João 8

Wɔ ɛzonletovoma ne mɔ wɔ nienwu?

1 Gyisɛse ziale hɔle Boka Ɔlivi ne azo, 2 na aleɛ hyenle bieko la, ye nwonlomɔ mangyee ne ala, eza ɔrale Asɔne Sua Kpole ne anu bieko. Yeangyɛ biala yɛɛ menli dɔɔnwo ne rayiale bieko a. Ɔti ɔdɛnlanle aze na ɔhilehilele bɛ. 3 Mɔɔ ɔ nloa wɔ zo ɔtendɛ la, Dwuuma mgbanyima ne mɔ nee Falasiima ne mɔ nee raalɛ bie mɔɔ yehɔbɔ huhunli ɛbɛla ɛmaa bɛhye ye la rale menli dɔɔnwo ne avinli.

4 Bɛzele Gyisɛse kɛ, "Kilehilevolɛ, yɛhyele raalɛ ɛhye wɔ mekɛ mɔɔ ɔgua zo ɔlɛbɔ huhunli ɛbɛla la. 5 Mosisi mɛla ne kile kɛ raalɛ biala mɔɔ kɛbɔ zɛhae ɛbɛla la ɔwɔ kɛ bɛsi ye awolɛ bɛku ye. Na kɛ ɛse ɛ?"

6 Ɛnee bɛkpondɛ kɛ ɔka edwɛkɛ bie mɔɔ ɔlua zo a bɛ sa kɛha ye bɛkɛhye ye a, na Gyisɛse noko anga ɛhwee. Ɔbutule na ɔvale ɔ sa ɔhɛlɛhɛlɛle aze. 7 Mɔɔ bɛgua ɔ nwo zo kɛ ɔye bɛ edwɛkɛ ne anloa la, ɔdwazole ɔgyinlanle bieko na ɔhanle kɛ, "Bɛzi ye awolɛ kɔkpula mekɛ mɔɔ ɔkɛwu a. Na emomu mɔɔ ɛtɛyɛle ɛtane ɛlɛ la yɛɛ ɛlumua ɛdo ye bolɛ ne a!"

8 Ɔbutule bieko na eza ɔhɛlɛhɛlɛle azɛlɛ ne anwo bieko. 9 Akee Dwuuma mgbanyima ne mɔ hwenle bɛ nwo nyaa hɔle ngoko ngoko, na bɛ kpanyinli ne bɔbɔ yɛɛ alumuale a. Ɔti nzinlii ɔhale Gyisɛse nee raalɛ ne angomekye ala wɔ ɛkɛ ne.

10 Gyisɛse dwazole bieko na ɔbizale raalɛ ne kɛ, "Na menli mɔɔ donle wɔ ɛzonle ne la wɔ nienwu? Anzɛɛ bɛ nuhua ko bɔbɔ ambu wɔ fɔlɛ ɔ?"

11 Raalɛ ne zele ye kɛ, "Awulae, Kyɛkyɛ." Gyisɛse noko zele ye kɛ, "Ɛnee medame noko membu wɔ fɔlɛ biala. Kɔ, na mmakɔyɛ ɛtane bieko."

12 Nzinlii mɔɔ eza Gyisɛse tendɛ ahile bɛ bieko la, ɔzele bɛ kɛ, "Mame a le ewiade kɛnlaneɛ ne a. Ɔti mɔɔ kɛli me nzi la awozinli ɛnrɛmaa ɔ gyakɛ ɛnrɛkpula ɛlɛ, ɔluakɛ me kɛnlaneɛ ne bamaa ye wienyi."

