1 Molɛ aleɛbahye ne, anzɛɛ wɔ kenle ne mɔɔ lumua wɔ dapɛne ne anu, mɔɔ ɛnee maanle nu ɛtɛtetele bɔbɔ la, Male mɔɔ vi Magedala hɔle sɛka ne azo na ɔnwunle kɛ bɛhundo bolɛ ne bɛvi sɛka ne anloa.

2 Ɔnriandinle ɔranwunle Saemɔn Pita, ɔ nee ɛdoavolɛ ne mɔɔ Gyisɛse kulo ye edwɛkɛ la, na ɔzele bɛ kɛ, "Bɛye Awulae funli ne bɛvi sɛka ne anu, na mennwu ɛleka ko mɔɔ bɛ nee ye ɛhɔ a!"

3,4 Pita nee ɛdoavolɛ ne nriandinle hɔle sɛka ne azo kɛ bɛkanlea. Ɛdoavolɛ ko ne zenle Pita anwo lumuale ɛkɛ ne, 5 na ɔhotole ɔnleanle sɛka ne anu la, ɔnwunle kɛ ɛdanlɛ ne mɔɔ bɛvale bɛkyekyele ye la gua ɛkɛ, noko sɛka ne anu. 6 Akee Saemɔn Pita noko ɔdaye ɔrale ɛkɛ na yemɔ ɔhɔle nu. Ɔnwunle kɛ ɛdanlɛ ne gua ɛkɛ, 7 yɛɛ ɔnwunle kɛ bɛbubu ɛdanlɛ ne mɔɔ bɛvale bɛkyekyele Gyisɛse ati la kɛnlɛma bie gua sɛka ne anu. 8 Na ɛdoavolɛ ko ne hɔle sɛka ne anu bie, na ɔnwunle mɔɔ ɛzi la, na ɔliele ɔlile, 9 ɔluakɛ ɛnee bɛtɛdiele bɛtɛdile kɛ Ngɛlɛlera ne kile kɛ ɔbazia yeara ngoane nu bieko.

10 Ɛdoavolɛma nwiɔ ne hɔle sua nu, 11 na mekɛ zɔhane, ɛnee eza Male ɛzia ɛhɔ sɛka ne azo, na ɔgyi ahanle ɔlɛsu. Na mɔɔ ɔsu la, ɔbutule na ɔnleanle sɛka ne anu, 12 na ɔnwunle anwumabɔvolɛma nwiɔ mɔɔ bɛwulowula adɛladeɛ fufule nwohyee, na ko de ɛleka mɔɔ bɛdole Gyisɛse la ati sɔlɔ, yɛɛ ko noko de ɔ gyakɛ anu.

13 Bɛbizale ye kɛ, "Duzu ati a ɛlɛsu a?"

Ɔbuale bɛ kɛ, "Ɔboalekɛ, bɛye Awulae bɛvi ɛkɛ, yɛɛ mennwu ɛleka noko mɔɔ bɛdo ye a."

14 Ɔdole ɔ nye ɔ nzi la, ɔnwunle kɛ awie gyi ɔ nzi ɛkɛ ne. Gyisɛse ɔ, noko yeannwu ye sonla holɛ! 15 Ɔbizale ye kɛ, "Raalɛ ye, duzu ati a ɛlɛsu a? Nwane a ɛkpondɛ ye a?" Male dwenlenle kɛ tola ne amenle ɔ.

Ɔti ɔzele ye kɛ, "Yɛmenle, saa ɛdawɔ a wɔye ye wɔvi ɛke a, ɛnee kile me ɛleka mɔɔ ɛvale ye ɛdole la maa mengɔnva ye."

16 Akee Gyisɛse vɛlɛle ye kɛ, "Male!" Na Male hakyile ɔ nye ɔ nwo ɛkɛ ne, na ɔdeanle nu wɔ Hibulu aneɛ ne anu kɛ, "Labonae," mɔɔ ɔ bo a le kɛ "Kilehilevolɛ!"

17 Gyisɛse zele ye kɛ, "Mmafa ɛ sa ɛka me, ɔluakɛ metɛnyianle metɛkɔle Egya anwo lɔ. Emomu kɔ mediema ne mɔ ɛke na kɔze bɛ kɛ, melɛkɔ me ze nee be ze, yɛɛ me Nyamenle ɔ nee bɛ Nyamenle ne anwo lɔ."

