João 18

Bɛhye Gyisɛse

1 Gyisɛse anloa dɔle la, ɔ nee ye ɛdoavolɛma ne mɔ pɛle nu wɔ Kedelɔn bɔnza ne anwo na bɛhɔle "ɔlivi" tola bie anu. 2 Na Dwudase, mɔɔ yele ye maanle la noko ze zɛhae ɛleka ne, ɔluakɛ Gyisɛse ta kɛ ɔ nee ye ɛdoavolɛma ne mɔ kɔ ɛkɛ.

3 Na azɛlɛvolɛ mgbanyima ne mɔ, nee Falasiima ne mɔ dule azogya nee agbolisi, mɔɔ dedɛ tɛkɛ nee ngɛnlaneɛ nee ahoholombaka la guale Dwudase anwo zo, na ɔ nee bɛ hɔle tola ne anu. 4,5 Ɛnee Gyisɛse ze mɔɔ bazi ɔ nwo zo la amuala. Ɔti ɔrale ɔ nyunlu na ɔbizale bɛ kɛ,

"Nwane a bɛkpondɛ ye a?"

Bɛbuale ye kɛ, "Gyisɛse, mɔɔ vi Nazalɛte la ɔ."

Gyisɛse zele bɛ kɛ, "Mame ɛne." 6 Mɔɔ ɔhanle kɛ "Mame ɛne" la, bɛbɔle nguku bɛhɔle bɛ nzi na bɛdele bɛguale aze.

7 Na eza ɔbizale bɛ bieko kɛ, "Nwane a bɛkpondɛ ye a?"

Bɛbuale ye bieko kɛ, "Gyisɛse, mɔɔ vi Nazalɛte la ɔ."

8 Gyisɛse zele bɛ kɛ, "Meha mehile bɛ kɛ, ‘Mame ɛne.’ Ɔti saa mame a bɛkpondɛ me ɛdeɛ a, ɛnee bɛmaa menli ɛhye mɔ ɛhɔ." 9 Ɔyɛle ɛhye amaa ye kapezo edwɛkɛ ne mɔɔ se, "Metɛminlinle mɔɔ ɛvale ɛmaanle me la anu ko bɔbɔ" la ali munli.

10 Akee Saemɔn Pita noko hwenle dadeɛ wɔ ye boa ne anu, na ɔpɛle Malekɛse, mɔɔ le Sɛlɛvolɛ Kpanyinli ne sonvolɛ la anzo fema ne.

11 Gyisɛse zele Pita kɛ, "Fa wɔ dadeɛ ne wula ye boa ne anu. Ɛnze kɛ ɔwɔ kɛ meno dwora (kɔpo) ne mɔɔ Egya ɛva ɛmaa me la ɔ?"

12 Ɔti Dwuuma agbolisi ne mɔ nee azogya ne mɔ nee bɛ mgbanyinli ne mɔ hyele Gyisɛse na bɛkyekyele ye. 13 Bɛlumuale bɛ nee ye hɔle Sɛlɛvolɛ Kpanyinli Kayafase, mɔɔ le Anase azebia la sua nu. 14 Zɛhae Sɛlɛvolɛ Kpanyinli ye, yemɔ a maanle Dwuuma ne mɔ adwenle na ɔzele bɛ kɛ, "Ɔle kpalɛ kɛ sonla ko kɛwu kɛlie menli dɔɔnwo ngoane la." 15 Saemɔn Pita lile bɛ nzi, yɛɛ ɛdoavolɛ ko bie mɔɔ Sɛlɛvolɛ Kpanyinli ne ze ye la noko boka nwo. Ɔti bɛmaanle zɔhane ɛdoavolɛ ne adenle bɛmaanle ɔ nee Gyisɛse hɔle Sɛlɛvolɛ Kpanyinli ne aako ne anu, 16 na Pita yemɔ ɔgyinlanle anlenkɛ ne anzi wɔ alie nwo lɔ. Akee ɛdoavolɛ ne mɔɔ Sɛlɛvolɛ Kpanyinli ne ze ye la, vindele alie nwo na ɔzɛlɛle bɛlɛra ne mɔɔ sinza anlenkɛ kpole ne la adenle, na ɔ nee Pita wolole aako ne anu. 17 Bɛlɛra ne bizale Pita kɛ, "Ɛnle Gyisɛse ye ɛdoavolɛma ne mɔ anu ko ɔ?"