13 Falasiima ne mɔ buale ye kɛ, "Ɛtu ɛ nwo somaa; eza ɛle adalɛ!"

14 Gyisɛse zele bɛ kɛ, "Saa bɔbɔ melɛdi me nwo daselɛ a ɔle nɔhalɛ. Ɔluakɛ meze ɛleka mɔɔ mevi membale a, yɛɛ meze ɛleka noko mɔɔ melɛkɔ a, na bɛmɛ bɛnze. 15 Bɛmɛ bɛnea sonla nyunlu a bɛbua ndɛne a, na mame noko membua awie biala ndɛne, 16 yɛɛ saa mebua ndɛne bɔbɔ a, me ndɛnebualɛ ne le nɔhalɛ bɔkɔɔ; ɔluakɛ tɛ me ngomekye a mebua ndɛne ne a, me nee Egya ne mɔɔ zoanle me la a yɛbua a. 17 Ɔwɔ bɛ mɛla ne anu kɛ saa dasevolɛma nwiɔ anloa yɛ ko wɔ edwɛkɛ nwo a ɛnee bɛ daselɛlilɛ ne le nɔhalɛ. 18 Saa ɔle zɔ ɛdeɛ a ɛnee noko medi me nwo daselɛ, yɛɛ Egya ne mɔɔ zoanle me la noko di me nwo daselɛ."

19 Bɛbizale ye kɛ, "Ɛ Ze ne wɔ nienwu?"

Gyisɛse buale bɛ kɛ, "Bɛnze me sonla holɛ, yemɔti a bɛnze Egya ne noko la. Saa bɛze me a, anrɛɛ bɛkɛnwu Egya ne noko."

Bie mɔ ɛlie ɛli, bie mɔ ɛzu kpolera

20 Gyisɛse hanle edwɛkɛ ɛhye mɔ wɔ Asɔne Sua Kpole ne anu ɛleka ne mɔɔ bɛfa ezukoa bɛsie la. Noko awie biala angye ye, ɔluakɛ ɛnee ye mekɛ ne ɛtɛdwule.

21 Nzinlii, eza ɔzele bɛ bieko kɛ, "Melɛkɔ; bɛbakpondɛ me, na bɛnrɛnwu me, ɔluakɛ ɛleka mɔɔ melɛkɔ la bɛnrɛhola ɛkɛ ne ba. Yemɔti bɛbawu wɔ bɛ ɛtane ne mɔ anu."

22 Dwuuma ne mɔ bizebizale bɛ nwo kɛ, "Ɛnee ɔkabɔ ɔ nwo akɔnvo ɔ? Saa ɔka ye kɛ, ‘Bɛnrɛhola bɛnrɛra ɛleka mɔɔ melɛkɔ’ la a ɛnee duzu a ɔkpondɛ yeahile a?"

23 Akee ɔzele bɛ kɛ, "Bɛmɛ bɛvi azɛlɛ ye azo; mame noko mevi anwuma. Bɛmɛ bɛvi ewiade ɛhye anu; mame noko menvi nu. 24 Ɛhye ati a mese bɛbawu wɔ bɛ ɛtane ne mɔ anu la; ɔluakɛ saa bɛanlie bɛanli kɛ mame a le Ngoanedievolɛ ne ɔ nee Sonla Ra ne a, bɛbawu wɔ bɛ ɛtane ne mɔ anu."

25 Bɛzele ye kɛ, "Na wɔmɔ ɛle duzu?"

Gyisɛse buale bɛ kɛ, "Yemɔ ɔla a meka ye dahuu la. 26 Mebahola meabua bɛ ndɛne na eza meahilehile bɛ ninyɛne dɔɔnwo mɔɔ mekulo a, noko akee menyɛ ye zɔ, ɔluakɛ mɔɔ zoanle me la ɛdeɛ ne ala a meka a; na yemɔ a le Nɔhalɛ." 27 Eza bɛangola bɛande ɔ bo kɛ Nana Nyamenle Selɛ bedevinli ne anwo edwɛkɛ a ɔlɛka la.

28 Ɔti Gyisɛse zele bɛ kɛ, "Mekɛ mɔɔ bɛkɛbɔ me meanubaka nu la, yɛɛ akee bɛbanwu kɛ amuanrɛɛ mame a le Sonla Ra ne a. Eza noko bɛbanwu ye kɛ nɔhalɛ ne mɔɔ Egya hilele me la a menganle mengilele bɛ la. 29 Na mɔɔ zoanle me noko la nee me lua, ɔtɛkpole me, ɔluakɛ dahuu meyɛ ye ɛhulolɛdeɛ ne."