18 Male mɔɔ vi Magedala la amgba noko hɔle ɛdoavolɛma ne mɔ anwo ɛkɛ na ɔzele bɛ kɛ, "Menwu Awulae!" Akee ɔhanle nrɛlaleɛ ne ɔhilele bɛ.

19 Kenle ko ne nɔsolɛ nu, wɔ kenle ne mɔɔ lumua dapɛne ne anu, mɔɔ ɛnee ɔlua Dwuuma ne mɔ anwo ɛzulole ti, ɛdoavolɛma ne mɔ ɛtoto bɛ nwo nlenkɛ nu la, Gyisɛse ragyinlanle bɛ avinli ɛkɛ na ɔzele bɛ kɛ, "Anzondwolɛ ɛha bɛ." 20 Ɔvale ɔ sa akunlu nee ɔ nvenle foa ne ɔhilele bɛ. Na mɔɔ bɛnwunle kɛ amgba Awulae la, ɔyɛle bɛ fɛ totohyia!

21 Gyisɛse zele bɛ bieko kɛ, "Anzondwolɛ ɛha bɛ! Kɛmɔ Egya ne zoanle me la, zɔhane ala a medame melɛsoa bɛ a." 22 Akee ɔgule ɛnwomenle ɔguale bɛ nwo zo na ɔzele bɛ kɛ, "Bɛlie Sunsum Nwuanzanwuanza ne. 23 Mɔɔ bɛkɛva ye ɛtane bɛkɛhyɛ ye la, ɛnee bɛva bɛhyɛ ye. Yɛɛ mɔɔ bɛanva ye ɛtane bɛangyɛ ye la, ɛnee ye ɛtane ne ɛha ɔ nwo."

24 Ɛnee Tɔmase, mɔɔ le ɛdoavolɛma bulu nee nwiɔ ne anu ko, na eza bɛfɛlɛ ye "Ndabia" la, ɛnle ɛkɛ ne wɔ mekɛ mɔɔ Gyisɛse rale la. 25 Na mɔɔ bɛhanle bɛhilele ye kɛ, "Yɛnwu Awulae" la, yemɔ ɔbuale bɛ kɛ, "Saa metɛnwunle pɛlɛgo kapenle ne wɔ ɔ sa akunlu, nee ɔ nvenle foa, na metɛfale me sa metɛwulale nu a, menrɛlie menrɛli."

26 Kenle mɔtwɛ pɛle nu zenle la, ɛnee eza ɛdoavolɛma ne mɔ ɛyia nu bieko, na mekɛ ɛhye anu ɛnee Tɔmase boka bɛ nwo. Ɛnee bɛtoto nlenkɛ ne mɔ anu, na arɛlevilɛ nu ala, eza Gyisɛse ragyinlanle bɛ avinli na ɔzele bɛ kɛ, "Anzondwolɛ ɛha bɛ!" 27 Akee ɔzele Tɔmase kɛ, "Fa ɛ sa bɛla ɛke. Nea, me sa akunlu ɛne; fa ɛ sa bɛla. Fa wula me nvenle foa ko. Mmasu kpolera bieko, na die di!"

28 Tɔmase buale kɛ, "Me Awulae nee me Nyamenle!"

29 Gyisɛse zele ye kɛ, "Wɔlie wɔli, ɔboalekɛ wɔnwu me. Na emomu nyilalɛ ɛha bɛdabɛ mɔɔ bɛtɛnwunle me, noko bɛdie bɛdi la."

30,31 Gyisɛse yɛle nwanwanendeɛ dɔɔnwo hilele ye ɛdoavolɛma ne mɔ mɔɔ bɛangɛlɛ be wɔ buluku ɛhye anu a. Emomu bɛhɛlɛ ɛhye mɔ amaa bɛalie bɛali kɛ amgba Gyisɛse a le Kelaese ne, Nyamenle Ra ne a. Na bɛdabɛ mɔɔ bɛkɛlie ɛhye mɔ bɛkɛli la bɛbanyia ngoane wɔ ye duma nu.