João 2

Kana atɔfolɛlielɛ ne

1 Ye kenle nsa ne azo ɛnee bɛlɛdie atɔfolɛ bie wɔ Kana mɔɔ wɔ Galeli la. Gyisɛse ɔ nli hɔle ɛkɛ ne bie, 2 yɛɛ bɛdole ɛsalɛ bɛvɛlɛle Gyisɛse nee ye ɛdoavolɛma ne mɔ noko. 3 Mɔɔ atɔfolɛ ne abo nza nwanye ne wiele la, Gyisɛse ɔ nli hanle hilele ye kɛ bɛ nwanye ɛwie.

4 Gyisɛse zele ɔ nli kɛ; "Ɔmɔ, duzu a ɛkulo kɛ meyɛ a? Me mekɛ ne ɛtɛdwule."

5 Na ɔ nli zele sonvolɛma ne mɔ kɛ, "Bɛyɛ mɔɔ ɔkɛze bɛ biala la."

6 Ɛnee dwora mgbole nsia gyigyi ɛkɛ mɔɔ ko biala kɛli nzule galɔno abulanwiɔ mɔɔ kɔ abulasa a. 7,8 Akee Gyisɛse maanle azonvolɛ ne mɔ sesale nzule guale nu maanle bɛyiyile tetɛkɛɛ. Ɛhye anzi ɔzele bɛ kɛ, "Bɛza bie bɛhɔmaa mɔɔ nea atɔfolɛ ne azo la." 9 Mɔɔ atɔfolɛ neazovolɛ ne nlonle nzule ne mɔɔ akee ɛhakyi nza nwanye ne la bie, na ɔnze ɛleka mɔɔ bɛnyianle ye, noko azonvolɛ ne mɔ bɛmɛ bɛze la, ɔvɛlɛle atɔfolɛ nrenyia ne.

10 Akee ɔzele ye kɛ, "Na duzu ati a ɛdi wɔ edwɛkɛ zɛhae a? Ɛ gɔnwo mɔ dumua kyɛ nwanye kpalɛ ne, na mɔɔ awie biala kɛbo tindaanwu la, akee yeahyɛ mɔɔ ɛnyɛ fɛ la. Na wɔmɔ akee wɔva nwanye kpalɛ ne emomu a wɔli amozi a."

11 Zɛhae nwanwanedeɛ ye mɔɔ zile wɔ Kana mɔɔ wɔ Galeli la a le Gyisɛse ye nwanwanedeɛ mɔɔ ɔlumuale ɔyɛle ye bagua nu a. Na ɛhye noko maanle ye ɛdoavolɛma ne mɔ liele ye lile.

12 Ɛhye anzi ɔ nee ɔ nli, nee ɔ mediema mrenyia ne mɔ, nee ye ɛdoavolɛma ne mɔ hɔle Kapɛnayɛm bɛhɔlile kenle kɛyɛ nsa wɔ ɛkɛ.

Asɔne sua nu ɛnle gualilɛleka

13 Ɛnee ɔka ekyii bɛdi Dwuuma Akpabɛnwo ɛvoyia ne, ɔti Gyisɛse hɔle Gyɛlusalɛm.

14 Ɔdwule Asɔne Sua Kpole ne anu la, ɔnwunle kɛ guadivoma bie ɛlɛtɔne nlankɛ, mboane, nee nwolɛ mɔlɔnloma mɔɔ bɛfa bɛbɔ azu la, yɛɛ menli mɔɔ senza ezukoa noko la kɛ bɛdabɛ bɛdede bɛ ɛkponle nwo wɔ ɛkɛ. 15 Gyisɛse hwenle empele bilebilale bɛ na ɔhanle bɛ muala, na ɔvoanle mboane nee nlankɛ ne mɔ, na eza ɔvuandinle bɛ ɛkponle ne mɔ nee bɛ ezukoa ne amuala ɔguale bɛ lɔ. 16 Akee ɔhɔle bɛdabɛ mɔɔ bɛtɔnedɔne mɔlɔnloma ne mɔ la ɛkɛ na ɔzele bɛ kɛ, "Bɛye ɛhye mɔ amuala bɛvi ɛke! Bɛmmafa me Ze Sua nu bɛkakyi gualilɛ ɛleka!"

17 Ɛhye maanle ye ɛdoavolɛma ne mɔ hakyele kapezo edwɛkɛ ne mɔɔ wɔ Ngɛlɛlera ne anu mɔɔ se, "Saa Mekanyia ɛkpɔlɛ a ɛnee ɔvi me ɛhulolɛ kpole mɔɔ melɛ ye wɔ Nana Nyamenle Sua nwo la ati la."

18 Dwuuma mgbanyima ne mɔ rabizale ye kɛ, "Duzu tumi a ɛdawɔ ɛlɛ mɔɔ ɔwɔ kɛ ɛtu bɛ a? Saa ɛlɛ tumi ɛhye vi anwuma Nyamenle ne ɛkɛ ne a, ɛnee kile nwolɛ sɛkɛlɛneɛ."

19 Gyisɛse buale bɛ kɛ, "Wioo, mede. Nwanwanedeɛ mɔɔ melɛ ye memaa bɛ la a le ɛhye: Bɛbubu asɔne sua ɛhye na mebava kenle nsa meazi ye bieko!"

20 Na Dwuuma ne deanle nu zele kɛ, "Wio! Asɔne Sua Kpole ɛhye mɔɔ bɛvale ɛvolɛ abulanla nee nsia bɛzile la, yemɔ a wɔmɔ ɛse ɛfa kenle nsa pɛ wɔazi la?" 21 Noko ɛnee ɔlɛka ɔdaye ye sonlabaka mumua ne anwo edwɛkɛ. 22 Nzinlii mɔɔ ɔvi ewule nu ɔdwazole la, ye ɛdoavolɛma ne mɔ hakyele ɛhye mɔ mɔɔ ɔhanle la, na bɛnwunle kɛ mɔɔ ɔhanle ɔvile Ngɛlɛlera ne anu la fale ɔ nwo na amgba noko yepe zolɛ nɔhalɛ nu bɔkɔɔ.

23 Ɔlua nwanwanendeɛ ne mɔ mɔɔ ɔyɛle wɔ Akpabɛnwo ɛvoyia ne abo wɔ Gyɛlusalɛm la ati, menli dɔɔnwo liele lile kɛ amgba yemɔ a le Ngoanedievolɛ ne a. 24,25 Gyisɛse anva ɔ rɛle anwula bɛ nu, ɔluakɛ, ɔze sonla dasanli deɛholɛ, mɔɔ ɔngyia kɛ awie kɛhakye ye a.