30,31 Akee Dwuuma mgbanyima ne mɔ dɔɔnwo mɔɔ dele ye edwɛkɛ ne la liele ye lile kɛ amgba yemɔ a le Ngoanedievolɛ ne a.

Na Gyisɛse zele bɛ kɛ, "Saa bɛdi mɔɔ meka la azo a, ɛnee bɛle me ɛdoavolɛma bɔkɔɔ; 32 bɛbanwu nɔhalɛ ne, na nɔhalɛ ne noko bamaa bɛ fanwodi."

33 Na bɛzele kɛ, "Yɛle Ebileham abo zo amra, yɛɛ yɛtɛyɛle ngɛkɛlɛ ɛlɛ! Na duzu ati a akee ɛse ‘yɛbanyia fanwodi’ ɛ?"

34 Gyisɛse buale kɛ, "Ɛtanevolɛ biala le ɛtane akɛlɛ. 35 Yɛɛ akɛlɛ biala noko ɛnlɛ fanwodi, kyesɛ Ralɛ ne angomekye ala! 36 Zɔhane ati saa Ralɛ ne maa bɛ fanwodi a, ɛnee bɔ zo mɔɔ bɛ nwo ɛdɔ bɛ a. 37 Meze kɛ bɛle Ebileham abo zo amra ɛdeɛ, noko akee bɛ bie mɔ ɛlɛbɔ me nwo tokule kɛ bɛku me, ɔluakɛ me edwɛkɛ ne angɔ bɛ ahonle ne mɔ anu. 38 Mɔɔ meze ye wɔ Egya anwo la yɛɛ meka meahile bɛ a. Na bɛmɛ noko mɔɔ bɛ ze zele bɛ la yɛɛ bɛlɛyɛ a."

39 Bɛdeanle nu bɛzele kɛ, "Yɛ ze a le Ebileham!"

Gyisɛse buale bɛ kɛ, "Saa amgba ala bɛle Ebileham amra a ɛnee bɛyɛ mɔɔ Ebileham yɛle la bie. 40 Me ɛtane mɔɔ meyɛ mɔɔ ɔti bɛkpondɛ me bɛahu me la a le kɛ meha nɔhalɛ ne mɔɔ vi Nana Nyamenle nehane la mehile bɛ. Tɛ ɛbɛla mɔɔ Ebileham bɔle la ɛne! 41 Mɔɔ bɛ ze yɛ la bie a bɛlɛyɛ la."

Bɛbuale kɛ, "Bɛanwo yɛ wɔ huhunli nyɛleɛ nu, yɛɛ yɛnle mbelazinli mralɛ: yɛ Ze kpalɛ ne a le Nyamenle Bedevinli mumua ne."

42 Gyisɛse zele bɛ kɛ, "Saa bɛ ze a le Nana Nyamenle a, anrɛɛ bɛkɛnyia me nwo ɛlɔlɛ, ɔluakɛ mevi Nana Nyamenle ɛkɛ ne a membale a. Meanva me tumi a membale a, emomu yemɔ a zoanle me a. 43 Duzu ati a bɛngola bɛnde mɔɔ melɛka la abo a? Ɔboalekɛ bɛdu bɛ gye kɛ bɛnrɛdie me edwɛkɛ la ati ɔ! 44 Bɛ ze a le Abɔnsam, ɔti ninyɛndane ne mɔɔ ɔyɛ la bie ala a bɛdabɛ noko bɛyɛ a. Mɔlebɛbo ne ɔle kodiawu, ɔnli nɔhalɛ, ɔluakɛ nɔhalɛ ekyii zɛhae bɔbɔ ɛnle ye nu. Ɔbɔ adalɛ a ɔfɛta ye; ɔboalekɛ yemɔ a le adalɛmenle ne a. 45 Ɛhye ati noko yɛɛ bɛdabɛ bɛkyi nɔhalɛ ne mɔɔ meka mekile bɛ la, na bɛnlie bɛnli la!

