João 5

Mgbanyima ɛdendɛ ɛtia ayileyɛlɛ

1 Mɔɔ Dwuuma ɛvoyia bie dwule zo la, Gyisɛse ziale rale Gyɛlusalɛm, 2 Na nzulebula bie wɔ sua ne azo ɛleka ne mɔɔ bikye gua ne mɔɔ bɛtɔne mboane wɔ ɛkɛ la. Zɛhae nzulebula ne duma a le Bɛtezata, mɔɔ bɛhye mbane nnu wɔ nwolɛ a. 3 Wuliravolɛma dɔɔnwo, abuburavoma, anyezinliravolɛma, nee menli mɔɔ bɛ sa anzɛɛ bɛ gyakɛ ɛdwudwe la amuala, deda ɛkɛ ne kendɛ nzule ne mgbakabɔlɛ. 4 Ɔluakɛ, ɔyɛ a Awulae anwumabɔvolɛ bakpoto nzule ne, na sonla mɔɔ kɛlumua kɛdɔ nu la ɛnee ɔ nwo ɛza bɔkɔɔ.

5 Ɛnee nrenyia ko wɔ bɛ nu mɔɔ yebubu yegua ɛleka ko too ɛvolɛ abulasa nee mɔtwɛ a. 6 Mekɛ mɔɔ Gyisɛse nwunle ye na ɔnwunle kɛ ɔsi mɔɔ yela anwonyane nu yehyɛ la, ɔbizale ye kɛ, "Ɛkulo kɛ ɛkɛde kpɔkɛ ɔ?"

7 Nrenyia ne buale kɛ, "Menlɛ awie ɛmboa me, ɔti saa dahuu bɛbɔ nzule ne mgbaka na mekɔ nu a ɛnee awie ɛlumua me nyunlu."

8 Na Gyisɛse zele ye kɛ, "Dwazo, foa! Bubu wɔ ɛkpa ne, na kɔ sua nu!"

9 Ɛkɛ ne ala, nrenyia ne dele kpɔkɛ. Ɔbubule ye ɛkpa ne na ɔbɔle ɔ bo kɛ ɔtia. Ɛhye zile wɔ Ɛnwomenlelielɛ Kenle. 10 Ɔti Dwuuma mgbanyima ne mɔ angulo ye fee zɛ. Bɛzele nrenyia ne mɔɔ anwo ɛza la kɛ, "Ɛnɛ le Ɛnwomenlelielɛ Kenle; ɔtia mɛla kɛ awie kɛyɛ gyima! Ɔti mɛla ɛmmaa adenle kɛ ɛkɛzoa wɔ ɛkpa ne!"

11 Nrenyia ne buale bɛ kɛ, "Ahenle ne mɔɔ yɛle me ayile la a se menzoa a."

12 Bɛbizale ye kɛ, "Ɛnee nwane bɔbɔ a le zɔhane sonla ne?"

13 Ɛnee nrenyia ne ɛnze sonla holɛ ko ne, yɛɛ Gyisɛse noko ɛhɔfonla menli dɔɔnwo ne anu. 14 Nzinlii, Gyisɛse nwunle ye wɔ Asɔne Sua Kpole ne anu, na ɔzele ye kɛ, "Akee wɔde kpɔkɛ; mmakɔyɛ ɛtane bieko kɛmɔ ɛyɛle ye dɛba ne la, yemɔ anrɛɛ wɔannea a mɔɔ kɛzi ɛ nwo zo la badɛla dɛba ne."

15 Nrenyia ne akee hɔkpondɛle Dwuuma mgbanyima ne mɔ na ɔzele bɛ kɛ Gyisɛse a yɛle ye ayile a.

16 Ɔti bɛbɔle ɔ bo kɛ bɛgyegye Gyisɛse wɔ Ɛnwomenlelielɛ mɛla ne mɔɔ yedo la ati. 17 Gyisɛse zele bɛ kɛ, "Egya yɛ gyima dahuu, na zɔhane noko ala a medame noko meyɛ a."

