1 Mekɛ ne anu Gyisɛse zele kɛ, "Nɔhalɛ nu, nɔhalɛ nu, mese bɛ kɛ awie biala mɔɔ ɛnva mboane tunli anlenkɛ kpole ne anu na ɔpe ɛleka gyɛne kolaa na yeahɔ nuhua la le awule, eza ɔle kodiawu! 2 Ɔluakɛ boaneneavolɛ biala pe anlenkɛ wienyi ne anu a kɔ ye mboane tunli nu a. 3 Saa ɔdwu tunli ne anloa a anlenkɛ sinzavolɛ ne buke ye, na kɛ mboane ne mɔ noko te ɔ ne la ɛnee bɛra; akee ɔfɛlɛ ye mboane deɛ ne mɔɔ wɔ nu la ɔbobɔ bɛ anluma ngoko ngoko na ɔ nee bɛ finde kɔ. 4 Ɔdi bɛ nyunlu; yɛɛ bɛdabɛ noko bɛtoa ye, ɔluakɛ bɛze ɔ ne. 5 Saa ahenle le ɛyɛvolɛ a bɛndoa ye, emomu bɛnriandi bɛfi ɔ nwo ɛkɛ, ɔluakɛ bɛnze ɔ ne."

6 Menli mɔɔ dele Gyisɛse ɛrɛlɛbulɛ ɛhye la ande ɔ bo, 7 ɔti ɔhilele ɔ bo ɔhilele bɛ.

Ɔzele kɛ: "Mame a le mboane ne mɔ bɛ Anlenkɛ Kpole ne a. 8 Bɛdabɛ mɔɔ bɛlumuale me nyunlu la amuala le nwule. Ɔti mboane ne mɔ biala andie bɛ. 9 Nɔhalɛ nu, mame a le Anlenkɛ Kpole ne a. Bɛdabɛ mɔɔ bɛfa Anlenkɛ Kpole ne anu bɛba tunli ne anu la banyia ngoane, na bɛbawolo nu, bɛavinde na bɛanyia ndile dɔɔnwo noko bɛali. 10 Awule biala bodane mɔɔ gyi ɔ nyunlu la a le kɛ ɔkɛwua, anzɛɛ ɔkɛhu bɛ na ɔkɛzɛkye bɛ. Mame noko me bodane mɔɔ gyi me nyunlu la a le kɛ menwɔmaa bɛ ngoane wɔ adenle biala mɔɔ ɔfɛta la anu.

11 "Mame a le Boaneneavolɛ Kpalɛ ne a. Boaneneavolɛ Kpalɛ ne fa ye ngoane bɔ azu maa ye mboane ne. 12 Ɛkpavo ne mɔ yemɔ mboane ne mɔ ala a ɔnea zo a; saa ɔnwu kɛ bɛdi ɛlɛba a ɔnriandi ɔgyakyi mboane ne mɔ ɛkɛ ne, ɔluakɛ tɛ ye deɛ ɔ. Ɔti bɛdi ne wulu tɔ bɛ nu na ɔbɔ mboane ekpunli ne asande. 13 Deɛmɔti ɛkpavo ne nriandi la a le kɛ, ɔrale ɔbali ye ɛkpa ala, na tɛ mboane ne mɔ anwo mɔɔ hyia ye la ati ɔ.

14 "Mame a le Boaneneavolɛ Kpalɛ ne mɔɔ meze me mboane, na me mboane ne mɔ noko ze me a. 15 Kɛmɔ Egya ne ze me, na medame noko meze ye la, zɔhane ala yɛɛ mefa me ngoane noko meto ye aze memaa me mboane ne mɔ a. 16 Melɛ mboane bie mɔɔ bɛnle ekpunli ye anu a, ɔti ɔwɔ kɛ mefa bɛdabɛ noko meba na bɛbatie me ne; amaa mboane ekpunli ne ayɛ ko wɔ Boaneneavolɛ ko abo.

17 "Selɛ ne kulo me edwɛkɛ, ɔboalekɛ meto me ngoane ne aze na ɔyɛ a eza meava ye bieko. 18 Awie biala ɛnrɛhola ɛnrɛhu me wɔ melɛ mɔɔ metɛmaanle ye adenle la. Meto me ngoane aze wɔ medame me ɛhulolɛ nu. Ɔluakɛ melɛ tumi kɛ meto ye aze yɛɛ eza melɛ tumi kɛ mefa ye bieko; ɛhye kile kɛ Egya a ɛva tumi ɛhye ɛmaa me a."

19 Mɔɔ ɔhanle edwɛkɛ ɛhye la, Dwuuma mgbanyima ne mɔ anloa anzɛ bɛ nwo wɔ nwolɛ bieko. 20 Bie mɔ zele kɛ, "Saa tɛ sunsum ɛtane a ɛdwu ɔ nwo zo a, ɛnee noko ɔ ti a ɛha ɔ nwo a. Asoo sonla mɔɔ bɛtie ye edwɛkɛ la ɛne?"

