1-3 Wɔ Akpabɛnwo Kenle ne nɔsolɛ nu, Gyisɛse nwunle kɛ ye melɛ ɛdwu mɔɔ ɔwɔ kɛ ɔfa ɔkɔ ɔ Ze anwo a. Mɔɔ bɛdi aleɛ la ɛnee Abɔnsam ɛmaa Saemɔn ara, Dwudase Yesekaleɔto adwenle kɛ kenle ko ne nɔe ne a ɔwɔ kɛ ɔye Gyisɛse ɔmaa a. Ɛnee Gyisɛse noko ze kɛ Selɛ ne ɛva ninyɛne muala ɛwula ɔdaye Gyisɛse ɔ sa nu, yɛɛ ɔvi Nana Nyamenle ɛkɛ a ɔrale a, na Nana Nyamenle anwo lɔ noko a eza ɔbazia yeahɔ a. 4 Ɔti ɔvi aleɛ ɛkponle ne anwo ɔdwazole, na ɔyele ye tɛladeɛ ne mɔɔ gua zolɛ la, ɔvale tohulu ɔpɛle ɔ bo. 5 Akee ɔwolale nzule ɔguale kyɛnze kpole bie anu, na ɔbɔle ɔ bo kɛ ɔwowo ɛdoavolɛma ne mɔ agyakɛ anwo, na ɔfa ye tohulu ne mɔɔ pɛ ɔ bo la ɔkyikyi nwolɛ.

6 Ɔdwule Saemɔn Pita anwo zo la, Pita zele ye kɛ, "Awulae, ɔnle kɛ wɔmɔ a ɛwowo yɛ gyakɛ anwo a."

7 Gyisɛse buale kɛ, "Ɛnrɛde deɛmɔti melɛyɛ ɛhye la abo kɛkala, na kenlebie ɛbade ɔ bo."

8 Pita kpole ɛhye na ɔzele kɛ, "Kyɛkyɛ, mame mɔ, menwɔmaa ɛnrɛwowo me gyakɛ anwo ɛlɛ!"

Gyisɛse noko buale ye kɛ, "Na saa wɔammaa meanwowo noko a, ɛnee ɔkile kɛ ɛnrɛhola ɛnrɛyɛ me ɛdoavolɛ."

9 Saemɔn Pita deanle nu zele kɛ, "Saa zɔhane ɛdeɛ a, ɛnee wowo me sa anwo nee me ti zo, na tɛ me gyakɛ anwo angome ɔ!"

10 Gyisɛse buale kɛ, "Sonla mɔɔ ɛbia la yemɔ ɔ gyakɛ anwo ala a ɔhyia kɛ bɛkɛwowo a. Kɛkala yemɔ bɛ nwo le bɔkɔbɔkɔ, na emomu tɛ bɛ muala ɔ." 11 Ɔluakɛ ɛnee Gyisɛse ze mɔɔ baye ye amaa a. Zɔhane ati a ɔzele kɛ, "Tɛ bɛ muala a bɛ nwo te bɔkɔɔ a" la.

12 Ɔwowole bɛ gyakɛ anwo ɔwiele la, ɔwulale ye anwuma tɛladeɛ ne ɔguale zo, na mɔɔ ɔdɛnlanle aze la, ɔbizale bɛ kɛ, "Asoo bɛte ɛhye mɔɔ menyɛle la abo ɔ? 13 Bɛmɛ bɛfɛlɛ me ‘Yɛmenle’ nee ‘Awulae,’ na ɔle zɔ noko. 14 Saa mame mɔɔ mele Awulae nee Kilehilevolɛ la mewowo bɛ gyakɛ anwo a, ɛnee ɔwɔ kɛ bɛ nuhua ko biala kola wowo ɔ gɔnwo agyakɛ anwo. 15 Meyɛ ɛhye meva meyɛ ndonwo memaa bɛ; ɔti bɛyɛ kɛmɔ meyɛ memaa bɛ la. 16 Akɛlɛ biala ɛndɛla ɔ menle. Yɛɛ soavolɛ noko ɛndɛla ahenle ne mɔɔ zoanle ye la. 17 Bɛze zɛhae ninyɛne ne mɔ, ɛhye ati bɛyɛ; ɔluakɛ ɛhye a le nyilalɛ adenle ne a.

18 "Tɛ bɛ muala a melɛka ɛhye meahile bɛ a; meze bɛ nuhua ko biala ati anu. Ngɛlɛlera ne se kɛ, ‘Ahenle ne mɔɔ me nee ye to ɛsalɛ ɛyɛba ko anu la, yemɔ a baye me amaa a,’ na ɛhye ɛnrɛhyɛ biala na ayɛ nɔhalɛ noko. 19 Meka meahile bɛ kɛkala amaa saa ɔdwu zo a bɛalie me bɛ ali.