18 Ɛhye maanle Dwuuma mgbanyima ne mɔ anye bolole kpalɛ kpalɛ kɛ bɛku ye. Ɔluakɛ saa ɛtu Ɛnwomenlelielɛ mɛla ne mɔɔ yedo la ɛsie ahanle a, eza ɔse Nana Nyamenle le ɔ Ze, mɔɔ kile kɛ ɔ nee Ye le ko bɔbɔ a.

19 Gyisɛse buale kɛ, "Ralɛ ne ɛngola ɛnyɛ ɛhwee wɔ ye tumi nu. Mɔɔ ɔ ze yɛ la yɛɛ ɔdaye ɔnea zo ɔyɛ bie a. 20 Ɔluakɛ, Selɛ ne kulo Ralɛ ne edwɛkɛ, na eza ɔka debie biala mɔɔ ɔyɛ la amuala ɔkile ye; ɛhye ati Ralɛ ne bayɛ mɔɔ yɛ nwanwane tɛla mɔɔ yeyɛ yemaa nrenyia ɛhye bɔbɔ la. 21 Na kɛmɔ Selɛ ne tunwue mɔwuamra na ɔmaa bɛ ngoane la, zɔhane ala noko yɛɛ Ralɛ ne fa ngoane maa bɛdabɛ mɔɔ bɛkulo la a. 22 Eza noko Selɛ ne ɛmbua awie biala ndɛne, ɔluakɛ yeva ndɛnebualɛ kosooti yewula Ralɛ ne asa, 23 amaa awie biala awula Ralɛ ne anyunlunyia kɛmɔ bɛwula Selɛ ne ala la pɛ. Emomu saa bɛkpo kɛ bɛkɛwula Nyamenle Ra ne mɔɔ yezoa ye bɛ nwo la anyunlunyia a, ɛnee ɔkile kɛ Selɛ mumua ne a bɛambu ye bie a.

24 "Memaa bɛade bɛ nwo ɔ bo nɔhalɛ wienyi kɛ, awie biala mɔɔ kɛdie me edwɛkɛ na ɔkɛlie Nyamenle ne mɔɔ zoanle me la ɔkɛli la, ɔlɛ ngoane mɔɔ ɔnlɛ awieleɛ a; bɛnrɛdua ye ɛtane nwo kakɛ biala, ɔluakɛ ɛnee yevi ewule nu yera ngoane nu dɛbadɛba. 25 Eza memaa bɛade bɛ nwo ɔ bo kɛ mekɛ bie ɛlɛba, asɛɛ bɔbɔ yera, mɔɔ mɔwuamra bade me ne a, ɛnelɛ ne mɔɔ le Nana Nyamenle Ara ne deɛ la, na bɛdabɛ mɔɔ bɛbadie la badɛnla ngoane nu. 26 Kɛmɔ Selɛ ne lɛ ngoane wɔ ɔdaye mumua ne ye nu la, zɔhane noko ala a yeva ngoane yewula ɔ ra ne nu a; 27 na eza noko yemaa ye tumi kɛ ɔbua aleɛabo amra amuala ndɛne, ɔluakɛ yemɔ a le Sonla Ra ne a. 28 Bɛmmamaa ɔyɛ bɛ azibɛnwo! Nɔhalɛ, mekɛ ne ɛlɛba mɔɔ mɔwuamra amuala bade Nyamenle Ra ne ane wɔ bɛ nla ne mɔ anu a, 29 na bɛbadwazo bieko nuhua ne mɔ mɔɔ yɛle kpalɛ la bahɔ ngoane mɔɔ ɔnlɛ awieleɛ la anu; yɛɛ nuhua ne mɔɔ anli bɛ ɛtane nwo nyane la bɛbabua bɛ fɔlɛ.

30 "Mengoati Egya membua ndɛne biala. Mɔɔ menwɔde la yɛɛ mebua a. Yɛɛ me ndɛnebualɛ ne noko di munli na eza ɔle pɛpɛ bɔkɔɔ, ɔluakɛ menva medame me adenle zo, na emomu Nana Nyamenle mɔɔ zoanle me la ɛhulolɛ adenle zo a mepe a.

