João 9

Gyisɛse ɛyɛ anyezinliravolɛ ayile

1 Na mɔɔ ɔlua adenle nu ɔkɔ la, ɔnwunle nrenyia bie mɔɔ bɛwole ye anyezinliravolɛ la.

2 Ye ɛdoavolɛma ne mɔ bizale ye kɛ, "Kilehilevolɛ, duzu ati a bɛwole nrenyia ɛhye anyezinliravolɛ a? Ɛnee ɔlua ɔdaye mumua ne ye ɛtane ti anzɛɛ ye awovolɛma ɛtane ti ɔ?"

3 Gyisɛse buale bɛ kɛ, "Kyɛkyɛ, tɛ bɛ nuhua biala ɛtane ti ɔ. Na emomu, kɛ ɔkɛyɛ na Awulae Nyamenle tumi ne ala ali la ati ɔ. 4 Ɔwɔ kɛ yɛ muala yɛyɛ Nana Nyamenle gyima ne ndɛndɛ, ɔluakɛ ɔnrɛhyɛ biala ɛnee aledwolɛ ɛra mɔɔ awie biala ɛngola gyima yɛ a. 5 Wɔ melɛ ala mɔɔ mewɔ ewiade anu la, mele ewiade ne kɛnlaneɛ."

6 Akee ɔdole nyɛlɛ aze na ɔvale nyɛlɛ ne ɔfɔtɔle ndɛtɛlɛ na ɔvale ɔbetanle nrenyia ne anye zo, 7 na ɔzele ye kɛ, "Kɔ kɔnrinzi ɛ nyunlu wɔ Saelowam Nzulebula ne anu." "Saelowam" ne abo a le kɛ "Bɛzoa me". Ɔti nrenyia ne hɔle ɛleka mɔɔ bɛzoanle ye la, na ɔhɔnrinzinle ɔ nyunlu; akee ɔziale ɔ nzi ɔrale mɔɔ ɛnee ɔ nye ɛbuke a.

8 Mɔɔ ɔ gɔnwo mɔ nee menli gyɛne mɔɔ ze ye la nwunle ye la, bɛbizale bɛ nwo kɛ, "Asoo tɛ nrenyia ne mɔɔ tɛnla adehanle sɛlɛzɛlɛ ninyɛne ne la a le ɛhye ɔ?"

9 Bɛzule bɛ nwo kpolera, bie mɔ zele kɛ ɔdaye ɔ, yɛɛ bie mɔ noko zele kɛ tɛ ye ɔ, na ɛzɔhonlɛ ala a ɔzɔho ye a!

Na nrenyia mumua ne zele bɛ kɛ, "Medame ɔ!"

10 Akee bɛbizale ye kɛ, "Duzu edwɛkɛ a zile mɔɔ maanle ɛ nye bukele a?"

11 Ɔbuale bɛ kɛ, "Nrenyia ne mɔɔ bɛfɛlɛ ye Gyisɛse la a fɔtɔle ndɛtɛlɛ betanle me nye, na ɔmaanle mengɔnwowole ye wɔ Saelowam Nzulebula ne anu a. Menyɛle ala pɛ yɛɛ me nye bukele a!"

12 Bɛbizale ye kɛ, "Nienwu a ɔwɔ ye kɛkala a?" Ɔbuale bɛ kɛ, "Menze."

13 Akee be nee nrenyia ne hɔle Mɛla eku anzɛɛ Falasiima ne mɔ anyunlu. 14 Na ɛhye amuala noko zile wɔ Ɛnwomenlelielɛ Kenle ne. 15 Akee Falasiima ne mɔ bizale ye nwolɛ edwɛkɛ. Yemɔti ɔdaye noko ɔzɔle zo ɔhanle kɛ ɔzile mɔɔ Gyisɛse fɔtɔle ndɛtɛlɛ ne betanle ɔ nye na ɔhɔwowole na ɔnwunle debie la amuala ɔhilele bɛ.

16 Bɛ nuhua bie mɔ zele kɛ, "Ɛnee noko zɛhae Gyisɛse ye ɛnvi Nyamenle ɛkɛ, ɔboalekɛ ɔyɛ gyima wɔ Ɛnwomenlelielɛ Kenle ne."

Bɛ nuhua bie mɔ bizale kɛ, "Kɛ ɔsi mɔɔ ɛtanevolɛ gyɛne biala kɛhola kɛyɛ nwanwanedeɛ ɛhye ɛ?" Ɔti bɛ nloa anzɛ bɛ nwo.

17 Akee Falasiima ne mɔ hɔle nrenyia ne mɔɔ anrɛɛ le anyezinliravolɛ la anwo zo bieko, na bɛbizale ye kɛ, "Ɛnea a nwane a le nrenyia ɛhye mɔɔ bukele ɛ nye ne la?"

Ɔbuale bɛ kɛ, "Medie medi kɛ ɔle Nana Nyamenle kapezonli bie mɔɔ yezoa ye a."

18 Dwuuma mgbanyima ne mɔ anlie anli kɛ nrenyia ɛhye a ɛnee le anyezinliravolɛ ne a. Ɔti bɛvɛlɛle ye awovolɛma, 19 na bɛbizale bɛ kɛ, "Asoo bɛ ra ye a le ɛhye ɔ? Asoo bɛwole ye la ɛnee ɔ nye ɛzi ɔ? Saa ɔle zɔhane ɛdeɛ a, ɛnee duzu ati a akee yenwu debie ɛ?"