Ɔbuale ye kɛ, "Kyɛkyɛ, memboka bɛ nwo."

18 Kɛmɔ ɛnee ɔle ɛyɛlɛ mekɛ la ati, agbolisi ne mɔ nee azonvolɛ mɔɔ wɔ sua ne anu ɛkɛ ne la ɛnee ɛwuda senle na bɛlɛte. Na Pita noko hɔgyinlanle bɛ nwo ɛkɛ ne ɔdele senle ne bie.

19 Sɛlɛvolɛ Kpanyinli ne bizebizale Gyisɛse, ye ɛdoavolɛma ne mɔ ɔ nee ye ngilehile ne mɔ anwo edwɛkɛ.

20 Gyisɛse buale ye kɛ, "Awie biala ze deɛ mɔɔ mekilehile la, ɔluakɛ meha Nyamedwɛkɛ ne dahuu wɔ ayiasua ne mɔ anu, ɔ nee Asɔne Sua Kpole ne noko anu; yɛɛ Dwuuma mgbanyima ne mɔ noko ɛde mɔɔ mekilehile la amuala, ɔluakɛ mengile debie gyɛne biala memboka mɔɔ meka ye wɔ bagua nu la anwo. 21 Duzu ati a bɛlɛbiza me kpuyia ɛhye a? Bɛbiza bɛdabɛ mɔɔ bɛdiele me la ɛ! Bie mɔ a gyigyi ɛke la, yɛɛ bɛze mɔɔ menganle noko a."

22 Azogya ne mɔ mɔɔ gyigyi ɛkɛ ne la anu ko hwenle ɔ sa pɛle Gyisɛse anye zo na ɔzele ye kɛ, "Asoo ɛdawɔ kɛ ɛbua Sɛlɛvolɛ Kpanyinli edwɛkɛ la ɛne?"

23 Gyisɛse buale ye kɛ, "Sa meyɛ ɛtane a ɛnee ka kile me, na saa metɛyɛle ɛtane a, ɛnee duzu ati a akee wɔbɔ me a?"

24 Akee Anase maanle bɛvale Gyisɛse mɔɔ ɛnee bɛkyekye ye la, bɛhɔmaanle Sɛlɛvolɛ Kpanyinli Kayafase.

25 Zɛhae mekɛ ye, ɛnee Saemɔn Pita tɛgyi senle ne anwo, ɔti bɛbizale ye bieko kɛ, "Asoo ɛnle ye ɛdoavolɛma ne anu ko ɔ?" Ɔbuale ɔzele kɛ, "Kyɛkyɛ, memboka bɛ nwo."

26 Na Sɛlɛvolɛ Kpanyinli ne ye azonvolɛ ne mɔ ko, mɔɔ ye busuanli a Pita pɛle ɔ nzo wɔ tola ne anu la, bizale ye kɛ, "Anzɛɛ meannwu wɔ nee ye wɔ tola ne anu ɔ? Tɛ wɔmɔ a ɛnee ɛboka Gyisɛse wɔ ɛkɛ ne la ɔ?"