21 Bie mɔ noko zele kɛ, "Tɛ sunsum ɛtane edwɛkɛ a le ɛhye. Kɛ ɔsi mɔɔ sonla mɔɔ sunsum ɛtane wɔ ye nu la kola buke anyezinliravolɛ nye ɛ?"

22,23 Ɛnee ɔle ɛyɛlɛ mekɛ, na Gyisɛse wɔ Gyɛlusalɛm Asɔne Sua Kpole ne anwo Munzule Ɛkpalɛ Ɛvoyia ne abo. Ɔhɔle Asɔne Sua Kpole ne anu, ɔhɔwolole ɛleka ne mɔɔ bɛfɛlɛ ye Sɔlɔmɔn Asalo la. 24 Na Dwuuma mgbanyima ne mɔ bɔle yiale ye na bɛbizale ye kɛ, "Kenle nzu a ɛkɛye ɛ nwo ɛkɛhile yɛ a? Saa wɔmɔ a le Kelaese ne a, ɛnee ka ye nɔhalɛ wienyi kile yɛ."

25 Gyisɛse buale bɛ kɛ, "Meha mehile bɛ dɛbadɛba, noko bɛanlie bɛanli. Nwanwane ninyɛne ne mɔ mɔɔ medua Egya duma nu meyɛ la a le nwolɛ daselɛlilɛ a. 26 Noko bɛnlie me bɛnli, ɔboalekɛ bɛmboka me mboane ekpunli deɛ ne anwo. 27 Me mboane ne mɔ ze me, yɛɛ medame noko meze bɛ, ɔti bɛtoa me noko. 28 Bɛnwu ɛlɛ, ɔluakɛ memaa bɛ ngoane mɔɔ ɔnlɛ awieleɛ, yɛɛ awie biala noko ɛnrɛhola ɛnrɛlie bɛ ɛnrɛvi me sa nu. 29 Egya a vale bɛ maanle me a, na yemɔ noko ɔlɛ tumi ɔtɛla awie biala, zɔhane ati awie biala ɛnrɛwua bɛ ɛnrɛvi Egya asa anu. 30 Me nee Egya ne le ko."

31 Eza Dwuuma ne mɔ sesale awolɛ bieko kɛ bɛtoto bɛabɔ ye bɛahu ye.

32 Gyisɛse zele bɛ kɛ, "Ɔlua Nana Nyamenle ɔdaye ye tumi zo, meyɛ nwanwane gyima dɔɔnwo meva meboa menli; na akee nuhua ne boni ati a ɔlua zo bɛku me a?"

33 Bɛbuale ye kɛ, "Tɛ gyima kpalɛ ne mɔɔ wɔyɛ la ati a amaa yɛku wɔ a, na wɔ munzudwɛkɛ ne mɔɔ ɛka ye wɔ Nyamenle anwo la ati ɔ. Ɛle sonla ala, noko ɛse ɛle Nyamenle." 34-36 Ɔbuale bɛ kɛ, "Na bɛtɛkɛlɛle ye wɔ bɛ Mɛla ne anu kɛ, mevɛlɛ bɛ muala awozonle ɔ? Ɔti saa Ngɛlɛlera ne mɔɔ ɛngakyi ɛlɛ la se kɛ menli mɔɔ Nyamenle edwɛkɛ ne rale bɛ ɛkɛ la le nyamenle anzɛɛ awozonle a, ɛnee akee fane nyɛ yɛɛ saa ahenle ne mɔɔ Selɛ ne ɛde ɔ nwo na yezoa ye wɔ ewiade anu la se kɛ, ‘Mele Nyamenle Ra’ a, ɛnee bɛse yebɔ munzule ɛ? 37 Saa tɛ Egya gyima ne a melɛyɛ la a, ɛnee ɔngyia bɔbɔ kɛ bɛkɛlie me bɛkɛli. 38 Na saa yemɔ a melɛyɛ la a, ɛnee yemɔ saa bɛkpo kɛ bɛnrɛlie me bɛnrɛli bɔbɔ a, ɛnee bɛlie nwanwanedeɛ ne mɔɔ meyɛ la bɛli na bɛbanwu ye nɔhalɛ kɛ, Egya de me nu, yɛɛ medame noko mede ye nu."

39 Eza bɛbɔle ɔ bo kɛ bɛpe adenle bie anu bɛahye ye bieko, na ɔwolole bɛ sa abo ɔhɔle 40 Azule Dwɔdan ne anzi lɔ ɔhɔdɛnlanle ɛleka mɔɔ mekɛ ne anu Dwɔn Sɔnevolɛ ne dɛnlanle zɔnenle menli la. 41 Na menli dɔɔnwo doale ye wɔ ɛkɛ ne.

Bɛzele bɛ nwo ngoko ngoko kɛ, "Dwɔn anyɛ nwanwanendeɛ biala, noko mɔɔ ɔhanle ye wɔ nrenyia ɛhye anwo la amuala le nɔhalɛ." 42 Ɔti akee dɔɔnwo ne ala liele lile kɛ yemɔ a amgba ɔle Sonla Ra ne a.