20 Ye awovolɛma ne buale kɛ, "Yɛze kɛ yɛ ra ɛne, yɛɛ yɛze noko kɛ bɛwole ye anyezinliravolɛ, 21 na emomu kɛ ɔzile mɔɔ akee ɔnwunle debie, ɔ nee ahenle mɔɔ yɛle ye ayile la ɛdeɛ, yemɔ yɛnze. Ɔdaye ɔle ɔ ti anwo kpanyinli mɔɔ ɔkola ɔka ɔ nloa anu edwɛkɛ a. Ɔti bɛbiza ye."

22,23 Bɛhanle ɛhye, ɔluakɛ ɛnee Dwuuma mgbanyima ne mɔ ɛbɔ bɛ kɔkɔ kɛ dasanli biala mɔɔ kɛha kɛ Gyisɛse a le Ngoanedievolɛ ne la bɛnrɛmaa ye adenle bɛnrɛmaa ɔnrɛhɔ bɛ ayiasua ne anu bieko. Ɔti ɛnee bɛsulo.

24 Ɔti eza Falasiima ne mɔ vɛlɛle nrenyia ne, mɔɔ anrɛɛ le anyezinliravolɛ la bieko, na bɛzele ye kɛ, "Fa anyunlunyia ne maa Nana Nyamenle; mmafa ɛmaa Gyisɛse, ɔluakɛ yɛze ye wienyi kɛ Gyisɛse le ɛtanevolɛ."

25 Nrenyia ne buale bɛ kɛ, "Saa ɔle ɛtanevolɛ o, saa ɔle tenlenenli o, mame menze. Mɔɔ meze la ala a le kɛ: Anrɛɛ mele anyezinliravolɛ, na kɛkala mɔ menwu debie bɔkɔɔ!"

26 Bɛbizale ye kɛ, "Na duzu a ɔyɛle a? Kɛ ɔzile ɔyɛle wɔ ayile ɛ?"

27 Nrenyia ne deanle nu zele kɛ, "Ayi mɔ, meha ye ko mehile bɛ bɛandie! Na duzu ati a akee bɛmmaa mennyia me nwo adenle noko ɛ? Anzɛɛ bɛdabɛ noko bɛkpondɛ kɛ bɛyɛ ye ɛdoavolɛma ɔ?"

28 Bɛbɔle ye aholoba na bɛzele ye kɛ, "Wɔmɔ a ɛle ye ɛdoavolɛ a, na yɛmɛ yɛle Mosisi ɛdoavolɛma. 29 Yɛze kɛ Nana Nyamenle dendɛle hilele Mosisi, na zɛhae sonla ye yɛmɛ yɛnze ɔ nwo edwɛkɛ biala."

30 Nrenyia ne buale bɛ kɛ, "Wio! Bɛ edwɛkɛ ye yɛ me azibɛnwo kpole! Bɛ nye dua kɛ ɔkola ɔbuke anyezinliravolɛma anye, noko akee bɛse bɛnze ɔ nwo edwɛkɛ hweledede! 31 Bɛze kɛ Nana Nyamenle noko ɛndie ɛtanevolɛma nzɛlɛlɛ, emomu menli mɔɔ sonle ye na eza bɛyɛ ye ahunludwolɛdeɛ la a ɔtie bɛ nzɛlɛlɛ a. 32 Sumunli kɛ bɛbɔle ewiade too mɔɔ bakpula ɛnɛ la, awie biala ɛtɛkolale ɛtɛbukele sonla mɔɔ bɛwole ye anyezinliravolɛ la anye ɛlɛ. 33 Saa nrenyia ɛhye ɛnvi Nana Nyamenle lɔ a, anrɛɛ ɔnrɛholɛ ɛhye yɛ."

34 Bɛdeanle ye nu bɛzele kɛ, "Hɛe! Ɛtanevolɛ mɔɔ le kɛ ɛdawɔ. Wɔmɔ a ɛbahile yɛ debie anzɛɛ?" Ɔti bɛwɔle ɔ kɔme anzi kpulo kɛ ɔhɔ.

35 Mɔɔ Gyisɛse dele mɔɔ ɛzi la, ɔkpondɛle nrenyia ne na ɔbizale ye kɛ, "Ɛdie Sonla Ra ne ɛdi ɔ?"

36 Nrenyia ne noko bizale ye kɛ, "Na yemɔ a le nwane; mɛsɛlɛ wɔ, kile me, amaa mealie ye meali."

37 Gyisɛse zele ye kɛ, "Wɔnwu ye, na yemɔ a ɛlɛtendɛ ahile wɔ la!"

38 Nrenyia ne zele kɛ, "Wioo, Awulae, akee melie meli!" Akee ɔhotole na ɔyeyɛle Gyisɛse.

39 Gyisɛse akee zele ye kɛ, "Mera ewiade anu kɛ mebabuke menli mɔɔ anye ɛzi wɔ sunsum nu la anye, na meamaa menli mɔɔ bɛdwenle kɛ bɛnwu debie la anwu kɛ amuanrɛɛ bɛle anyezinliravolɛma."

40 Falasiima mɔɔ gyigyi ɛkɛ ne la bizale ye kɛ, "Ɛnee ɛkpondɛ wɔaze yɛ kɛ yɛle anyezinliravolɛma ɔ?"

41 Gyisɛse buale bɛ kɛ, "Saa bɛze kɛ bɛle anyezinliravolɛma a; anrɛɛ bɛnli fɔlɛ; na kɛmɔ bɛse bɛze mɔɔ bɛyɛ anzɛɛ bɛnwu debie la ati a bɛ fɔlɛlilɛ ne noko tɛbɔ bɛ nwo a."