20 "Nɔhalɛ nu kɛ, awie biala mɔɔ kɛlie me noko la ɛnee yelie Selɛ ne mɔɔ zoanle me la."

21 Ɛnee akee Gyisɛse ɛlɛdi nyane kpole wɔ ye ahonle nu; ɔti ɔdeanle nu ɔzele kɛ, "Nɔhalɛ nu, bɛ nuhua ɛko baye me amaa!" 22 Ɛhye zinle ɛdoavolɛma ne mɔ anwo, na ɔmaanle bɛnleɛnleanle bɛ nyunlu ngoko ngoko bɛzele kɛ, "Ɛnee ahenle a le nwane?" 23 Yemɔti Saemɔn Pita zele ɛdoavolɛma ne anu mɔɔ Gyisɛse kulo ye na ɔde ɔ nwo ɛkɛ la kɛ, 24 "Kile yɛ ahenle ne mɔɔ ɔlɛka ɔ nwo edwɛkɛ la."

25 Ɔti ahenle ne mɔɔ de bikye Gyisɛse la bizale ye kɛ, "Awulae, ɛnee nwane ɔ?"

26 Gyisɛse zele kɛ, "Ahenle ne mɔɔ mebava aleɛ ne meamaa ye la, ɛnee yemɔ ɔ." Zɔhane ati ɔvale ɔmaanle Dwudase, mɔɔ le Saemɔn Yesekaleɔto ara ne la.

27 Dwudase lile aleɛ ne wiele ala pɛ, yɛɛ Abɔnsam rawolole ye nu a. Akee Gyisɛse zele ye kɛ, "Mɔɔ ɛkpondɛ kɛ ɛyɛ la, yɛ ye ndɛndɛ."

28 Ɛdoavolɛma ne mɔ mɔɔ gua ɛkponle ne anwo la biala ande mɔɔ Gyisɛse hanle la abo. 29 Na kɛmɔ Dwudase a asie bɛ ezukoa ne la ati, bɛdwenlenle kɛ bie a ɛnee Gyisɛse ɛlese ye kɛ, ɔhɔdua aleɛ ne kakɛ anzɛɛ ɔva bie ɔhɔhyɛ ehyiavolɛma. 30 Zɔhane ati ɔvindele ndɛndɛ ne ala ɔhɔle alie nwo; na ɛnee aleɛ ɛdwo.

31 Mɔɔ Dwudase vile sua ne anu la, Gyisɛse hanle kɛ, "Akee Sonla Ra ne anyunlunyia ne ɛla ali; na ɔlua ɔ nwo zo yɛɛ Nyamenle anyunlunyia kpole ne noko ɛla ali a. 32 Na ɔnrɛhyɛ biala, Nana Nyamenle bava ɔdaye ye anyunlunyia ne yeamaa me. 33 Me mra, yeha mekɛ ekyii bie ɛnee mevi bɛ nu! Na emomu, mɔɔ menzele Dwuuma ne mɔ la a mese bɛdabɛ noko a, bɛbakpondɛ me, noko bɛnrɛhola ɛleka mɔɔ mewɔ la ba.

34 "Ɛhye ati memaa bɛ mɛla fofolɛ. Bɛhulo bɛ nwo ngoko ngoko kɛmɔ mehulo bɛ la. 35 Ɛhye a bamaa ewiade amra anwu kɛ bɛle me ɛdoavolɛma a."

36 Saemɔn Pita bizale ye kɛ, "Awulae, ɛnee nienwu a ɛbahɔ a?"

Gyisɛse buale ye kɛ, "Ɛnrɛhola ɛ nee me ɛnrɛhɔ kɛkala; na amozi ye yɛɛ ɛbadoa me a."

37 Pita bizale ye kɛ, "Na duzu ati a menrɛhola wɔ toa kɛkala ɛ? Meboa me nwo kɛ menwɔva me ngoane menwɔdo ɛkɛ menwɔmaa wɔ."

38 Gyisɛse buale zele kɛ, "Asoo ɛkɛhola ɛkɛva wɔ ngoane ɛkɛdo ɛkɛ ɛkɛmaa me ɔ? Kyɛkyɛ, nɔhalɛ, too mɔɔ akɔlɛ kabɔ la ɛnee wɔkpo me fane nsa kɛ ɛnze me fee!"