ nwo edwɛkɛ la! Ye duma a le Gyisɛse, Dwosefi ara ne mɔɔ vi Nazalɛte la."

46 Natanayɛle deanle nu zele, kɛ, "Nazalɛte! Debie kpalɛ bie bahola avi ɛkɛ ne avinde ɔ?" Felepe buale ye kɛ, "Saa adalɛ a melɛbɔ a, ɛdawɔ bɛla banlea ye ɛ nye zo."

47 Na mɔɔ bɛkpukele nehane la, Gyisɛse nwunle Natanayɛle kɛ ɔlɛba ɔ nwo ɛkɛ, na ɔzele kɛ, "Bɛnlea, Yizilayɛnli tɛnye tɛnye mɔɔ evinli biala ɛnle ɔ nwo la ɛne."

48 Natanayɛle deanle nu zele kɛ, "Kɛ ɛsi mɔɔ ɛkola ɛnwu me sonla holɛ ɛ?"

Gyisɛse buale kɛ, "Ɛdawɔ mumua ne menumuale menwunle wɔ wɔ mgbɔvonle baka ne abo kolaa na Felepe avɛlɛ wɔ."

49 Natanayɛle buale kɛ, "Yɛmenle, nɔhalɛ, ɛle Nyamenle Ra, Yizilayɛ Belemgbunli ne!"

50 Gyisɛse bizale ye kɛ, "Ɛnee kɛmɔ mese menwunle wɔ wɔ mgbɔvonle baka ne abo lɔ la ati a akee wɔlie wɔli anzɛɛ? Bɔ zo mɔɔ akee ɛbanwu sɛkɛlɛndeɛ mgbole mɔɔ tɛla ɛhye bɔbɔ a. 51 Nɔhalɛ nu, nɔhalɛ nu, mese wɔ kɛ, ɛbanwu kɛ anwuma maanle ne ɛbuke wienyi na akee Nana Nyamenle anwumabɔvolɛma ne mɔ ɛlɛdi anwuma nee aze akɔneaba wɔ Sonla Ra ne anwo."