27 Eza Pita zale ɔ ne bieko; na ɛkɛ ne ala akɔlɛ bɔle.

Gyisɛse wɔ Paelɛte anyunlu

28 Mɔɔ Gyisɛse ndɛnebualɛ ne wiele wɔ Kayafase anyunlu la, ɛnee aleɛ ɛlɛba arahye. Ɔti bɛvi ɛkɛ ne la, bɛvale ye bɛhɔle Wulomu Amɛnlado ne sua nu. Dwuuma ne mɔ anwolo ɛkɛ ne bie, ɔluakɛ ɛhye kɛgua bɛ nwo evinli, mɔɔ ɔlua zo bɛdi Akpabɛnwo ɛvoyia ne bie a ɔnrɛyɛ boɛ a. 29 Ɔti Paelɛte, mɔɔ le Amɛnlado ne, vindele rale bɛ nwo ɛkɛ na ɔbizale bɛ kɛ, "Duzu edwɛkɛ a bɛlɛ ye bɛtia nrenyia ɛhye a? Duzu ɛtane a yeyɛ mɔɔ ɔlua zo bɛlɛto ye ɛzonle a?"

30 Bɛdabɛ noko bɛbizale ye kɛ, "Na asoo ɔtɛyɛle debie ɛtane a anrɛɛ yɛ nee ye kɛra ɛ nyunlu ɔ?"

31 Paelɛte zele bɛ kɛ, "Ɛnee bɛva ye bɛhɔ na bɛhɔli ye edwɛkɛ kɛmɔ bɛdabɛ bɛ mɛla ne se la."

Bɛbuale kɛ, "Yɛnlɛ mɛla biala mɔɔ yɛdua zo yɛbɔ sonla meanubaka nu a, ɛhye ati yɛkpondɛ tumi yɛavi wɔ ɛkɛ." 32 Ɛhye maanle Gyisɛse kapezo edwɛkɛ ne mɔɔ fale ewule holɛ ko mɔɔ ɔbawu la lile munli.

33 Akee Paelɛte ziale hɔle aako nu lɔ bieko na ɔzele kɛ bɛ nee Gyisɛse ɛrɛla. Ɔbizale Gyisɛse kɛ, "Wɔmɔ a le Dwuuma Belemgbunli ne ɔ?"

34 Gyisɛse bizale ye kɛ, "Ɛnee ɛdawɔ a ɛlɛka ɛhye, anzɛɛ awie mɔ a hanle hilele wɔ a?"

35 Paelɛte zele ye kɛ, "Na mame mele Dwuunli ɔ? Ɛdawɔ wɔ maanlema nee bɛ azɛlɛvolɛ mgbanyinli a ɛva wɔ ɛra ɛke a. Na duzu ɛtane a wɔyɛ a?"

36 Akee Gyisɛse buale ye kɛ, "Me belemgbunlililɛ ɛdeɛ ɛnle azɛlɛ ye azo. Saa me belemgbunlililɛ wɔ azɛlɛ ye azo a, anrɛɛ me ɛlɔnema kɛho kɛlie me. Na kɛmɔ me belemgbunlililɛ ɛdeɛ ɛnle azɛlɛ ye azo ɛke la ati, yemɔti a Dwuuma ne mɔ holale hyele me rale a."

37 Paelɛte buale ye kɛ, "Se ɛnee ɛle belemgbunli ɛdeɛ?"

Gyisɛse buale ye kɛ, "Ɛhɛe, na ɛhye ala ati noko a bɛwole me a. Na nɔhalɛ ne a me nee ye rale ewiade a. Menli noko mɔɔ kulo nɔhalɛ ne la a le me ɛdoavolɛma a."

38 Paelɛte deanle nu zele kɛ, "Nɔhalɛ a le duzu?" Akee ɔvindele ɔdoale menli ne mɔ bieko na ɔhɔzele bɛ kɛ, "Mennwu ɛtane biala wɔ ɔ nwo. 39 Na kɛmɔ bɛlɛ adenle kɛ bɛbiza bɛmaa meye bɛ menli mɔɔ gua efiade la anu ko memaa bɛ wɔ Akpabɛnwo Ɛvoyia ne anu mekɛ biala la, ɛnee bɛkɛhulo kɛ menwɔye ‘Dwuuma Belemgbunli’ ne menwɔmaa bɛ ɔ?"

40 Bɛdeɛdeanle nu bɛzele kɛ, "Kyɛkyɛ! Yɛngulo nrenyia ɛhye. Yɛkulo Balabase!" Na Balabase noko le kodiawu.