46 "Bɛ nuhua ne boni bɔbɔ a kɛhola kɛbu me ɛtane kokye anwo fɔlɛ a? Na saa nɔhalɛ ne a melɛka meahile bɛ la a; ɛnee duzu ati a bɛnlie me bɛnli ɛ? 47 Nyamenle ara biala tie ye edwɛkɛ. Sumunli kenle ala mɔɔ bɛmɛ bɛndie Nyamenle edwɛkɛ la, ɛnee ɔkile kɛ bɛnle Nyamenle amra."

48 Dwuuma mgbanyima ne deɛdeanle nu guale ɔ nwo zo kɛ, "Wɔmɔ Samɛleanli! Munzuvolɛ mɔɔ sunsum ɛtane ɛdwu ɛ nwo zo a! Ɔti a sumunli kɛ de la yɛka ye kɛ sunsum ɛtane ɛdwu ɛ nwo zo la."

49 Gyisɛse zele kɛ, "Kyɛkyɛ, sunsum ɛtane biala ɛnle me nu. Nɔhalɛ ne a le kɛ, Medi me ze eni, na bɛmɛ bɛnli me eni. 50 Tɛ kɛ asɛɛ mewula me nwo anyunlunyia ɔ, na awie ko wɔ ɛkɛ mɔɔ me anyunlunyia ɛwulalɛ ne wɔ ɔ sa nu a, na yemɔ noko a lɛ zolɛ tumi a. 51 Nɔhalɛ nu, nɔhalɛ nu, mese bɛ kɛ, ‘Awie biala mɔɔ kɛli me edwɛkɛ zo la, ɔnrɛwu ɛlɛ!’ "

52 Dwuuma mgbanyima ne mɔ zele kɛ, "Akee wɔmaa yela ali kɛ sunsum ɛtane wɔ wɔ nu. Ebileham nee kapezoma mgbole mgbole ne mɔ bɔbɔ ɛwu ɛhɔ; noko akee wɔmɔ ɛse saa awie tie wɔ a ɔnrɛwu ɛlɛ! 53 Ɛdawɔ mumua ne kɛ ɛbu ɛ nwo ɛ? Ɛnea a ɛle kpole ɛtɛla yɛ ze Ebileham nee kapezoma ne mɔ mɔɔ ɛwu la ɔ?"

54 Akee Gyisɛse zele bɛ kɛ, "Saa mewula me nwo anyunlunyia a me anyunlunyia ne le gyɛne. Egya ne a wula me anyunlunyia a, na yemɔ noko a bɛmɛ bɛfɛlɛ ye bɛ Nyamenle ne la. 55 Bɛnze ye bɔbɔ. Mame ala a meze ye a. Ɔti saa mese kɛ menze ye a ɛnee mebɔ adalɛ kɛ bɛdabɛ ala la pɛ! Nɔhalɛ nu, meze ye bɔkɔɔ. Yɛɛ eza noko medi ye mɛla zo. 56 Bɛ ze Ebileham lile fɛlɛko kɛ ɔkɛnwu me maleɛ ne. Ɔnwunle ye noko na ɔlile nwolɛ fɛlɛko kpole."

57 Dwuuma mgbanyima ne mɔ zele ye kɛ, "Ɛdawɔ mumua ne ɛtɛdile ɛvolɛ abulanlu, na kɛ ɔyɛle mɔɔ ɛholale ɛnwunle Ebileham ɛ?"

58 Gyisɛse buale kɛ, "Nɔhalɛ wienyi ne a le kɛ, mɔɔ ɛnee bɛtɛwole Ebileham bɔbɔ la, ɛnee mede aze dɛbadɛba!"

59 Ɛhye maanle Dwuuma mgbanyima ne mɔ akee sesale awolɛ kɛ bɛtoto bɛabɔ ye bɛahu ye. Noko Gyisɛse minliminlinle bɛ nye zo minlimɛnla na ɔvale bɛ sa abo nyaa ɔvi Asɔne Sua Kpole ne anu ɔhɔle.