31 "Medi medame me nwo daselɛ mekile bɛ a ɔnrɛyɛ boɛ, 32,33 na awie bie wɔ ɛkɛ, mɔɔ yemɔ a le Dwɔn Sɔnevolɛ ne. Yemɔ a di me nwo daselɛ a, na mɔɔ ɔka ye wɔ me nwo noko la le nɔhalɛ bɔkɔɔ! 34 Ɔngyia bɔbɔ kɛ dasanli kɛli me nwo daselɛ, emomu ɔlua ɛhye noko ati mehakye bɛ wɔ Dwɔn ɛdeɛ ne anwo amaa bɛalie me bɛali na bɛanyia ngoane. 35 Dwɔn yɛle kɛ kɛnlaneɛ ɔdale wienyi mekɛ ekyii bie ala, na ɔyɛle nvasoɛ ɔmaanle bɛ na eza noko bɛlile nwolɛ fɛlɛko, 36 na emomu melɛ dasevolɛ kpole mɔɔ di munli tɛla Dwɔn a. Na yemɔ a le nwanwane ninyɛne ne mɔ mɔɔ meyɛ bɛ dahuu la. Egya ne a vale bɛ wulale me sa nu a, na bɛmɛ a bɛdi daselɛ kɛ amgba Selɛ ne a zoanle me a. 37 Saa bɔbɔ bɛtɛnwunle ye bɛ nye zo anzɛɛ bɛtɛtele ɔ ne ɛlɛ a, Selɛ mumua ne ɛli ɔ nwo daselɛ. 38 Bɛnlie me bɛnli; noko mame a yezoa me kɛ menva Nyamenle edwɛkɛ ne membɛlɛ bɛ a.

39 "Dahuu bɛfedevede Ngɛlɛlera ne anu, ɔluakɛ bɛdwenle kɛ yemɔ yɛɛ maa bɛ ngoane mɔɔ ɔnlɛ awieleɛ a. Na mame noko a Ngɛlɛlera ne ka me nwo edwɛkɛ a! 40 Noko akee bɛnrɛra medame mumua ne me nwo ɛkɛ ne na ɔlua zo a meamaa bɛ zɛhae ngoane ne mɔɔ ɔnlɛ awieleɛ la!

41,42 "Ɔnvale me nwo! Ɔluakɛ me anyunlunyia ne ɛnvi menli lɔ, yɛɛ meze ye wienyi noko kɛ Nyamenle nwo ɛhulolɛ biala ɛnle bɛ nu. 43 Saa ɔnle zɔ a, anrɛɛ bɛnrɛkpo Mame mɔɔ Selɛ ne ɛzoa me la na bɛnrɛlie mɔɔ ɔdaye yebɔ ɔ ti anwo a yera la bɛnrɛdo nu! 44 Ɔnyɛ azibɛnwo biala kɛ bɛnlie bɛnli a! Ɔluakɛ bɛ ngome bɛ nwo anyunlunyia mɔɔ bɛwula la hyia bɛ tɛla mɔɔ Nyamenle kokye ne fa maa la!

45 "Bɛmmadwenle kɛ mame a mebadoa bɛ meahile Egya a, na emomu Mosisi mɔɔ bɛva bɛ rɛle bɛwula ye nu la ɔ! 46 Saa amgba ɔle nɔhalɛ kɛ bɛdie Mosisi bɛdi a ɛnee ɔwɔ kɛ bɛdie medame noko bɛdi, ɔboalekɛ mɔɔ Mosisi hɛlɛle la kpokpoti fale me nwo. 47 Na suzuamgba ala mɔɔ bɛnlie mɔɔ ɔhɛlɛle la bɛnli la, ɛnee kɛ ɔkɛyɛ na bɛalie me edwɛkɛ ɛdeɛ ne bɛali ɛ?"